URA TIN AYRA 25
25
Njaf Abraham u caamba Ketura
1Abraham ɗum cara daŋga seɗ ana Ketura. 2Ndaɗ vuɗum Zimran, Yoksan, Medan, Madiyan, Isebak, Kua. 3Yoksan vuɗ Saba u Dedan. Goryoŋ Dedanna ni njaf suu Akurna, suu Letukŋa u suu Leumma. 4Goryoŋ Madiyanna ni Efa, Efer, Henok, Abida, Elda. Halaŋ ca ni goryoŋ Keturana.
5Abraham ɦal bege mamba halaŋ maŋ Isaak. 6Abraham ɦal tlena maŋ goryoŋ boyogom suu hiŋŋa ni hu li ma nam ka u iiri tam tuna, nam dikisi ha ki eg goromma Isaak ha ki ii ma u maɗiina vi mbas ndaɗta na.
Miɗna vi Abraham
7Gola ni basara vi Abraham kay ndaŋgara, nam li basara 175. 8Nam mbuɗ ki maa cocoo miɗni u furira, nam tuɗ taɓ u somoyom suu zulina. 9Goryom Isaak u Ismael pam hu zul goyra Makpelara hu senena vi Efron, ma goŋ Sohar ma Hetna, vok tasi u Mamre. 10Ni sene ma Abraham gusum ay ko goryoŋ Hetna ni li ma pi gi Abraham u caamba Sara huna.#Ura 23.3-16 11Ŋgoo miɗna vi Abraham mi Lona paɗ vunum ki kay Isaak. Nam cuki tok eg goloŋga yaɗ ana Lo ma wannara, Lahai Roi.
Njafna vi Ismael
12Gola ni njaf Ismael, goŋ Abraham ma Hagar ta Egiptera, mbaɓura vi Sara, vuɗumba. 13Gola ni sem goryoŋ Ismaelna u deeresiya, Nebayot ni gorom ma ŋgolna, Kedar, Adbeel, Mibsam. 14Misema, Duma, Massa, 15Hadad, Tema, Yetur, Nafik u Kedma. 16Ni sem goryoŋ Ismaelna irisi kaay u deeresi hu ziisiya, suu ŋgolo suu fokosina doogo yam mba' may. 17Gola ni basara vi Ismael kay ndaŋgara. Nam li basara 137 ni miɗa. Nam tuɗ taɓ u somoyom suu zulina. 18Goryom cuk zina ha Havila day ta ta Kur ta vok taɗ u mbassa Egiptera a tuɗ ha ii Akur na. Asi cuki ni vok tasi u gorsesina, li honira duk tasi tew tew.
YAKOB
Vuɗta vi Ezaw u Yakob
19Gola ni njafna vi Isaak ma goŋ Abrahamma. Abraham vuɗ Isaak. 20Hu li ma Isaak ɗum Rebeka ni basaɗam li ki dok-fiɗi. Ndaɗni goŋ Betuel ma Aramma hu mbassa Padan-Aram, ndaɗni wayaŋ Labanda. 21Isaak cen Yawe kay caamba kay ndaɗ ka vuɗɗi, Yawe humum cen mamba, caamba, Rebeka, hin vi wiina. 22Gor ŋgonira li honira huruɗu. Ndaɗ di ana, lini na ni an vi wiina herekŋi kay mege? Ndaɗ tuɗ joɓ Yawe. 23Yawe daɗ ana,
«Njaf suuna ka hurukŋi mba',
deeresi hin ɓorow ki zeɗ zeɗ.
Njaf sa ma dew hin li su ma hiŋŋa,
ma ŋgolna hin sun ma goona.»#Rom. 9.12
24Buu ma ndaɗ a vuɗta ndak ndakŋi, gor ŋgonira ay huruɗ mba'. 25Ma kal ay ki jewna tlawi, tam tlimiɗ cocoo, asi tinim sem ana Ezaw. 26Ma mbana kal ay ki ni u diŋ diliŋ wayamma, Ezaw, vii komu. Asi tinim sem ana Yakob. Hu li ma asi vuɗna ni Isaak basaɗam li ki dok-karkiya.
Ezaw gus ŋgol mamba kiyo
27Gor asina wul ki ŋgolora wulni, Ezaw mbuɗ ni sa ma ndonda, ma poy bagina, Yakob ni sa ma ɗilina kagi vo na en. 28Isaak minni Ezaw, kay nam kom tliwna um cocoo. Rebeka minni Yakob may.
29Fali taa dew ni Yakob li tina, Ezaw ay ŋgoo loɓi coco may. 30Ezaw cen Yakob ana, «Ҥan ti ma koŋ tlaw wanna ay nde an tiya kay an ki loɓi cocoo.» Kay ndaɗta asi tin sem Ezaw ana Edom, ni ana tlawi. 31Yakob dam ana, «Gusun ŋgol maŋga ki karam konu.» 32Ezaw hoŋom dira ana, «An laɓ laɓi ɗow may ni an a li me u ŋgolge.» 33Yakob dam ana, «Suu taŋ ki tuwa.» Nam hin suu may. Hin gus ŋgol mamba ki ko Yakob.#Heb. 12.16 34Yakob ɦal funa maŋ Ezaw u mbalara tlaw ndaɗta may, nam ziya, ciya, hin col kolo tuɗa, ni Ezaw hin ŋgol mamba ki ni ko ndaɗta na.
Currently Selected:
URA TIN AYRA 25: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
