Luk 5

Hgafta Yesu ta taŋtaŋa duhwalha ni

Mat 4:18-22, Mak 1:16-20

1Ma sana fitik ta nzaku *Yesu ta wa drəf ma Genezaret, ka va sliʼadaghata dəmga dlivis slanaghata ŋa sna gwaɗa Lazglafta da tsi. 2Ka nghaŋtá tsi ta kwambaluha his ta wa tsa drəf ya, sliʼagaghu gwal tuma klipi mida ka laghu ghwaɓa kadəŋa taŋ. 3Ka sliʼaftá Yesu ka lam da sani ma tsa kwambaluha ya, ta nzakway ka ŋa Simuŋ. « Gavadanam gava kwitikw nda ma huɗa drəf, » kaʼa nda *Piyer. Ka nzagaptá tsi mida ka tagha skwi ŋa mnduha.

4Manda kɗakwa ni ta gwaɗa, « Gavadanamwa gava ta kwambalu da takataka drəf, ka wuɗadata kuni nda graha gha ta kadəŋa ghuni ŋa tuma klipi, » kaʼa nda Simuŋ. 5Ka Piyer mantsa: « Mghama ɗa, kurzliŋ hana ŋni ta tumay, lay mutsaf a ŋni wa. Yaw, dzaʼa vzada vza ŋni tama ta gwaɗa gha » kaʼa nda tsi. 6Ka vzadatá həŋ, ka waftá tsi ta ndəghata klipiha ta malaghutá mbraku ka kuma ratsiŋtá kadəŋa taŋ. 7Ka kəməts həŋ ta sanlaha ma graha taŋ ma sana kwambalu ŋa sagha kataŋtá həŋ. Ka sagha tsaha ya, ka ndaghanaftá həŋ ta tsa kwambaluha taŋ ya his his, ha ka kum tsa kwambaluha taŋ ya ta zamta da imi. 8« Mghama ɗa! laghu la gha ta vata iʼi kabga mnda dmaku yu, » ka Simuŋ Piyer tsəlɓata ma ghuva Yesu nghər tsi ta tsa skwi ya. 9Tsaw si hlu hla zləŋ ta i Piyer nda graha ni ta ghəŋa tsa mandərmima tuma klipi maga həŋ ya. 10Mantsa ya hluta tsi ta i Yakubu nda Yuhwana ta nzakway ka zwana Zebedi ta gwaftá vgha nda i Simuŋ ya guli. Ama ka Yesu nda Simuŋ mantsa: « Ma zləŋ ka, daga ndanana, mnduha dzaʼa ka hlakta, » kaʼa nda tsi. 11Manda vranakta taŋ ta tsa kwambaluha ya ta wa sgam, sɗak zlanava zla həŋ ta inda skwiha taŋ ka laghu mista Yesu.

Mbanafta Yesu ta sani mndu nda rɗa mndu tida

Mat 8:1-4, Mak 1:40-45

12Ma sana fitik ma nzakwa *Yesu ma sana luwa, ka lagha sana mndu ksu rɗa mndu. Na gi nghaŋta ni ta Yesu, ka zləmbatá tsi zlumbruh ma ghuva ni ka ndəɓa dzvu. « Mghama ɗa, ka ta kumay ka laviŋ lava ka ta mbiɗifta ka nzakwa yu nda ghuɓa, » kaʼa. 13Ka fadaptá Yesu ta dzva ni ka ksaŋta. Ka Yesu mantsa: « Ta kumay yu ta mbafta gha, mbaf mba gha, » kaʼa. Gi hlets mbaftá ka nzaku tsi nda ghuɓa. 14Tahula tsa kaʼa nda tsi mantsa: « Yaha yaha ka da walaŋtá mnanaŋtá mndu, la da maranaŋtá vgha gha ta mnda dra skwi ŋa Lazglafta karaku, ka vlata ka ta skwi manda ya vindaf Musa ŋa grafta mnduha ta mbatá kagha, » kaʼa nda tsi.

15Ka va sgaku dzaʼa hga Yesu da zərwa, ka sliʼaktá dəmga da sna gwaɗa da tsi nda ya ŋa mutsaftá mbaku ma ɗaŋwaha taŋ guli. 16Ama ta gɗata Yesu ta laghu da mtak da maga duʼa.

Mbanafta Yesu ta sana mndu nda rwa səlaha ni

Mat 9:1-8, Mak 2:1-12

17Ma sana fitik ta tagha skwi *Yesu ŋa dəmga, ta nzaku la *Farisa nda gwal tagha zlahu ŋa mnduha hada ta sliʼakta ma inda luwa ta haɗika Galili nda ya ma luwa Ursalima, nda pɗakwa gwal ma haɗika Zudiya. Ka va sgaku maravata mbrakwa Mgham Lazglafta nda ma mbambay Yesu ta mnduha ma ɗaŋwaha taŋ. 18Ka sliʼadaghatá mnduha, ka tsukwadanaghatá sanlaha ta sana mndu nda rwa səla ni. Ka zbə həŋ ta ɓhadanamta da həga fata ta kəma Yesu. 19Ka traptá həŋ ta tvi ŋa lami, kabga hiɓa ta mnduha. Ka kladaftá həŋ nda ta bɗəma həga, ka gunaptá həŋ ta ghəŋa tsa həga ya, ka fadatá həŋ sruh fata ta kəma Yesu nda ta tsa ghurum ya nda ghəzləŋa ni nda ghəzləŋa ni mataba tskata mnduha. 20Nghanata Yesu ta zlghay nda ŋuɗufa taŋ ná, « nda pla dmakwa gha sagəŋ, » kaʼa nda tsi. 21« Wana ma mndu ta kwara kwara ɓa? Wa ta laviŋtá pla dmakwa mndu ta ghəŋa Lazglafta turtukwa ni na? » ka tsa gwal tagha zlahu ŋa mnduha nda la Farisa ya ta ndanay ma ghəŋa taŋ. 22« Ndanawu mndəra na ta ndanu kuni ɓa! ka Yesu nda həŋ, kabga nda sna tsatsi ta ndana taŋ. 23Ta grə kuni ná, mal blakwa mnay ŋa na mndu na kazlay: Nda pla dmakwa gha kəʼa re? Ari mal blakwa mnay kazlay: Sliʼaf sliʼa ka mbaɗa ka ta mbaɗa kəʼa na? 24Ala, ka da grafta kuni kazlay: Mamu *Zwaŋa mndu nda mbrakwa pliŋtá dmakwa mndu ta ghəŋa haɗik » kəʼa, ka yu ta mnaghata gra wa, « sliʼaf sliʼa, kla ta skwa hana gha, la dzagha gha, » kaʼa nda tsa mndu nda rwa səla ni ya.

25Gi hada hada brahwat sliʼafta tsa mndu ya tsa ta nghay mnduha demdem, zləŋal klaftá skwa hana ni, ka dzaʼa dzagha ni nda zləzlva Lazglafta. 26Ka ndərmim inda mnduha nda ndərmima, ka zləzlvu həŋ ta Lazglafta. « Nda ngha ŋni ta skwa mandərmimi gita, » ka həŋ nda zləŋ nda zləŋ.

Hgafta Yesu ta Levi ŋa dzaʼa mista ni

Mat 9:9-13, Mak 2:13-17

27Tahula tsa, ka sab *Yesu ka nghaŋtá tsi ta sana mnda tska dzumna *Levi hga ni, ta nzaku ma həga ksa slna ni. « Mbaɗa mista ɗa, » kaʼa nda tsi. 28Ka sliʼaftá Levi ka zlanavatá inda tsa skwiha ta mag tsi ya ka laghu mista ni. 29Lagha Levi ka maganatá skwa zay gaʼ ga taŋ. Ka nzata həŋ ka zay kawadaga nda ndəghata mnduha, nda sanlaha ma gwal tska dzumna guli mataba taŋ. 30Ka ruruŋwaku la *Farisa nda mnduha taŋ ta tagha zlahu ŋa mnduha ta ruruŋwaku. Ka həŋ mantsa: « Kabgawu ta kəl kuni ka za skwi nda sa skwi kawadaga nda gwal tska dzumna nda sanlaha ma ghwaɗaka mnduha na? » ka həŋ nda duhwalha Yesu. 31Ka Yesu nda həŋ mantsa: « Haɗ gwal ɗughwana ta zba duhtur wa, gwal kul ɗughwanaku yeya ta zbay. 32Sagha a yu da hagaktá gwal ta mnay kazlay: Tɗukwa aŋni kəʼa wu, sa da haga gwal ta snaŋta kazlay: Gwal dmaku aŋni kəʼa yu, ŋa mbəɗanafta taŋ ta nzakwa taŋ, » kaʼa nda həŋ.

Mnay Yesu ta gwaɗa ta suma

Mat 9:14-17, Mak 2:18-22

33Ka la *Farisa nda *Yesu mantsa: « Ta sumay i duhwalha Yuhwana nda duhwalha aŋni ta suma ka maga duʼa tazlay, za skwa zay taŋ nda sa skwa say taŋ ŋa duhwalha kagha, » ka həŋ. 34Ka Yesu nda həŋ mantsa: « Dzaʼa laviŋ lava kuni ta mnay kazlay: Tkweʼ sumawa suma ta suma kəʼa nda graha zwaŋamidzi ka ta kawadaga zwaŋamidzi nda həŋ baɗu kla makwa ra? 35Dzaʼa sagha sa fitik ŋa kləgədanaghutá zwaŋamidzi ta həŋ. Ma tsa fitikha ya dzaʼa suma həŋ ta suma, » kaʼa nda həŋ. 36Kaʼa nda həŋ nda mahdihdi guli mantsa: « Haɗ mndu ta kuhwaʼatá lfiɗa lgut ŋa tsamtá halata lgut nda tsi wa. Ala ka kuhwa a kuhwa lu ta tsa lfiɗa lgut ya ka tsamtá halata ni nda tsi katsi, rəta a ngha tsatá tsa halata lgut ya wa. 37Haɗ mndu dzaʼa pghamtá ima inabi ta ka nunu da halata zliba huta wa. Ka pgham pgha lu katsi, dzaʼa tiŋta ta tsa zlibi ya, ŋa mbəzutani ta bəghutá lu ma zliba huta. 38Ma zliba huta ta ka lfiɗ ta pghamta lu ta ima inabi ta ka nunu. 39Haɗ mndu ta sutá ima inabi nda tawa dzaʼa zba səgəltá ima inabi ta ka nunu guli wa. “Mal zɗakwa ya nda tawa” ka lu ta mnay, » kaʼa.

Currently Selected:

Luk 5: xed

Highlight

Copy