Mwanduso 42
42
Ndugu zake Yosefu wohita Misili kugula uhemba
1Yakobo viyamanyile kuwa uko Misili kuna ndiya, kawalongela wanage, “Habali moilola mweye kwa mweye? 2Nihulika uko Misili kuna ndiya, hiteni uko mukagule ndiya muladi sekechidanganike na nzala.” 3Ivo ndugu longo wa Yosefu wahita Misili kugula ndiya. 4Mbali Yakobo hamulekele Benyamini mdodo wake Yosefu yahite na ndugu zake, kwaviya kadumba chinhu chihile sekechimpate.
5Wana wa Isilaili wafika Misili, wagula ndiya fana wamwenga, kwaviya uko kuna iisi ya Kanaani kukala na nzala. 6Chipindi icho, Yosefu niiyo yakalile mulolezi wa isi ya Misili, yoyawachuuzile ndiya wanhu walawile zisi zose. Ivo ndugu zake Yosefu weza na wamtumbalila mavindi mbaka vihanga vidalisa hasi. 7Yosefu viyawawone ndugu zake kawamanya, mbali kaitenda fana viya hawamanyile bule. Kawauza kwa kukalika, “Mweye mulawa kulihi?”
Nawo wamwidika, “Chilawa isi ya Kanaani, chiza kugula ndiya.”
8Yosefu kawamanya sekulu zake, mbali wawo hawammanyile bule. 9Yosefu kaikumbuka nzozi iyalotile na kalonga, “Mweye mwiza kupelemba unyondenyonde wa isi yetu.”
10Ndugu zake wamwidika, “Siyo mwenevale. Cheye wasang'hani wako, chiza kugula ndiya. 11Cheye chose ndugu, cheye siyo wapelembaji. Cheye wasang'hani wako hachilonda uvwizi.”
12Mbali Yosefu kagendelela kulonga, “Siyo! Mwiza kupelemba unyondenyonde muna iisi yetu.”
13Wamulongela, “Cheye wasang'hani wako, chose cha ndugu longo na waidi, wana wa munhu imwe mkaya wa Kanaani. Ndugu yetu imwe kadanganika na mdodo wetu kasigala na tati yetu.”
14Yosefu kawedika, “Fana viya vinimulongeleni, mweye wapelembaji. 15Vino niivo vondamugezigwe, noilaha kwa zina da mfalume, hano hamwizahalawa mbaka mdodo wenu vondayeze. 16Mtumeni imwe wenu yamsondelele ndugu yenu imdodo, kuno wamwenga wogozela muna ichifungo mbaka hondaumanyike ukweli wa ulonzi wenu, buleivo noilaha kwa zina da mfalume, mweye mwa wapelembaji.” 17Maabaho kawaguma muna ichifungo kwa siku nhatu. 18Siku yeketatu Yosefu kawalongela, “Kwaviya niye nomdumba Mulungu, tendeni vino na mweye mwizakala. 19One mweye siyo wavwizi, imwe wenu yasigale muna ichifungo, wamwenga wawagalile ndiya ndugu zenu weli na nzala ukaye. 20Maabaho mumgale mdodo wenu kumwangu. Iyo yolagusa ukweli wa ulonzi wenu na hamwizakomigwa bule.” Waitogolela ivo. 21Maabaho walonganya, “Lelo cheye cha muna yamagayo kwa ichimu cha mbuli yochimtendele Yosefu ndugu yetu, chimuwona kakala na luholozi ng'hani hata viya viyachilambile chimtaze, mbali cheye hachimtegeleze bule. Lekamana magayo yano yose yochilawilila.”
22Lubeni kawedika, “Vino siwalongele kuwa sekemumulumize mbwanga? Mbali mweye hamunitegeleze bule! Lelo damu yake yolondigwa kumwetu.” 23Yosefu kakala yovimanya mbuli zose ziwakalile wolonga, mbali wawo hawavimanyile bule kuwa kavimanya, kwaviya viyalongile kalonga nawo kwa nzila ya mfambulaji. 24Yosefu kasegela hoyakalile na kandusa kulila. Kabwela na kulonga nawo, kamgwila Simeoni na kamfunga haulongozi wawo.
Ndugu wa Yosefu wobwela Kanaani
25Yosefu kalagiliza malobota yawo ya kusumila yamemezigwe ndiya na kumbwelezela chila imwe wawo hela muna dilobota jake na ndiya ya mzila. Ivo niivo itendeke. 26Wawapapiza mbahasha zawo vihongwe, maabaho wasegela. 27Viwafikile hanhu ha kugona nyambenyambe, imwe wawo kafungula lobota jake yadahe kumdima chihongwe wake, kazanywa kuwona hela yake muna dilobota jake. 28Kawalongela ndugu zake, “Hela yangu ibwelezigwa.” Aino hano hana dilobota jangu! Viwahulike mbuli izo, wafa moyo na wakala wogudema kwa ludumbo na kwiiuzagiza wenyewo, “Chinhu chaki chino Mulungu choyachitendele?”
29Viwafikile kwa tati yawo Yakobo uko kuna iisi ya Kanaani, wamulongela mbuli zose zilawilile. 30“Mkulu wa isi ya Misili kalonga na cheye kwa kukalika na kuchilonga cheye cha wapelembaji muna iisi yake. 31Mbali cheye chimwidika, ‘Cheye siyo wapelembaji, cheye hachilonga uvwizi. 32Chimulongela kuwa cheye cha ndugu longo na waidi, wana wa tata imwe. Ndugu yetu imwe kadanganika, mdodo wetu kauko kuna iisi ya Kanaani hamwe na tati yetu.’ 33Mbali mkulu wa isi ija kachilongela, ‘Vino niivo vondanivimanye kuwa mweye hamulonga uvwizi, mulekeni kumwangu ndugu yenu imwe, wamwenga mgale ndiya kwa ndugu zenu weli na nzala. 34Mumgale mdodo wenu kumwangu. Maabaho nizavimanya kuwa hamuli wapelembaji, mbali wanhu hawalonga uvwizi. Nizaweng'ha ndugu yenu mubwele nayo na mwizadaha kulekeligwa kutenda uchuuzi muna iisi ino.’ ”
35Viwakalile wokung'hunha ndiya kulawa muna yamalobota yawo, wazanywa kuwona chila imwe wawo kabweleziligwa chifuko chake na hela mgati ya lobota jake. Viwawone zihela, wawo na tati yawo Yakobo wadumba. 36Yakobo tati yawo kawalongela, “Monihoka wanangu, Yosefu kakwabule, Simeoni kakwabule, lelo molonda kumsola Benyamini. Manhesa yose yamhata niye!”
37Lubeni kamulongela tati yake, “Fana simbweleze bule Benyamini kumwako, uwakome wanangu waidi. Muleke Benyamini muna yamakono yangu na niye nizamkaliza na kumbweleza kumwako.”
38Mbali Yakobo kalonga, “Mwanangu haita hamwe na mweye bule, sekulu wake kadanganika na kasigala yaidumwe muhala. One jojose dahamulawilila mwiinzila, niye namulala nili na uhenga, ivo mwizanikoma kwa lugano dondanipate.”
Currently Selected:
Mwanduso 42: Ching'hwele
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
