Mpiin 20

Abraham ni Abimelek aabɔr

1Abraham nan fii Mamre aatiŋ ni, le ki buen Kanaann aaŋangii wɔb, ki ti bi Kades ni Sur aakaasisik ni. Nee aapuwɔb le u nan buen ti kal Gerar aatiŋ ni. Waah nan bi nima na, 2le u nan bui ke Sara ye uninkpan la. Nima pu na, Gerar aabɔr u nan bi, bi yin u ke Abimelek na, nan cha bi joo ni Abraham aapuu Sara u chee. 3Kinyeek kibaa daal le Uwumbɔr nan dan ubɔr ngbaan chee tidaŋ ni, le ki bui u ke, “M ga ku si; saah yoor upii u na kpa chal.”

4Abimelek mu aa nan kee doon upii ngbaan chee, le u bui ke, “Ndindaan, maa nyi la. Aa ga ku m ni maanib aa? 5Abraham le bui mi ke u ye uninkpan la, le upii ngbaan mu len ke uninja le na. Maah ŋa pu na, maa dak nsui ni ke ni kpa taani.”

6Le Uwumbɔr nan giin mɔk u tidaŋ ni ke, “Mbamɔn, m nyi ke saah ŋa pu na, saa kpa taani, nima pu le maa kii ke aa doon u chee aan ki taa li kpa taani m chee. 7Tɔ, dandana wee giin upii ngbaan tii uchal. Uchal ye maabɔnabr la, le u ga mee mi tii si, nima kan, saan kpo. Tɔ, aa yaa yii, kaa di u tii uchal kan, m sur si la, aa ni saanib mɔmɔk ga kpo.”

8Lichakpitaawoln le ubɔr Abimelek fii mala ki yin waaninkpiib, le ki tuk bi waah kan pu tidaŋ ni na, le ijawaan chuu bi pam. 9Le Abimelek yin ni Abraham le ki nan baa u ke, “Ba ŋa aa ŋa timi kina? M ŋa si ba aataani aan aa tɔŋ timi ke ti tun titunwanbir aan tibɔbir lir m ni maanib pu? Saah ŋa mi pu na, naa ŋan ke unii ŋa kina. 10Ba ŋa aa ŋa kina?”

11Abraham nan giin bui u ke, “M dak ke ubaa aa bi do ki san Uwumbɔr, le nibaakan bi ga ku mi ki gaa mpuu, nima pu le m bui ke u ye nninkpan la. 12Mbamɔn, u sil ye nninkpan la. Nte aabisal le na, waa ye nna aabo, le m yoor u, u li ye mpuu. 13Le Uwumbɔr aah nan bui mi ke m nya nte do ki buen kitiyayaŋ ni na, le m bui mpuu ke, ti yaa ti fuu nimɔk na kan, u bui ke uninja le ye mi, kina le u ga mɔk mi waah gee mi pu na.”

14Le ubɔr Abimelek di Sara giin tii uchal Abraham, le ki tii Abraham ipiih, ni inaa, ni binaagbiib mu, 15le ki bui u ke, “Min le yeh kitiŋ kee. Lik saah gee nin chee na ki li bi nima.” 16U nan bui Sara mu ke, “M ban m tii aaninja ŋimombil lichur aan ni mɔk ke aa kpa mbamɔn, le binib mɔmɔk ga bee ke saa tun bakaa ubaa.”

17-18Abimelek aah nan ban u gaa Abraham aapuu Sara pu na, le Uwumbɔr nan cha bipiib bi mɔmɔk bi Abimelek do lichiln ni na ŋa biŋoob. Nima pu na, Abraham nan mee Uwumbɔr tii Abimelek, le u cha u ni upuutiib, ni waanaagbiipiib pɔɔk, le bi ki piin ki ma mbim.

Currently Selected:

Mpiin 20: xonB

Highlight

Copy