Mwanzo 34
34
WaShekemu waulayiwa kwa sababu ya Dina
1Kwa suku moja, Dina mwana wa Yankubu waâpongore naye Leya, kalawa pamangisha akúka kuwawona wanawaka wa mwanakaya siyo. 2Shekemu ákiwa mwana wa Hamori, muHivi, fumu wa noyo kaya-yo. Shekemu, pammónire Dina akinkola akilala naye makunje. 3Fala sambi, ikisa akifika kwajibiwa naye mwari ire, akimpenda akanza kuntongoza. 4Basi akúka akimwambira Hamori wawaye akamba: “Tafadali baba, onani kamba múnilebelela mwana ire ninlombe.”
5Yankubu akipata habari kuwa Dina, mwanawe kaâribiwa harusi na Shekemu, falakini kwa kuwa wanawe wákiwa kununguri kurisa mifuwo, akinyamala mpaka wakiludi. 6Hamori, wawaye Shekemu, akilawa akúka ka Yankubu wakawonane wasikizane. 7Wana wa Yankubu ware pawaludire kununguri, na kusikira habari zire, wawona aibu na wakimiwa pakulu futi. Vyaatendire Shekemu kumwaribu mwana wa Yankubu, iwa tukano rikulu na avikajibisa inti ya Iziraeli.
8Falakini Hamori akisowera nawo akiwambira javi: “Mwanangu Shekemu akwajibiwa pakulu sana na mwanenu mwari-yu. Tafadali, mpeni anlombe! 9Tilombane watupu: ofwe tiwalombe wanenu na umwe muwalombe wanetu. 10Kwa javyo, umwe-po mwikare na ofwe. Eyi inti-yi hapana tafauti, ikalani, mutende biyashara na mupate uweru wenu.” 11Shekemu akinlebela wawaye Dina pamoja na walumbuze ware javi: “Tafadali kubalini! Camusaka kunilebela conse niwa tayari kukupani. 12Nambireni vyamusaka vyonse mahari, omi nílavya. Niya yangu muniloze mwari-yu tu basi!”
13Wana wa Yankubu wakisikizana kumwinika Hamori na Shekemu (kwa kuwa Shekemu kândanganya nlumbwawo Dina) 14na wakinjibu wakamba javi: “Kulombiwa mwanetu na mwananlume sengire kumbi, eco kinu-co ofwe atitenda. Kwetu ofwe kutenda kinu kamba javyo aibu. 15Ila kwa kuwa tikubaliyane, ibidi iwepo kauli ya kuwa javi: Kwanza umwe-po mukubali wanawalume piya wataiwe itani, kamba vyatitendire ofwe. 16Kwa javyo ndi patisaka kukulozani na umwe novyo kutiloza wanenu. Sambi, javyo ndi patisaka kuinshi pamoja namwe na kulungana ujamaa. 17Falakini kamba amusakire kukubali mawoni etu a kutaiwa itani, ikiwa ndi javyo, ofwe tikuka vyetu pamoja na nlumbwetu.”
18Ure usowezi ure, Hamori pamoja na Shekemu mwanawe wakubali. 19Na bila kupoteza wakati, Shekemu ire akanza kutafiti, kwa kuwa ákajibiwa pakulu sana na mwana wa Yankubu. Visitoshe, Shekemu ákiinshimiwa pakulu sana na jamaa zake. 20Ndi ntamana Hamori pamoja na Shekemu mwanawe, wakúka wakipakanira na wakulungwa wawo pakwingirira kaya ire, wakiwambira javi: 21“Ewa wanu-wa waja kwa niya ya kuwa tikolane urafiki. Nkaya mwetu-mu waseni wekare, watende biyashara zawo, kwa sababu tiwa nawo inti ya kutosha kwikala ofwe newo piya. Tíwalomba wana wawo, newo novyo wáwalomba wanetu. 22Ewo wákubali kwikala nofwe nkaya-mu, tilungane ujamaa. Falakini kwa kusikizana kinu kimoja: ofwe papitire mwananlume ponse ataiwe itani, kamba vyawengire ewo. 23Mwaja? Amuwona kuwa mifuwo yawo papitire, manyama awo piya akuwa mali etu? Basi, tikubaliyane nawo, ipate tikare nawo pamoja.” 24Basi, piya wanawalume wa nguvu wa kaya ire wakikubali mawoni a Hamori na Shekemu ire. Ikisa, wanawalume wa nguvu ware piya wakitaiwa itani.
25Bandi ya suku natu, wakati wanawalume wa Shekemu wawasokere-sokerenge na malwazo, Ansumani na Lawi, walumbuze Dina, kwa kila mmoja akikola jambiya yake mmakono, wakingira paragidiga nkaya mure. Nomuremure wakiwolaya wanawalume ware piya. 26Wakiwolaya novyo na jambiya Hamori pamoja na mwanawe Shekemu. Wakintwala Dina nnyumba ya Shekemu, wakilawa wakúka vyawo. 27Wana wengine wa Yankubu wakingira nkaya, wakipita mwawafwi ware na wakitwala-twalanga vinu nkaya mure. Watenda javire kwa sababu ya kwaribiwa nlumbwawo. 28Wawatwala makondoo, ng'ombe, maburu, na kila kinu ca faida conse, ciwere nkaya na masamba watwala-twalanga piya. 29Watwala mali zawo piya, na piya vyawawere navyo mmanyumba mwawo, na wawatwala wasimana pamoja na wanawaka kamba wafungwa.
30Basi Yankubu, wakiwambira Ansumani na Lawi javi: “Wanangu! Munisalamurira umani. Vyamutendire-vyo wenye inti, waKanaa na waPerezi mpaka sambi wakwanza kunilumbata. Onani! Wanu waniri nawo omi aba futi. Ikiwa wakusanyika piya kutenda vita nomi, wánaribu pamoja na jamaa piya!” 31Ewo wakinjibu: “Avi sambi, iwapo haki ya nlumbwetu kutendiwa ureba?”
Currently Selected:
Mwanzo 34: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
