Marcos 8

Sa Pagpakaen Ku Haepat Ha Libu Ha Mga Etaw

(Marcos 8:1-10; Mateo 15:32-39)

1Duun taena ha panahun naamul-amul en paman sa madakel tungkay ha mga etaw. Tumenged ta hurà dan en agkakaen inamul hi Jesus sa mga tinun-an din daw ikagiyi sidan, 2“Agkahid-uwan ku haini sa mga etaw ta tatulu en ha aldaw sa pagduma-dumahà dan kanuy daw hurà dan en gayed agkakaen. 3Ku ipaulì ku sidan ha hurà dan makaen kan ku tasien sidan diyà ta dalan ta sa duma kandan madiyù sa ag-ulian din.”

4Ba su mga tinun-an tuminubag, “Hindu kuy duun makatimù hu ipakaen kandan ta pinakabulung-bulung haini ha lugar?”

5Ininsaan sidan hi Jesus, “Pila ha buuk sa supas nuy?”

Tuminubag sidan, “Pitu dà ha buuk.”

6Impapinuu hi Jesus sa mga etaw diyà ta bugtà. Tinimù din su pitu ha supas daw ampui haena. Su makapenga en mag-ampù pinangebing din daw sugua su mga tinun-an din ha ipakaen haena hu mga etaw. Aman binuhat dan haena. 7Amin daan atiyuay ha sedà ha pila dà ha buuk daw inampuan din daan haena daw ipan-ila duun ku mga etaw. 8Su mangabuhì en sidan inamul-amul hu mga tinun-an su nasamà duun, saena pitu pa ha ambung. 9Haepat ha libu sa kadakelen taena ha mga etaw. 10Dayun impaulì hi Jesus su mga etaw daw luminulan hu kandin duun hu barutu duma hu mga tinun-an din payanaen diyà ta Dalmanuta.

Sa Tagpan-ahà Hu Belenganen

(Marcos 8:11-13; Mateo 16:1-4)

11Amin mga Parisiyu ha duminiyà ki Jesus hu pagpakigsawalà kandin ta agsulayen dan haena, aman hinangyù dan si Jesus ha ipaahà din kandan sa belenganen ha iyan timaan ha sinugù haena hu Dios. 12Miggahinawa si Jesus hu madalem daw ikagi, “Imbà kaw tagpan-ahà hu belenganen? Laus gayed sa ag-ikagiyen ku inyu ha iman harì kaw gayed makaahà hu belenganen.” 13Dayun inawaan din sidan daw likù duun ku barutu daw luminayun haena.

Sa Katudluanan Hu Mga Parisiyu Daw Hi Herodes

(Marcos 8:14-21; Mateo 16:5-12)

14Sa mga tinun-an hi Jesus nalipat pag-uwit hu supas ba amin agà nangkabuuk duun ku barutu. 15Inikagiyan sidan hi Jesus, “Magbantay kaw hu igpatulin taena ha mga Parisiyu daw hi Herodes.”

16Dayun miglalang-lalang sa mga tinun-an din, “Iyan gid ta hurà kuy makauwit hu supas.”

17Ba saena natun-an hi Jesus aman inikagiyan din sidan, “Imbà kaw tag-ikagi ha hurà kaw makag-uwit hu supas? Harì kaw pa ba diay pakasabut? Madesen ba diay gayed sa henà-henà nuy? 18Imbà kaw harì pakaindan daw pakapaliman sa amin nuy man ngaay mata daw talinga? Agkalipat kaw ba diay? 19Pila man ha ambung sa nasamà taena ha lalima ha buuk ha supas ha impakaen ku lalima ha libu ha mga etaw?”

Tuminubag sidan, “Sampulù daw daruwa ha ambung.”

20Daw ininsaan din pa gayed sidan, “Pila daan ha ambung sa nasamà taena ha pitu ha supas ha impakaen ku haepat ha libu ha mga etaw?”

21Tuminubag sidan, “Pitu daan ha ambung.”

Inikagiyan din sidan, “Harì kaw pa ba diay gihapun agpakasabut?”

Sa Pagbulung Hu Buta Diyà Ta Bethsaida

22Duminiyà say Jesus ta Bethsaida dayun amin buta ha inuwit hu mga etaw diyà ta kandin daw pinagayukan dan ha dampaen din sa mata ku buta ta daw maulian. 23Kinipitan hi Jesus su buta payanaen ta guwà taena ha banuwa. Su maileban din sa mata ku buta daw dampaa haena ininsaan din, “Amin nu ba agkaahà?”

24Mighelaw-helaw su buta daw tuminubag, “Pakaahà a hu mga etaw ba agkailing sidan hu mga kayu ha taghiphipanaw.”

25Dinampà en paman hi Jesus sa mata ku buta dayun naulian haena daw panday en nakaindan. 26Impaulì hi Jesus daw ikagiyi ha harì en lumikù diyà ta banuwa.

Sa Inikagi Hi Pedro Mahitenged Ki Jesus

(Marcos 8:27-30; Mateo 16:13-20; Lucas 9:18-21)

27Si Jesus daw sa mga tinun-an din duminayun duun hu mga banuwa ha ubay ta Cesarea Filipos. Su taghipanaw sidan ininsaan din sidan, “Sin-u a man duun hu pag-ikagi hu mga etaw?”

28Tuminubag sidan, “Sa duma tag-ikagi ha iyan ka kun si Juan Ha Tagpamautismu, sa duma tag-ikagi daan ha iyan ka kun si Elias, sa duma tag-ikagi ha sabuwa ka kun duun hu mga prupita.”

29Dayun ininsaan sidan hi Jesus, “Sinyu, sin-u a man duun hu henà-henà nuy?”

Tuminubag si Pedro, “Iyan ka su Misiyas.”

30Binalaudan hi Jesus su mga tinun-an din ha harì gayed sidan manunultul duun hu bisan sin-u mahitenged kandin.

Sa Pag-ikagi Hi Jesus Mahitenged Hu Kamatayen Din

(Marcos 8:31-38; Mateo 16:21-28; Lucas 9:22-27)

31Tinudluan hi Jesus sa mga tinun-an din ha kinahanglan ha sa Batà hu Etaw mag-antus hu madakel ha mga pasipala daw pagtameyesen hu mga magulang daw hu mga labaw ha sinaligan hu paghalad daw hu mga manunudlù hu Kasuguan, daw kinahanglan daan ha pahimatayan dan gayed ba duun hu ikatulu ha aldaw mabanhaw dà. 32Mapayag gayed sa pag-ikagi din kandan mahitenged taena, aman inubayan hi Pedro daw baldenga.

33Ba uminahà si Jesus duun hu mga tinun-an din, dayun binaldeng din si Pedro ha tagyanaen, “Awà ka dini ta kanak, Satanas, ta sa henà-henà nu kenà kandin hu Dios ba kandin dà hu etaw.”

34Dayun inamul-amul hi Jesus sa mga etaw duma hu mga tinun-an din daw inikagiyan din sidan, “Bisan sin-u sa agkabayà agsunud kanak kinahanglan ha lipatan din gayed sa kandin ha agkabayaan daw antusen din sa alan ha mga malegen bisan duun hu kamatayen ta daw makasunud kanak. 35Ta bisan sin-u sa agkanugun hu kinabuhì din matay dà gihapun, ba saena ha tagsunud kanak daw tagsangyaw hu Maayad ha Tultulanen bisan duun hu kamatayen mailahan hu kinabuhì ha hurà din katapusan. 36Inu man sa pulus hu etaw ku maangken din sa tibuuk ha kalibutan ba malaag sa kinabuhì din? 37Hurà gayed pakapalit hu kinabuhì ha hurà din katapusan. 38Duun taini ha panahun nakadiyù en sa etaw duun hu Dios daw tagbuhat en sidan hu mga madaet. Bisan sin-u haena sa ikagayhà din sa pagsunud kanak daw sa mga lalang ku siak sa Batà hu Etaw ikagayhà ku daan asem haena ku lumikù a dini ha magpangaluanlag iling hu Dios ha Amay ku daw hu mga balinsuguen din.”

Currently Selected:

Marcos 8: bkd

Highlight

Copy