Luke 15
15
Kolomong-Auli 15 Yesos Ulu-Pulu-Kis Tili Yambuma Kene Taki-Taki Mulurum Mele Juda-Yambumanga Tápu-Yima-ni Kanuku Kis Piliiringeliinga Piliipa Kene Yesos-ni Pulu Yili Yambu Kis Kanuma Numanu Munjurum Mele Nimba Simbandu Ung-Eku Yupuku Turum Ung-Ekuma
Te: 15:1-7 Kung-Sipsip Te Takara Turumeliinga Ung-Ekale
1Ku-moni-takis liili yi kanuma kene ulu-pulu-kis tili yi wema kene enini pali Yesos-nga ungele piliingíndu yunu mulurumna nondupa uring. 2Perisi-yi kanuma kene Pulu Yili-nga ung-manimanga puluma piliiku ung-bo tunjuring yi kanuma kene enini aku-siku tiring mele kanuku kene kon-konu nikuliinga niku mele: “Yi ili yunu tepa kis-sikem. Ulu-pulu-kis tili yambuma “Wasie molamili wai.” nimbaliinga, langi taki-taki enini kene wasie noku molemeleko.” niring.
3Yesos-ni enini aku-siku niring mele piliipaliinga [ung-eku ima enini topa sirim.] Ung-eku ili topaliinga nimba mele:
4“Eninga yi te-ni kung-sipsip paip-paon monjulka kene te takara tolkanje yunu-ni sipsip po-paon ten kelepa nain wema kolea-wakana molangi mundupa kelepa pupa, takara tolka kung-sipsipele korulsiliipa naa pulkaye? [Aima korulsiliipa pulka.] 5Penga kanupa liipaliinga yunu-ni numanu sipa apu topa lkundu memba pulka. 6Kanu-kene lkundu omba kene yili-ni yunga pulu lelemú yambuma kene yunga lku keri-kúpu yambuma walsipa kene nimba mele: “Nanga kung-sipsip takara tum kanili kanupu liindeliinga wasie numanu sipu molamili wai.” nilka.” [nirim.]
7[Nimba kene ung-ekaliinga pulele nimba para sipa kene nimba mele:] “Na-ni eni ung te nimbu siker: “Yambu numanu sumbi-nimba pípili molemele yambuma aku-siku molemeláliinga enini ulu-pulu-kisma munduku kelku numanu topele tungí kupulanum te naa lelemú kanili, yambu kanuma mulú-koleana angkellama-ni numanu we silimele. Akiliinga-pe sipsip nukuli yili-ni yunga sipsip takara tolemále kanupa liipaliinga aima lakupa numanu silka mele aku-sipa ulu-pulu-kis tili yambu te yunga ulu-pulu-kis telemúma piliipa kis piliipa mundupa kelepa numanu topele tombá kene angkellama-ni aima lakuku numanu singí.” niker.” [nirim.]
Te: 15:8-10 Ku-Moni Te Mania Purumeliinga Ung-Ekale (Kolomong-Auli 15 pali kanui)
8[Aku-sipa nimbaliinga kelepa ung-eku te kene wasie topaliinga nimba mele:]
“Te ya walsekerko: Ambu te ku-moni suruli mele engkaki-rurepunga tale nosupa kene penga ku-suruli mele kanumanga mong tilu mania pulkanje yunu tepi-llam kandupa lku kulsupana memba naa korulkaye? [Aima sika korulkale.] 9Kanu-kene ku-moni kanili kanupa liipaliinga yunga pulu lelemú yambuma kene yunga lku keri-kúpu yambuma walsipa kene nimba mele: “Nanga ku-moni suruli mania pumu kanili kanupu liindeliinga wasie numanu sipu molamili wai.” nilka.
10“Na-ni eni nimbu siker: “Ambu kanili numanu silka akili mele aku-sipa ulu-pulu-kis tili yambu te yunga ulu-pulu-kis telemúma piliipa kis piliipa mundupa kelepa numanu topele tombá kene Pulu Yili-nga angkellama-ni numanu singí.” niker.” nirim.
Te: 15:11-32 Kangale-ni Tepa Kis-Sirim Akiliinga-pe Lapa-ni Yunu We Numanu Munjurum Mele Ung-Ekale (Kolomong-Auli 15 pali kanui)
11[Aku-sipa nimbaliinga] Yesos-ni kelepa [ung-eku yupuku-sipale wasie topa yi-aulima mani sipa kene] nimba mele:
“Yi te, yunga kang tale muluringli. 12Walse kang-akeleale-ni lapandu nimba mele: “Tata, nu kulunéliinga nunga moya-mélema isili-ui moke tekunu na sini mele si.” nirim kene yi kanili-ni yunga nusurum mélema moke tepaliinga yunga kangsele sirim liiringli.
13Méle kanuma elsele moke tepa sirim kene kang-akeleale kongun talse mindi molupa kene, penga méle sirim-ma pali liipa memba kupulanum sulu tenga purum. Kupulanum suluna pupa kene kolea tenga pupa molupa kene yunu langi kaíma mindi nomba, mulumbale kaíma mindi ku-moni auli-tepa pulimúma taropu topa liipa panjipaliinga, no-tonduluma taropu topa liipa nomba, ambu wapera tombandu ku-moni sipa, aku-sipa telsiliipa purum kene yunga ku-moni mélema pali pora nirim.
14Yunga mélema kene ku-monima kene pora nirim kene yunu aima korupa purum. Kanu-kene yunu mulurum koleana engle auli te lirim kanu-kene yunu mélema pali mólu turum kene yunu aima engle-ni kulurum. 15Yu engle turum kilia kolea pulu yi te mulurumna pupaliinga “Ku-moni kongun te lim lem teambu si.” nimba mawa tirim kanu-kene yunu-ni nimba mele: “Kapula, nanga kung tápu tenjikunu ‘Langi nangi.’ nikunu liiku si.” nirim. 16[Engle-ni aima kolupaliinga] ga-kilu kepe kanapa-buluma kepe kung sirim-ma ‘Nolka.’ nimba piliipa mulurum akiliinga-pe te naa siring.
17Kanu-kene penga yunu numanu liipa mundupa piliipaliinga yununu nimba mele: ‘Tatanga kongun tenjilimele yambuma langi pulele noku teku kis-silimele andiliinga-pe na ya engle-ni kolupu kene kamu kolumbu teker. 18Akiliinga na anju pupu Tata molemúna pupu kene yunundu nimbu mele: “Tata, nu kene Mulú-Koleana Molemú Yili kene na-ni tepu kis-sirindu. 19Na kang kisele akiliinga nunga málale molumbále kapula naa temba akiliinga nunga kongun-yi te molambu.” nimbú.’ nimba piliirim. 20Aku-sipa nimba piliipaliinga yunga mulurum koleale mundupa kelepa, lapa mulurumna [lku koleandu] pumba purum.
Yunu lku koleandu koela pumba purum kene yunga lapa-ni yunu sulu tepa urumele kanupaliinga yunu kondu kolupa lkisipa pupa yunu kanglurum.
21Kanu-kene kangale-ni lapandu nimba mele: “Tata, nu-kene Mulú-Koleana Molemú Yili-kene na-ni tepu kis-sirindu. Na kang kis akiliinga nunga málale molumbále kapula naa temba akiliinga nunga kongun yi te molambu.” nirim.
22Aku-sipa nimba mulurum kene lapa-ni yunga kongun tinjiring kendemande-yi kanumandu nimba mele: “Wela puku nanga mulumbale kaiéle liiku meku oku yunu pakunjuku, ki-ung te liiku yunga kína monjunjuku, kimbu-su liiku yunga kimbuna monjunjai. 23-24Aku-siku teku kene kung-kao walú auliele toku kalunjuku, molumbulúna meku wai.” nirim. “Nanga kangale yunu kórunga-ui purum, ‘Yunu kulurum[-nje.’ nimbu piliirindu] akiliinga-pe ekupu yunu alsupa kona molupa okum. Yunu ui pupaliinga tepa nema liirim akiliinga-pe ekupu alsupa okum kanupu líímulu kilia numanu sipu kung kao nombu molamili.” nirim kene enini aku-siku numanu siku kung noku muluring.
25Akiliinga-pe yunga kang-komale eninga puniena kongun tepa molupa kene penga ipinjali lkundu ombá urum kene enini numanu siku musik ung siku denis teku muluring ungele piliipaliinga 26yunu-ni kongun kendemande-yi te-ndu “Ung te niambu ui.” nimba kene walsipa nimba mele: “Ulu tekemele ili nambimuna tekemeleye?” nimba walsurum.
27Kongun kendemande-yi kanili-ni yunundu pundu topa kene nimba mele: “Angena um-na lanie-ni kanupa yunu kapula mele molupa um-na kanupa kene numanu sipa “Kung-kao walú auliele namili.” nimba topa kalum.” nirim.
28Aku-sipa nirim piliipaliinga kang-komale yunu arerembi kolupaliinga “Na lkuna lkundu aima naa pumbu!” nirim.
Aku-sipa nirim piliipaliinga lapa-ni wendu omba yunundu nimba mele: “Oliu-kene wasie numanu sipu molamili ui.” nimba mawa tirim kene 29lapandu pundu topa kene nimba mele: “Piliiyo! Na taki-taki, punie pulele, nunga kongunale tenjipu molupu kene nu-ni nillu ungma taki-taki piliipu liipu teng panjipu, walse kepe nunga ungele karaye naa tepu moliu akiliinga-pe nu-ni nandu walse kepe kung-memi walú te ‘Kánguma-kene wasie numanu siku noku molai.’ nikunu naa sillu. 30Akiliinga-pe ekupu nunga kang te omba, yunu-ni ambu-waperama nunga ku-monima sipa tepa pora sirim, kang kanili um kene nu numanu sikunu ‘Kung-kao walú auliele namili.’ nikunu túnu lam.” nirim.
31Lapa-ni yunundu pundu topa kene nimba mele: “Kangale, nu kene na kene wasie taki-taki molembulu kene nanga mélema pali olsunga. 32Akiliinga-pe angena ui kulurum [mele tirim] kanili ekupu alsupa kona molupa um. Yunu ui pupa purum [mele tirim], ekupu kelepa um kanupu líímulu akiliinga oliu numanu sipu musik ung sipu langi nombu molkumulu akili kapula tekemulu.” nirim.” [nimba Yesos-ni] aku-sipa nirim.
Currently Selected:
Luke 15: mux
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.
