Mwanduso 44
44
Nhungo yopatika kwa Benyamini
1Yosefu kamulagiliza ndolezi wa kaye yake, “Memeza malobota ya wanhu wano ndiya, fana viya vowodaha kupapa, iviya mwikile chila munhu hela muna umulomo wa lobota jake. 2Ika nhungo malumu muna umulomo wa lobota da ija imdodo, hamwe na hela ya ndiya yake.” Nayo katenda fana viya viyalongeligwe na Yosefu. 3Imitondo ng'hani ndugu wawo watogoleligwa kusegela na vihongwe wawo. 4Nawo viwawile hawanahita hatali kulawa muna dibululu, Yosefu kamulongela ndolezi wa kaye yake, “Himahima wasondelele na uhawapata uwagwile na uwauze, ‘Habali muliha yehile kwa yanogile? 5Vino habali mubawa nhungo malumu ya mwenevale wangu? Vino nhungo ino siyo ija iyong'wila na koisang'hanila kulagula? Ivo mutenda vihile!’ ”
6Ivo ndolezi viyawafikile, kawalongela mbuli izo izo. 7Wamulongela, “Habali mwenevale kolonga mbuli fana zino? Cheye wasang'hani wako hachidaha kusang'hana mbuli fanile ino bule. 8Lola mwenevale hela ichifikile muna imilomo ya malobota yetu chiibweleza kulawa muna iisi ya Kanaani. Lelo habali chibawe hela hebu zahabu kulawa muna ikaye ya mwenevale wako? 9Mwenevale, one imwe wetu yahawoneka kanayo, yakomigwe, na chondachisigale chizakuwa watumwa wako.”
10Kalonga, “Nitogola, mbali ija yasolile nhungo yangu muhala niiyo yondayawe mtumwa wangu na wondamusigale mwizailegeha.” 11Ivo wahulumusa hasi malobota yawo himahima maabaho chila munhu kafungula lobota jake. 12Ndolezi wa Yosefu kapekula malobota yose kwandusila da mkulu mbaka da mdodo na nhungo ipatika kwa imdodo n g'hani muna dilobota da Benyamini. 13Baho wadega mawalo yawo, wawapapiza mizigo vihongwe wawo na wabwela kuna dibululu.
14Yuda na ndugu zake viwezile kuna ikaye ya Yosefu, Yosefu kakala yang'hali umo. Ivo wamtumbalila mavindi kwa hishima. 15Yosefu kawauza, “Mutenda choni? Hamuvimanyile kuwa munhu fana niye nodaha kulagula?”
16Yuda kamwidika, “Mwenevale, chodaha kulonga choni?” Chodahaze kulema? “Chodahaze kuigombela? Mulungu kalagusa ubananzi wetu. Lelo cheye chose na ija yatoligwe na nhungo yako, chawatumwa wako.”
17Yosefu kalonga, “Bule! Niye sidaha kutenda ivo! Ija muhala yasolile nhungo yangu niiyo yondayawe mtumwa wangu. Mweye musigalile bweleni kwa tindiwalo kwa tati yenu.”
Yuda komulamba Benyamini
18Yuda kamkwenhukila Yosefu na kamulongela, “Mwenevale, nokulamba unilekelele niigombele. Sekeuniwonele ludoko, weye kulinga fana mfalume mwenyewo. 19Mwenevale, weye kuchiuza cheye, ‘Mweye muna tata hebu ndugu?’ 20Chidika, ‘Chinayo tata mulala na ndugu mdodo, kamweleka kuulala. Sekulu wake kadanganika, yeye muhala niiyo mwana yasigale kwa mami yake na tati yake ivo komulonda ng'hani.’ 21Mwenevale, kuchilagiliza cheye wasang'hani wako chimgale hano, muladi umuwone, 22na chikulongela kuwa mbwanga iyo hadaha kumuleka tati yake, one yahamuleka tati yake, tati yake kezadanganika. 23Maabaho kuchilongela wasang'hani wako, ‘One hamwizile na ndugu yenu imdodo sizamuhokelani bule.’
24“Vichibwelile ukaye kwa msang'hani wako tati yetu, chimulongela mbuli zako mwenevale. 25Maabaho tati yetu kachilongela chibwele kugula ndiya chidogo. 26Chimwidika, ‘Hachidaha kuhita, mbali hachihokeligwa mbaka chihite na mdodo wetu. One hezahita na cheye bule hachidaha kuhokiligwa na munhu ija.’ 27Tati yetu kachilongela, ‘Movimanya kuwa muke wangu Laheli kanyelekela wana waidi muhala wa chilume. 28Imwe kadanganika kamala. Na nilonga yodahika kalumizigwa na wang'onyo wa muna imbago. Kwaviya sinamuwona kaidi kwandusila viyasegele. 29One muhamsola ino iviya kulawa kumwangu yahapatigwa na yehile mwizanihumulusa kuzimu na kuno namulala nili na mnamilo.’
30“Ivo mwenevale, Nihambwelela tati yangu msang'hani wako bila ya mbwanga ino na kuno ugima wa tata wohuwila ugima wa mbwanga ino. 31Yahawona kahabule hamwe na cheye kezadanganika. Ivo cheye wasang'hani wako chizamtenda tati yetu yadanganike kwa mnamilo. 32Mbali niye niilava niwe mzamana wa mbwanga ino kwa tati yangu. ‘One simbweleze kumwako nizakuwa mbananzi iviya ubananzi wizakuwa kumwangu siku zose.’ 33Lelo weye mwenevale nokulamba niye msang'hani wako, nisigale niwe mtumwa wako kwa chimu cha mbwanga ino. Muleke yeye yabwele ukaye hamwe na ndugu zake. 34Nodahaze kubwela kwa tati yangu one mbwanga heli na niye? Sidaha kufunya umoyo kuwona mbuli zihile zondazimpate tati yangu.”
Currently Selected:
Mwanduso 44: Ching'hwele
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
