Mwanzo 9
9
Mwenyezimungu apatana na Nnu
1Mwanyewe Mwenyezimungu akimpa baraka Nnu pamoja na wanawe, akiwambira: “Mukinduke sana-sana, lázima muwe nawo wana wengi mongezeke na mwijare ulumwengu piya. 2Ona! Piya manyama, nyuni, na wadudu wakurikweta pansi, na inswi piya wákopani, umwe-po mukuwa nawo mamulaka julu yawo. 3Nukupani nafasi ya kurya piya kila namuna ya manyama pamoja na kila mbeyu ya cakurya. 4Ila sambi, musirye nyama iri na damu! Kwa sababu, damu ndi mainsha a kiyumbe. 5Munu asaka kuwa onse akimulaya mwanadamu mwenziwe nomi níntenda hukumu yake, na ndudu mwenye kumulaya munu onse, nomi níntenda hukumu yake, nikumpa neye hukumu yake yakufwa. 6Munu mwenyé kunlavya mainsha mwanadamu mwenziwe, neye lázima álaviwa mainsha na mwanadamu mwenziwe, kwa sababu nimumba mwanadamu kwa wajii yangu Omi Mwanyewe. 7Falakini, umwe mújuzi mukinduke sana-sana, muwe nawo wana wengi, muzidi kongezeka piya ulumwengu.”
8Nakisa Mwenyezimungu kamwámbira Nnu na wanawe kaamba: 9“Onani! Nísaka kutula miyadi ya kupatana Omi na uwe, pamoja na ujukulu wako, 10na piya viyumbe hai viri pamoja na uwe, nyuni, manyama wa kufuwiwa na wadudu wa nnundu, kila nyama alawire pamoja na uwe nsafina. 11Nísaka kutula miyadi ya kupatana namwe. Mwanzo wa sambi-pa mwenye mainsha aafwa tena kwa mwanalukaya wa kuzidi kamba eyo, ulumwengu awaribika tena kwa sababu ya mwanalukaya.” 12Mwenyezimungu kasema kaamba: “Omi nitula kipiji cangu mmawingu. Eyo ndi alama ya miyadi ya kupatana kwetu omi nomwe na kila wenye mainsha wari pamoja nowe. Miyadi ya kupatana ya faida ka piya tarehe zambere zija-zo. 13Basi eci kipiji, ndi alama ya miyadi ya kupatana kwangu na ulumwengu. 14Omi daima wakati piya wanifinika bingu na mawingu, cikiwoneka kipiji, 15níkumbukira miyadi ya kupatana kwangu Omi nomwe na manyama piya. Wala nvula ya mwanalukaya ainya tena kuwaribu wenye mainsha. 16Wakati waciwa kipiji mmawingu, niwona na níkumbukira miyadi ya kupatana kwetu sákuna mwinsho, Omi na piya viyumbe viri hai vya kila namuna mulumwengu.” 17Basi sambi, Mwenyezimungu akimwambira Nnu akamba: “Eyo ndi alama ya miyadi ya kupatana kwetu ya niturire Omi pamoja na piya wari kuinshi mulumwengu.”
Nnu na wanawe
18Wana wa Nnu wâlawire nSafina, wákiwa Shemu, Hamu na Yafeti. Hamu ndi ákiwa wawaye Kanaa. 19Ewa ndi wana wa Nnu, watatu nowa basi. Wanu piya wenere kuinshi mulumwengu-mu ujukulu wa marikolo awo nowo.
20Nnu ákiwa nrimi na ndi áwere ntanzi kuvyala miti ya uva. 21Kwa suku moja, akínywa vinyu, akirewa, akivula nguwo zake akibaki diki nkati ya ema yake. 22Hamu wawaye Kanaa, pokire akimmona wawaye ire ari diki, akuka akiwambira wanduze wákiwa panja ya ema ware. 23Basi Shemu na Yafeti wakitwala nguwo wakikunjula wakitula mmaweya, wakenenda kinyumanyuma wakuka wakinfinika wawa yawo, ipate wansinshuhudiye diki yake. 24Nnu paimwamuke vinyu ire akisisimuka, kejiwa kinani catendire mwanawe kifindi, 25akisema javi: “Alanike Kanaa, aje awe ntwana wa mwinsho wa wanyenyeze.” 26Tena akisema javi: “Shemu apendiwe na Mwenyezimungu Mola wetu! Kanaa awe ntwana wake. 27Mwenyezimungu ankweze Yafeti, apatane na Shemu#9:27 Kiebraniya: “ainshi ema za Shemu”. , na Kanaa awe ntwana wake.”
28Nnu, bandi ya kupita mwanalukaya nkulu ire, kainshi tena myaka miya natu na amusini. 29Nnu kâinshi duniya myaka miya kenda na amusini (950), akifwa.
Currently Selected:
Mwanzo 9: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
