Jon 9

Gedu widai bidigo po

1Te Jisas pobadi yaide, agai gedu widai bidi suai. Aga idago tabide elalubadi, tama aga gedu widai. 2Jisas aga wali pabo bidi augwaligo aga hanalu wai, “Po ola mabo bidi, te bidi dego sęgę selama, aga idago gedu widai ame naniwe? Te bidi aga digi sęgę saliwe, ma aga aya de ida sigo sęgę saliwe?” te po wai. 3Jisasgo te po wei ponoyu, te po wai, “Te bidi aga sęgę dali aga aya de ida sigo sęgę dali tede menio. Te sę pedalali, te Godigo bomo te bidide hania pedalobo te we bidi dabe augwaligo sumainogo yai. 4Megi ulade dao. Tama ulade dago ena tagala palali bidigo sę yao. Hulia sabo magade, hulia sabode, bidi me deligo sę me egobeo. 5Ena e tǫde bidibo sogo, te ena e tǫde we bidigo ula dao,” Jisasgo aga isabo sogode te po wai.

6Jisasgo te po olama, tama agai tǫba pesa sąwai. Tama pesa dali, tǫ dali piligai. Tama Jisasgo te tǫ selama, te bidi geduba pilali. 7Tama agai te bidibolo te po wai, “Nage wę ge ąį nogi Siloam te ąį paugi pao,” wai. (Te wę ge ąį nogi Siloam, te nogi begelama, te po wai, bidi tagala palai.) Jisas agai te po obaso, te bidi pelama, ąį paugi pai. Tama aga ma asai. Tialima, te bidi aga gedu megi tama mu tonobo usu yalio. 8Tama aga deli be bage aga hasi augwali me, te gasa bidi me badugo polobadu aga suai, te sogo agai we bidibolo agai masigi ge gonai, augwaligo augwa hasi te po wai, “Magi yaliwe? Te bidi te gedu widai dulaludu, masigi gonani bidi dawe?” augwaligo te po wai. 9Mebago te po wai, “Te bidi tama dao.” Tama mebago te po wai, “Te bidi menio. Te bidi tiwai dao, tiali te gasa bidi dao.” Tama te bidi aga digi te po wai, “Te ena te bidi tama dao,” te po wai. 10Augwaligo te bidibolo te po wai, “Magi ilama, nago gedu dwagi yai yaliwe?” te bidibolo augwaligo te po wai. 11Te bidigo po wei ponoyu, te po wai, “Te bidi nogi Jisas, agai tǫ dali, ąį dali piligilama, eno gedude pilai. Tama aga enabolo te po wai, ‘Nage Siloam wę ge ąįba pelama, te ąį paugi pao,’ wai. Tama ena pelama, te ąį paugi pai, tama eno gedu dwagi yai elama, tigidali nai eno subo dao,” te bidigo te po wai. 12Augwaligo te bidibolo te po wai, “Te bidi mena bidibowe?” Tama te bidigo te po wai, “Eno konebeo.”

13Te bidi polobadu gedu widali bidi augwaligo te Farisi bidi hani bidi dabebolo odasa pai. 14Te Juda bagego Sabat sogode Jisasgo aiyana pai tǫ selama, te bidi gedu pedalai. 15Tama te Farisi hani bage augwaligo te bidibolo ma hanalu wai, “Nago gedu mena tama dwagi yai pedalaliwe?” Te bidigo augwalibolo te po wai, “Te bidi agai aiyana pai tǫ eno geduba muai, tama ena ąį pauwai, tama eno gedu ula yai.” 16Tama te Farisi bidi hani tomode si bugulama, mebago Jisasde te po wai, “Godigo te bidi tagala palobeo. Agai Sabat sogode bomo yai po wali pabeo.” Tialima meba bidigo te po wai, “Dwai sę ebo bidi mego te tiwai bomai sę me ebo menio. Te bidi dwagi yai bidi dao,” wai. 17Augwa hasi tama bugulama, tama augwaligo te gedu widai bidibolo ma hanaluyu, te po wai, “Nago gedu geselali bidi, te bidide nago magi homu ebowe?” Agai te po wai, “Aga da, te Godigo nosali yabo sę po ola mabo profet bidi me deli dao, eno te homu ebao,” wali.

18Polobadu te bidi agai gedu halua sai, megi agai gedu pedai. Tialima, te Juda bage tobolu bidi dabe augwaligo homugo, te mu menio. Tama augwaligo te gedu widai bidi aga aya de ida si i wai. 19Augwaligo te we de bidi sibolo hanalu wai, “E dage sigo ogwa dawe? Aga idago ame neyu, gedu widai ame nai, dage sigo tama po obawe? Tialima, magi ilama, agai gedu mu pedaliwe?” te po wai. 20Te gedu widai bidi aga aya de ida sigo te po wai, “Da sigo koneai, e ogwa te da sigo ogwa dao. Aga idago ame neyu, gedu widai ame nai, tama te me da sigo koneai. 21Tiali, megi agai gedu ula mena tama ilaliwe, te da sigo konebeo. Tama dego agai gedu pedalaliwe, te me da sigo konebeo. Dagego agabolo hanalu wao. Aga genuai yai dao, aga digi dage dali po wabo usu yaibao,” augwali sigo te po wai. 22Aga aya de ida si Juda dabe dali wi eyu, te po peda sai. Magi baso meni, te Juda bagego po mia siyu, te po wai, “Bidi mego te Jisas te sa muyu asaiba wali bidi Krais da weyu da, te dago te po wabo bidi te dago bomo yai po ola mabo be tomoba asidali weyu habu selaibao,” te po wai dao. 23Tama tibaso, te polobadu gedu widai bidi aga aya ida sigo te po wai, “Aga genuai yai dao. Duga agabolo hanalu wao.” 24Tama si sogo te gedu widai bidi i wai. Te tobolu bidi dabe augwaligo te po agabolo wai, “Godigo nogi naga ugwaba sao, te bidigo nogi ugwaba sigio. Dago koneai, te nago gedu dwagi yai ilali bidi aga dwai sę ebo bidi dao. Tama nago agai nogi ugwaba sigio,” augwaligo te po wai. 25Agai po wei ponoyu, te po wai, “Aga dwai sę ebo bidi dawe, te eno konebeo. Eno te sę deli koneai. Polobadu eno gedu widai. Tiali megi eno gedu ula yai.” 26Tama augwaligo agabolo te po wai, “Agai nage dali magi sę yaliwe, agai nago gedu magila pedalaiwe?” 27Agai augwali dali te po wai, “Eno dagebolo wai dao, tialima dagego odobo hagela yai. Magi baso dagego ma odainogo obawe? Dage aga wali pabo bidi mu pedalainogo ebawe?” te bidigo Juda bage dali te po wai. 28Tama augwaligo aga dali dwai nogi posobo po weyu, te po wai, “Nage da, aga wali pabo bidi dao. Tialima, da te polobadu bidai nogi yai bidi Moses wali pabo bidi dabe dao. 29Dago koneai, God agai po Mosesbolo mawai. Tialima, u bidi menade pedalaiwe, te dago konebeo,” augwaligo te po wai.

30Te gedu widai bidigo te Juda bagego tobolu bidi dabebolo te po wai, “Te bidi noma sabo sę yali bidi dao. Aga menadu asaliwe, te dagego konesiąwai goli, agai eno gedu si dwagi yai ilali. 31Dago koneai, Godigo te dwai sę ebo bagego hanalu wabo po odobo menio. Tialima, bidi me deligo agai Godide wi eyu, Godigo po odoyu, Godigo homu wali pabo bidi, te bidigo hanalu wabo po Godigo odobo dao. 32Tigidali sogo polobadu bidi me deli aga idago gedu widai ame nani po dago odai. Tiali digi bidi me deligo te gedu pedalali po dago munu me odai menio. Dago wąį mu, augwaligo te tobage po odai menio, dago ayago me, tama megi dago me odai menio. 33Godigo te bidi tagala paligi menigi da, teda agai eno gedu dwagi yai iligi menio,” te polobadu gedu widai bidigo te po wai.

34Augwaligo te gedu widai bidibolo te po wai, “Nage ame neyu, nage dwai sę dali bidai. Nage dwai sęgęde bidai bidi mu da, nage. Tama tiali goli, magi baso nago da ola mawainogo ebawe?” augwaligo te po wai. Te po olama, augwaligo te polobadu gedu widai bidi te augwaligo bomo yai po ola mabo be tomoba asidali weyu, habu selali.

Homu kolesaga tomode gedu halua sai

35Te bidi Jisas agai te Juda bagego te polobadu gedu widai bidi habu selali po odai. Agai te bidi gegelama, sulama, te po wai, “Nago te Godigo Bidi Mude naga homu dąų olama, mubawe?” Jisasgo te po wai.

36Te bidigo te po wai, “Genuai Bidi, te Godigo Bidi Mu te de dawe? Nago enabolo wao, agabolo eno homu muainogo yaibao.” 37Jisasgo agabolo te po wai, “Nago aga suai. Te megi nage dali po wabo bidi tama dao,” Jisasgo te bidi dali te po wai.

38Tama te bidigo kidu tǫba sugunama, Jisasbolo te po wai, “Genuai Bidi, eno nagebolo homu dąų olama, mubao,” te bidigo te po wai.

39Jisasgo te po wai, “Ena e tǫba asali, tǫde bidibo we bidi dagalai hagede asai. Te homu kolesaga tomode gedu halua sai bidi, gedugo ma sumainogo te ena asai. Me ma, we bidi meba augwaligo homu, ‘Ao, dago koneai dao, te da te gedugo subo bage dao,’ augwaligo te homu ebo dao. Tama tibaso, augwaligo Godigo homu koneidali weyu augwali gedu halua somainogo ena asai dao,” Jisasgo te po wai.

40Te Farisi bage me badu augwali Jisas dali tede bidai. Tama augwaligo te po odai. Augwaligo Jisasbolo te po wai, “Da me homu kolesaga tomode gedu halua sai dawe, nago te po obawe?”

41Jisasgo po wei ponoyu, te po wai, “Dagego te homu eyu, ‘Ao, da te homu kolesaga tomode gedu halua sai bage dao,’ te dagego te homu eyu, tama dagego eno po sela sągi menigi da, teda dage dwai sęgę menigi da. Tialima, dagego duga gedu ula elalubao po waligo da, teda dagego sęgę me elalubao,” te po wai.

Currently Selected:

Jon 9: mps

Highlight

Copy