Tigidali Nai Gagalama Nigali Side 13
13
Lot gasaba bidigi pai
1-2Te Abramgo doado bage hauwa elaluali. Agai te sipsip me, meme me, bulmakau me, te dila pai kapa silva gol dali si, te tama nai doado bage hauwa mu elaluai. Tialima, Abramgo te Isip bulu taga soyu, te moni tǫ pedai badu nogi Negeb, teba soai. Agai te aga we me te aga doado bage tigidali selama, tama Lot me aga dali hodobo soali.
3Tama Abramgo te Negeb tǫ nosali taga peyu, tama me pidubadi geanima, te aga te Betel hanu pedai badu sabaligi pai. Aga te aga polobadu ugwa be dabe elaluali madi, te Betel de Ai te hanu si tomoba bidigi pai. 4Tama tede aga te alta sai polobadu nigali madi pelama, tama aga Yawego nogi weyu, lotu po te Yawebolo wali.
5Lot te Abram dali hodobo bilali. Agai te meme, me sipsip, me bulmakau te hauwa mu elaluyu, te genuai we bidi hani me elaluai dao. 6Abram de Lot sigo sipsip, meme, te bulmakau bage hauwa mu elaluali, tama tiyu, te augwali si deli madi hodobo bidabo te usu meni yai. 7Tama wado po te Lot de Abram augwa si hasa tonalubo sę ebo bidi dabe tomode pedelali. Te sogo te Kenan dabe me, te Peres dabe me tede bidalubadi dao.
8Tialima, Abramgo Lotbolo te po wai, “Dadi si te deli kaneme si dao. Tiyu, da si wado po wabuo, tama da si go sę ebo bidi dabe augwa hasi me wado po wabuo,” Abramgo te po wai. 9“Suao, te genuai tǫ pedai elalubao. Te naga pedai badu bidabo madi me deli dodolama, tama nago ena taga peyu, naga teba bidigi painu te usu da. Te nage dolo nogo pedai badu painogo da, teda ena te pobase nogo pedai badu paibao. Ma, nage te pobase nogo badu painogo eyu da, teda ena te dolo nogo badu bidigi paibao,” Abramgo te po wai. Te augwa ama nami si tama po dodolali.
10Tialima, Lot dolugulama, tonono bilali. Agai te tigidali tǫ malu te wę Jordan sesegedu tonono pali, te tigidali pedaiba usu nama, te Soar te pedaiba usu nigi palio. Te tǫ tigidalide te dwagi yai wę hauwa te gasa sawi yai, te Yawego Iden gide elalubo tiwai, me tama te Isip dabe tǫde elalubo tiwai elaluali. (Tama te sogo te Yawego te Sodom de Gomora te hanu si dolisiąbadi dao.) #Gag 2:10 11Tama tibaso, Lot te giliga pedalubo pedai badu pelama, tama agai te wę Jordan sese badu elalubo tǫ malu tigidali sali. Tama tibaso, te augwali si hodobo ma bidibeo. 12Abram te Kenan tǫde bididuali. Tama Lot te Jordan malu elalubo hanu dabe tomoba bidigi pelama, tama aga bidabo ugwa be dabe te Sodom moni hanu pąba pidubadi geanima, tama munama, bidai. 13Tama te hanude bidalubo we bidi dabe augwaligo te dwai sę genuai mu te Yawe gedude yalio. Te augwaligo agai bomai po te wali me pabeo.
Abram te Hebronba pali
14Te Lot pai madi, tama Yawego Abrambolo te po wai, “Nage ede dolaluyu, te nago tigidali pedaiba tonono pao,” wali. 15“Te megi nago subo tǫ tigidali, te eno nagebolo mayu, tama nago nosali ame nabo hani wai dabebolo mobadi yaibao. Tama te tǫ dagego sesemane sogo mu elalua paibao. #Tpi 7:5 16Te eno nago wai puluba dabe hauwa mu te masigi sane kemi tiwai pedalumainogo ilaibao. Te bidigo te masigi kemi tigidali nedebo usu yabo homu eyu da, teda agai te nago wai puluba pedalubo tigidali te nedabo usu yaibao. 17Tialima, nage hogodama, tama biliyu, tama te tǫ tigidali nago susa bilao. Magi baso meni, te tigidali tǫ te eno nagebolo mawaibao,” te po wai.
18Tama tibaso, Abramgo aga ugwa be dabe gudulama, tama te bidali bulu tagalama, tama pidubadi geanima, tama aga pelama, te nosali te Hebron buluba bidigi pali, tama aga bidabo pesage te bidi Mamrego genuai ni dabe elalubo pąde te pesage nigali. Tama aga ugwa be dabe tede dodolama muyu, tama agai te Yawebolo lotu po wabo alta te bulude nigali.
Currently Selected:
Tigidali Nai Gagalama Nigali Side 13: mps
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
