Mwanzo 32
32
Yankubu atengeza kusimanana na Ezau
1Basi Yankubu akenderekezera safari yake, mpaka mbere wakimwisukira wakinsingana malaika wa Mwenyezimungu mwanyewe. 2Yankubu pawawonire, akamba: “Epa ndi mangisha a makava wa Mwenyezimungu!” Ndi ntamana mahala pare akita zina ra Mahanaimu.
3Yankubu akiwalavya watumwa akiwalongoza ka Ezau nduye kaya ya Seiri, inti ya Edomu 4na akiwalaiza habari kamba ezi: “Mukamwambire Mwenye wangu Ezau javi: ‘Nntumisi wako Yankubu kaamba javi: Omi níkikalanga na Labani níkiwa myeni, ndi kanikawísiwe noko mpaka sambi-pa. 5Nipata ng'ombe, maburu, makondoo na watwana waka na walume. Nankutumiza kukwambirani umwe mwenye wangu kuwa omi niwankuja, nirindira kunipokerera kwa heri.’ ”
6Watumwa ware pawaludire ka Ezau kure, wakija wakimwambira Yankubu javi: “Tûka ka Ezau nyenye yenu. Iye kawankuja nokuno na wanu miya nne muwonane.” 7Basi Yankubu ukimpata wofi pakulu futi. Kwa kuwa kafazaika, wanu waákiwa nawo ware kawawanya makundi mawiri na makondoo, ng'ombe na ngamiya ware piya, 8kwa kuwa kawaza javi: “Ikiwa Ezau kaja kutenda vita katawala kundi rimoja basi, kundi rengine rinusurika.”
9Ikisa kalebela duwa kaamba: “Uwe Mola wetu wakutukuze Iburahima babu omi, Mola wetu wantukuze Izaki wawa omi! Yarabi Mola wangu, uwe ndi unámbire kuwa ludira kwenu kaupongoriwe na nukujanliya! 10Sijuzi eya meema-ya piya aunipere-ya, ila kwa sababu ya uwaminifu wako. Panîlokire muto wa Yordani, siwere na kinu, ila nîsukula nkwaju wangu tu basi, falakini sambi nanawo makundi mawiri-ya. 11Tafadali, ninusuru mmakono mwa nyenye Ezau, konta nimopa pakulu kuja kuniulaya omi pamoja na waka na wana-wa. 12Uwe ndi ûnipere tamaa ukamba: ‘Núkujanliya pakulu na núkupa ujukulu mwingi kamba nsanga wa mwani sauwalangika.’ ”
13Basi noure usiku ure Yankubu akilala nopare. Ikisa, akitengeza vyawere nawo vire amperekere Ezau nyenyeye: 14mbuzi nyika miyateni na mirumbi yawo shirini, makondoo miyateni na mirumbi yawo shirini, 15ngamiya nyika talatini, wa kõwesa pamoja na wana wawo, ng'ombe arubaini na mirumbi yawo kumi, maburu shirini na mirumbi yawo kumi. 16Kwa kila nfuwo akingabizi ntumisi wake mmoja akiwambira akamba: “Longorerani, mwasirire atuwa kila nfuwo na mwenziwe.” 17Alongorere ire akinlanga javi: “Ikiwa kusimana na nyenye Ezau, akukudairi, ‘Uwe kuwa ntumisi wa nani?’, 18njibu javi: ‘Eya mali-ya a ntumisi wako Yankubu. Eyi ndi zawadi yaapereke ka mwenye wake Ezau, na iye mwanyewe kankuja kawankutifulata nyuma yetu.’ ” 19Akimpa noire ngano ire alongorere, na anfulate, na kila mmoja wângabizire mifuwo ire akisema: “Piya-mwe mukisimana na Ezau, mumwambire usemi mmoja nowu. 20Na muhurumishe kuwa ntumisi wako Yankubu kankuja, kawa karibu nopapa kankutifulata.” Yankubu katenda vire konta kâwaza javi: “Nikanza kumperekera zawadi-zi kwanza, nípata kumpoza ipate nikuka nikiwonana naye uso ka wajii pengine, ánipokerera vyema.” 21Kwa javyo nyama za zawadi zire kalongoza na iye mwanyewe kwa noure usiku ure kâbaki pamangisha nopare.
22Usiku-usiku akilamuka, akiwasukula waka wake wó-wawiri, watumisi wake wawiri na wanawe kumi na mmoja, akiloka muto wa Yaboki. 23Bandi ya kuwapitisa muto wa kukakama maji ure, akipitisa piya vinu vyawere navyo. 24Yankubu kabaki nyuma yeka yake tu basi. Akikola kumenyana na mwananlume mmoja sejiwikana mpaka alufajiri. 25Pawene kuwa aari kunkidiri, akimpanja na soku mwarilungiwe kongolo ra mpaja, kongolo rikisuna. Epo iri angari akimenyana naye ankamate, kuno akitumbela novire na mulu wake wa kupombonyoka. 26Mwananlume ire akimwambira Yankubu javi: “Nase nuke vyangu epa sambi kuca.” Akinjibu: “Sukwasa kuka vyako bila kunibariki kwanza.” 27Ikisa akindairi: “Zina rako nani?” Akijibu: “Yankubu.” 28Akimwambira akamba: “Mwanzo wa sambi-pa mpaka mbere, zina rako awitiwa tena Yankubu#32:28a Mana ake “Nlongo”., ila Iziraeli#32:28b “Iziraeli” mana ake “Amenyane na Mwenyezimungu”., kwa kuwa kumenyana naye Mola wetu pamoja na wanadamu, epo kutema nfululu.” 29Yankubu akindairi: “Tafadali uwe ukwitiwa mwaja?” Fala iye akijibu: “Cukuyeri kinani kwijiwa zina rangu?” Noparepare akimpa baraka. 30Basi Yankubu mahala pare akita Paniyeli#32:30 Paniyeli mana ake uso wa Mola wetu. na akisema akamba: “Ka ukweli niwona uso wa Mola wetu, fala kuwa novyo sivyo ninusurika hai!” 31Paakilawa Paniyeli, na juwa rikilawa. Yankubu akikola kwenenda akitumbela muulu wake ure. 32Ntamana mpaka rero-vi wanu wa Iziraeli awarya nzipe wa nnyonga ukola kiuno, kwa kuwa ndi nzipe walumiziwe Yankubu na mwananlume ire.
Currently Selected:
Mwanzo 32: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
