Mwanzo 50
50
1Basi Yusufu akimwinamira wawaye akanza kurira, akimpa beju. 2Yusufu akiwatuma watatibu wake, wantingindire wawaye tiba ya balsamu ipate asivunde. Watatibu wakitwala tiba wakintingindira Iziraeli. 3Pazifikire suku arubaini zikitimu suku zake za kupakiwa balsamu, wanu wa Miswiri wakikala matanga mpaka zikitimu suku sabini.
4Pazipitire suku za matanga, Yusufu akisowera na mawaziri wa Firyauna akamba: “Kamba munipenda, fadari muke mukaseme ka Firyauna, kuwa Yusufu kaamba javi: ‘Wawa kânilapisa kâmba javi: 5“Omi epa niwa karibu ya kufwa, fala nikifwa ukánizike kaburi rangu ranisimbire inti ya Kanaa.” ’ Basi tafadali núkulebela unipe riusa nuke sambi-pa nikanzike wawa nikaludi.” 6Firyauna akinjibu: “Uka ukanzike wawayo kamba vyaakulapise.”
7Basi Yusufu pokire kunzika wawaye inti ya Kanaa, kôka na mawaziri wa Firyauna pamoja na wakulungwa wa ufalume na wakulungwa piya wa inti ya Miswiri, piya wôka kuzika. 8Rikilawa piya rikolo ra Yusufu, wanduze, na jamaa zake piya inti ya Gosheni, wakibaki wana, makondoo pamoja na ng'ombe zawo basi. 9Piya ware wakilawa naye pamoja, wakiwapanda makavalu wawo, wengine wakingira mmaringisho ukiwa nkonjo nkulu wawenye. 10Wakati wawafikire Gorem-Aladi, inti iri ng'ambu ya muto wa Yordani, Yusufu akitenda jambo ra matanga makulu a wawaye suku saba. 11Na wanu piya wakikala inti ya Kanaa ware, wakati wawawonire jambo ra matanga rire, wasema waamba: “Wé! Eya ndi matanga makulu a wanu wa Miswiri.” Kwa javyo, mahala pare pari ng'ambu ya muto wa Yordani, wákita Abel-Miswiri. 12Wana wa Yankubu ware wakitenda piya sawa-sawa kamba vyawalaíziwe na wawa yawo Yankubu. 13Wakinsukula wawa yawo wakuka naye mpaka Kanaa, wakinzika njonga. Paluwanja ra Makpela, mahala pauzire Iburahima pamoja na masamba mmakono mwa Efroni muHiti, mbere ya Mamre, kuwa pawe mahala pake pakuzíkiwa.
14Yusufu, na kwisa kuzika, akiludira Miswiri iye pamoja na wanduze na wanu piya wokire nawo kunzika ware.
Yusufu awalavya shaka wanduze
15Fala sambi, wanduze Yusufu wakati waiwere kuwa wawa yawo kafwa, wasema waamba: “Yusufu ájuzi kukimiwa! Falakini aarirípira mabaya atinténdire?” 16Basi, wakitumiza kumwambira Yusufu wakamba javi: “Wawayo kâlaiza sanamba kufwa. Kâamba javi: 17‘Nikulebela uwaswamii wanduzo makosa awo na dambi zawo, konta wakutenda ubaya.’ Basi, tafadali tiswamii makosa atikosire, konta nofwe tímwabudu Mwenyezimungu waakimwabudu wawayo.” Yusufu wakati wawamwambire javire, akirinamira kurira. 18Ikisa tena, wakija tena wanduze ware wakisujudi wakinkola maulu wakisema javi: “Ona! Ofwe tikubali kuwa watwana wako!” 19Yusufu akiwambira: “Namunani? Mbana munopa? Omi niwa Mwenyezimungu? Musinope! 20Ndi kweli múnilangela munitende mabaya, fala Mwenyezimungu kapindula katenda meema, ipate vikune evi piya-vi vyamuri kuwona-vi. Mwenyezimungu katenda piya-vi, apate kusunga mainsha a wanu wengi kamba vyatiri kuwona rero. 21Basi musope kinu; omi nukurisani umwe piya pamoja na wanenu.” Wakati wambire javire, wanduze uwesa wofi konta kasowera nawo vyema kamba vyawakisaka.
Kufwa ka Yusufu
22Yusufu akizidi kwikala inti ya Miswiri, iye na jamaa zake, akiínshi myaka miya na kumi. 23Yusufu kawai kuwona ujukulu wa mwanawe Efraimu, uzazi wa tatu. Neye kawawona wana wa Makiri, mwana wa Manase. Piya pawapongóriwe, Yusufu kawapokérera kamba wanawe. 24Ikisa Yusufu akiwambira wanduze: “Omi sambi niwa karibu ya kufwa. Fala Mwenyezimungu akuja kukunang'anizani akulavyani eyi inti-yi kweli-kwelini, akuperekani inti yaalapire kuwapa Iburahima, Izaki na Yankubu.” 25Yusufu akiwalapisa wana wa Iziraeli akisema: “Wakati waasaka kuja kukwamuruni Mola, mulapire kuwa mukuka músukula makongolo angu.” 26Basi, Yusufu akifwa. Iye ákiwa nawo umuri wa myaka miya na kumi. Mwiri wake piya wakimpaka balsamu, na kwisa wakintwala wakintaya njaneza Miswiri nokure.
Currently Selected:
Mwanzo 50: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
