Mwanzo 40
40
Yusufu akwereza mana a nloto
1Upita wakati wa suku nyingi aba, iwa kamba Nfalume wa Miswiri wakolakazi wake wawiri wankosera. Nkolakazi mmoja ákiwa nkulungwa wa maudumu wa piya vinywaji vya nfalume ire, na iye ndi agabiziwe kumudumu nfalume, mwengine ire ákiwa nkulungwa wa wepiki wa vinu vya kunowa vya nfalume. 2Nfalume ire kakimiyana nawo wó wawiri, 3akamuru watayiwe nkalaboshu íkiwa kunyumba ya nakola wa Firyauna, kalaboshu noyo yákiwa Yusufu. 4Wekala suku nyingi zawenye, sambi nakola wa nfalume akimpa Yusufu kazi ya kuwasunga Maperezu na iye akikubali kutenda kazi kamba ire. 5Pawekare nkalaboshu mure, nkulungwa wa kinywaji na ire nkulungwa wa wepiki, suku moja usiku walota, kila mmoja na nloto wake, na kila nloto úkiwa na mana ake, fala ware walotire awejiwe cisema kinani nanga kudanizira. 6Pakucere subuu Yusufu kaja kuwawona, kawasingana wauzunika, hatari! 7Yusufu kawadairi: “Namunani? Mbena muuzunika rero kinani cipitire?” 8Ewo wakijibu wakamba: “Ofwe rero kila mmoja kalota nloto wake, fala atíjiwirira mana ake. Na emu nkalaboshu-mu aapo munu mwijiwifu wakutambira mana a miloto yetu, ntamana tíuzunika.” Yusufu akamba: “Mola si awapa wanu ujuzi wakwereza nloto mana ake? Nambireni vyamulotire-vyo.”
9Ire nkulungwa wa unywaji akereza nloto wake akamba: 10“Omi nilota njambalãu uri mbere yangu! Fala uri na vitambi vitatu, vikanza kulawa maluwa, vikipa visumo, vikitokota sana-sana. 11Na kopo ya Firyauna nisukure mmakono mwangu-mu, nikitwala jambalãu ure nikiminyira nkopo ya Firyauna kamba munu vyaaminya kusaka kutenda vinyu, nikimpa nfalume Firyauna javi mmakono mwake.” 12Yusufu akimwambira javi: “Nloto wako mana ake ndi javi: Evyo vitambi vitatu mana ake suku natu. 13Epa muda wa suku natu, nfalume álamusa kiswa cako, úfunguriwa na úludira kazi yako ya ukulungwa wa unywaji. Ukuka kumudumu Firyauna ukimpa kirevi cake nkopo akínywa kamba mida. 14Falakini, tafadali vinu-vi vikuka vikukwenendera sana usuke kuniriwala, wakati wausaka kulawa nkalaboshu-mu ukanikumbukire. Nakisa tena nikulaizira kinu cengine: pauka kusowera na nfalume umwambire habari zangu nipate nomi kulaviwa nkalaboshu-mu. 15Kábula ngawona, nitiziwa inti ya Maebraniya niperekiwa Miswiri kuno. Ikisa, tangu kuja kwangu sinamba kukosa kinu ca kujuzi kutaiwa nkalaboshu.”
16Sambi ire nkulungwa wa wepiki, wakati waasikire mana meema a nloto wa mwenziwe na iye zikimpata nguvu za kumwereza Yusufu nloto wake, akamba: “Omi nilota mabasiya matatu a mikate nisukure pakiswa. 17Basiya ríkiwa julu nkati múkiwa kila namuna ya vyakurya vyepikíriwe nfalume. Basi zikija nyuni zikikola kudodola vyakurya vire!” 18Yusufu akisema javi akamba: “Mamá! Mana a nloto wako ásema javi: Mabasiya matatu ndi muda wa suku natu. 19Muda wa suku natu, Firyauna álavya ámuri unyongiwe, nakisa mwiri wako ukwángikiwa julu ya muti na mwiri wako zikuja nyuni zikigovola.”
20Zipita suku mbiri, ya tatu nfalume akitenda mwaka. Suku noire, akipikisa kurya kwingi akiweta wakolakazi wake piya, na akamuru wakaláviwe nkulungwa wa kinywaji na nkulungwa wa wepiki. 21Kweli-kwelini vikuna novire kamba vyaambire Yusufu: Nfalume Firyauna kanludisira nkulungwa wa vinywaji kazi yake, na kamuru nkulungwa wa wepiki anyongiwe nopare na wenziwe wakimmona. 22Falakini ire nkulungwa wa wakanda mikate, akinfungangira mmuti, sawa-sawa Yusufu vyafafanure miloto yawo. 23Falakini mwinsho ya piya vire, nkulungwa wa vinywaji wa nfalume kanriwala riwaaa ankumbukire tena Yusufu ire!
Currently Selected:
Mwanzo 40: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
