Mwanzo 30
30
Rakeli aapongola
1Rakeli paawonire kuwa aari kupata kupongola na Yankubu, akanza kunririra wivu nduye na akimwambira nlumake javi: “Nlumangu! Nimitise sambi niwapate wana, nikufwa kinu nlumangu!” 2Yankubu ire akikimiyana naye nkawake Rakeli pakulu futi, akijibu akamba: “Kú! Omi niwa Mwenyezimungu? Iye ndi atenza kwa kuwa usipongore!” 3Rakeli akimwambira: “Basi, omi núkupa ntwana wangu Bila untende kuwa nkawako. Na wana wausaka kupongola naye, awapongorera nnyumba mwangu omi. Basi kwa javyo, nomi wakuwa wanangu novyo.” 4Kwa javire, Rakeli nlumake akimpa Bila kuwa nkawake. Yankubu akilala naye 5na Bila ire akimita akimpongola mwana nlume. 6Rakeli ire akisema javi: “Mwenyezimungu kanitendera haki yangu! Kweli-kwelini, kanitikizira caninlebele, kanipa mwana mmoja.” Ntamana mwana ire kamwita zina ra Dani#30:6 Zina ra Dani kiebraniya mana ake “kutenda haki”.. 7Bila, njakazi wa Rakeli, akimita tena na Yankubu na akimpongola tena mwana mwengine nlume. 8Rakeli akisema akamba: “Wé! Utilawírira ushinda nkulu omi na nduyangu, fala omi níkidiri kunshinda.” Mwana wampongore Bila ire, kamwita zina ra Naftali#30:8 Zina ra Naftali kiebraniya mana ake “ushinda”. .
9Leya pawonire kuwa Bila aaludira tena kupongola, kanlavya Zilpa ntwana wake akimpa Yankubu antende kuwa nkawake ntoto. 10Zilpa, ntwana wa Leya, akipongola naye Yankubu mwana mmoja nlume, 11na Leya akisema akamba: “Ndi barakani-zi.” Ntamana mwana ire akimpa zina ra Gadi#30:11 Zina ra Gadi kiebraniya mana ake “baraka”.. 12Ikisa, Zilpa njakazi wa Leya akimpongola tena mwana mwengine na Yankubu. 13Leya akisema akamba: “Ndi rahani-yi! Wanawaka wengine wakuja kunita mwanamuka wa raha.” Ntamana mwana ire akimpa zina ra Asheri#30:13 Zina ra Asheri kiebraniya mana ake “raha”..
14Kwa suku moja, wakati wa mavuno a tirigu, Rubeni noire ire akilawa akúka masamba. Nokurekure akisingana visumo vimoja vya kwitiwa matunguja#30:14 Visumo vya kwitiwa matunguja (Kijojo) ndi visumo vimoja wanu vyawakubali kurya wanu kúwapa kina kilume au kamba mwanamuka nata vímwisusira kupongola., akilokota akinsukurira Leya mamaye. Sambi Rakeli akinlebela Leya: “Tafadali, nimere matunguja asukure mwanawo-yo!” 15Fala Leya akijibu: “Úwona kuwa aba kunipokera nlumangu na mpaka sambi-pa úsaka unipokere novyo matunguja anisukúrire mwanangu-ya?” Rakeli akijibu: “Kwa kukakanya na matunguja-yo, lala naye usiku wa rero-wu.” 16Wakati wa jironi Yankubu paakiludi masamba, Leya akinkingamira akisimanana naye akimwambira: “Rero uje ulare nomi, kwa kuwa Rakeli nimripa matunguja ânisukurire mwanangu, tikakanya.” Na kweli-kwelini noure usiku ure Yankubu akilala naye. 17Mwenyezimungu kasikira vyaalébele Leya, akimita akipongola na Yankubu tena upya mwana wa tanu. 18Leya akisema akamba: “Mwenyezimungu kaniripa kwa kuntwala ntwana wangu kumpa nlumangu kuntenda nkawake.” Ntamana mwana ire akimpa zina ra Isakari#30:18 Zina ra Isakari kiebraniya mana ake “Zawadi”..
19Bandi ya vire, Leya akiludira tena kwimita, akimpongorera Yankubu mwana nlume wa sita. 20Ikisa akamba: “Mwenyezimungu kanipa omi-pa zawadi ngema. Sambi nlumangu ánitafiti sana kwa kuwa nipongola naye wana sita.” Ntamana mwana ire akimwita zina ra Zabuloni#30:20 Zina ra Zabuloni kiebraniya mana ake “kupenda sana”.. 21Mwinsho akimpongola tena mwana muka, akimwita Dina.
22Noparepare Mwenyezimungu kankumbukira Rakeli, caalebele cire, neye akimwisusira kupongola. 23Kwa javyo, akimita akimpongola mwana nlume, akisema akamba: “Mola wetu katenda kasidi ipate nisiriwonere haya kwa sababu ya kutowa kupongola.” 24Akamba tena: “Mola wetu aasokerere kunipa tena mwana mwengine!” Ntamana mwana ire akimpa zina ra Yusufu#30:24 Zina ra Yusufu kiebraniya mana ake “kongeza”..
Yankubu asikizana na Labani kuhusu mifuwo
25Yankubu, bandi ya Rakeli kumpongola Yusufu, akimwambira Labani ire javi: “Nase nuke kwetu kanipongóriwe. 26Nase niwasukure waka wangu kwa kuwa ndi waniwakórere kazi, pamoja na wanangu. Nowe ukwijiwa sana-sana wakati mwengapi wanukukórere kazi.” 27Akilawa Labani akinjibu: “Tafadali nisikirize! Omi nilauza sengere yangu, nijiwa kuwa Mola wetu kanijanliya kwa sababu yako nowe. 28Basi nambire, nshahara wako úsaka nukuripe kadirini?” 29Yankubu akinjibu: “Umwe mukwijiwa sana-sana namuma yanukukorereni kazi na vyanisungire sana mifuwo yenu. 30Kábula saninaja omi íkiwa mifuwo aba futi, fala bandi yakuja omi, Mola wetu kajanliya mifuwo yenu-yi yengézeka kwa kazi yanikorire. Sambi omi rini panisaka kwanza kukola kazi ya kuwafãi wajamaa zangu?” 31Basi Labani akindairi: “Úsaka nukupe kadirini?” Yankubu neye akijibu: “Sisaka kinu, auna ca kuniripa. Niwa tayari tena kukusungira mifuwo yako, ikiwa úkubali kunitendera kinu kimoja canisaka kukulebela, kamba javi: 32Rero nipe nafasi nipite kati ya mifuwo yako piya niwatóndore niwature pambari wa kuwa na madonongo na mabaka-mabaka, kila kondoo mwerufi onse na kila mbuzi wa kuwa na madonongo na mabaka-mabaka. Ewa manyama-wa piya wakuwa wangu omi. 33Kwa javyo makeshamungu na ntondoo ndi pavisaka kuwa sana, kolota uwaminifu wangu, kamba úsaka kwijiwa faida yanipatire. Mbuzi piya sazina madonongo wala mabaka na makondoo sawari werufi alama ya kuwa ewo nukwíwira.” 34Labani akijibu: “Aye nikubali viwe novyo.”
35Fala kwa noire suku ire Labani nkati ya mifuwo yake ire piya, akilavya mirumbi ya miraba na ya mabaka-mabaka pamoja na mbuzi nyika piya za mabaka-mabaka na madonongo (kila nyama wa kuwa na baka relupa onse), pamoja na makondoo werufi piya. Piya ware akiwalavya akiwagabizi wanawe wawasunge. 36Basi, akitumiza ilaviwe noire mifuwo ire itanusiriwe baidi na Yankubu kitambo ca kwenenda luwansi muda wa suku natu munjira. Na Yankubu akibaki novirevire akisunga mifuwo ya Labani ibakire ire.
37Basi Yankubu ire akitwala vitambi viwisi vya nveveru, vya nalala na vya nroga, akiwaula aba upande-upande mapapatu a kunja akasa welupa wa nkati ure. 38Nozire omo zaatengeze zire akúka akisomeka mbere ya mirumbi pepi na malusavya a maji awákinyweranga maji mifuwo ire. Konta mirumbi paíkuka ikínywa maji ndi paíkipeperanga, 39mirumbi ire ikipepera javire mbere ya omo zire, mifuwo ire ikiwapongola wana wa miraba, wa madonongo au wa mabaka-mabaka. 40Micamba ya makondoo, Yankubu akiwatondola akiwatula upande mwengine, fala wabakire ware akiwasanganya na wengine wa mabaka-mabaka au werufi kumifuwo ya Labani. Kwa javire mpaka akifikirira kupata mifuwo yake-yakeni, bila kusanganya na ya Labani. 41Kwasa javyo, pawákipeperana manyama wa nguvu ware, Yankubu ákiludira kusomeka omo zire mbere yawo, pepi ya malusavya mwawakinywera maji mure, wapate kupeperana mbere ya omo zire. 42Fala manyama sawana nguvu ware omo zire aákiwaturira mbere. Javire kwa noire namuna ire sawana nguvu ware wákigwirira kuwa wa Labani na wa nguvu ware wákigwirira kuwa wa Yankubu. 43Basi Yankubu kwa kila mara kazidi kutajiri, mpaka kafikirira kupata mifuwo mingi yawenye. Na kawapata novyo watwana na wajakazi, ngamiya pamoja na maburu.
Currently Selected:
Mwanzo 30: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
