Mwanduso 45
45
Yosefu koilagusa kwa ndugu zake
1Baho Yosefu kapotwa kufunya umoyo haulongozi ha wasang'hani wake, kawalongela wose walawe kunze ya chiheleto. Ivo Yosefu kakala yaidumwe viyailaguse kwa ndugu zake. 2Kalila kwa dizi kulu mbaka Wamisili wamuhulika, mbaka wanhu wa kaye ya mfalume nawo wahulika. 3Maabaho Yosefu kawalongela ndugu zake, “Niye Yosefu. Vino tati yangu yang'hali mgima?” Mbali ndugu zake viwahulike ivo, wadumba mbaka hawadahile kwidika bule. 4Maabaho Yosefu kawalongela, “Nolamba, kwenhukeni habehi yangu.” Wakwenhuka, nayo kalonga, “Niye ndugu yenu Yosefu, yomunichuuzile kuhita Misili. 5Mbali lelo sekemwingilwe na luholozi na sekemuilaumu wenyewo kwaviya munichuuza. Mulungu kanituma kuulongozi wenu muladi nikombole ugima wa wanhu. 6Uno mwaka wekaidi wa nzala muna iisi, na ing'hali miyaka imwenga mitano, iyo wanhu hawezadaha kulima hebu kugobola. 7Mulungu kanigala kuulongozi wenu muladi niwatende mweye musigale muna iisi na kuwakombola kwa ukombola mkulu. 8Ivo siyo mweye munigalile hano, mbali Mulungu. Kanitenda niwe tata kwa mfalume. Niye mwimilizi wa kaye yose, niye mtawala wa isi yose ya Misili.
9“Ivo himahima mubwele kwa tata na mumulongele kuwa vino ivo viyolonga Yosefu mwanago, ‘Mulungu kanitenda niwe mtawala wa isi yose ya Misili, izo kumwangu bila kukalama. 10Kwizakala muna iisi ya Gosheni, kwizakuwa habehi na niye, weye na wanago na wazukulu zako na ng'hondolo wako na luti wako na ng'ombe wako na chila chinhu chiulinacho. 11Vondauwe Gosheni, nizakulola goya weye, ndugu zako hamwe na fugo yako muladi sekemupuwe chochose chomulonda, kwaviya ing'hali miyaka imwenga mitano ya nzala.’ ”
12Yosefu kagendelela kulonga, “Mweye wenyewo muwona kwa meso yenu na hata ndugu yangu Benyamini kaniwona kwa meso yake kuwa niye iyo mwenyewo Yosefu yonilonga na mweye. 13Na mweye mwizamulongela tati yangu hishima inili nayo hano Misili na mbuli zose zomuziwone, maabaho himahima mukamsole tati yangu na mumgale hano.”
14Maabaho Yosefu kamuhagatila Benyamini ndugu yake na kalila, Benyamini nayo kalila kuno waihagatila. 15Maabaho wogendelela kulila, Yosefu kawanonela ndugu zake na kalila. Viyakomeleze kutenda ivo, ndugu zake wandusa kulonga nayo.
16Mbuli izo vizifikile kwiimhongono ya mfalume, kuwa ndugu wa Yosefu weza, zimnogela mfalume na wakulu wake. 17Ivo mfalume kamulongela Yosefu, “Walongele ndugu zako wawapapize mizigo yawo vihongwe na wabwele kuna iisi ya Kanaani. 18Wamgale hano tati yawo na wanhu wawo. Niye nizaweng'ha hanhu hanogile ha isi ya Misili, nawo wezadeng'helela matunda yose ya isi ino. 19Iviya walongele kulawa Misili, wasole mituka ibululigwa kuwagalila wana wawo wadodo na wake zawo na iviya sekewaswele kumgala tati yawo. 20Walongele sekewagese vinhu vawo, kwaviya vinhu vinogile muna iisi ya Misili vizakuwa vawo.”
21Ivo wana wa Isilaili watenda fana viya viwalongeligwe. Yosefu kaweng'ha mituka fana viyalagilize mfalume na ndiya ya kuja mwiinzila. 22Kamwing'ha chila munhu viwalo va kusaula. Mbali kamwing'ha Benyamini vihande magana matatu va hela na viwalo vitano va kusaula. 23Maabaho vitumetume vino kamwing'ha tati yake kwa ichimu cha mwanza, vihongwe longo wowapapile vinhu vinogile kulawa Misili, vihongwe wake longo wowapapile ndiya, magate na ndiya zimwenga. 24Ivo Yosefu kailaga na ndugu zake. Viwakalile wosegela, Yosefu kawazuma kwa kulonga, “Sekemugombe mwiinzila.”
25Baho wasegela Misili na kubwela ukaye kwa tati yawo Yakobo mwiisi ya Kanaani. 26Wamulongela tati yawo, “Yosefu mgima!” Niiyo mtawala wa isi yose ya Misili! Baho tati yawo kengilwa na mkangagile, kwaviya hadahile bule kuzitogola mbuli zawo.
27Mbali viwamulongele Yakobo mbuli izo zose ziwalagilizigwe na Yosefu na viyawone mituka yoyagaliligwe na Yosefu kumsola, moyo wake udeng'helela ng'hani. 28Isilaili kalonga, “Lelo moyo wangu woibwanha, mwanangu Yosefu mgima. Nohita nikamuwone ning'hali sinadanganika.”
Currently Selected:
Mwanduso 45: Ching'hwele
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
