Jon 21
21
Ana Jisos kpe song lohng go ellong abatꞌtoono ebe
1Owo Jisos kehm kpe song tib elne go ellong abatꞌtoono ebe go eto ji Taibirias. Ana wo á tibi elne.
2Saimon Pita, a Tomos ji bo jo lung-e re Ayafele, go Natanael ji lohng go Kena ji Galili, a abon ba Sibidi, go abatꞌtoono ebe bako na abal, bo ane kpee jolo o edi ajehng. 3Saimon Pita kehm tongo bo re, “N kpꞌtahme nsahre.”
Bo kehm-e faange re, “E bahke tob tahm toon-a.”
Bo kehm soro tahm, song yel go egbang. Jol ejumjum bo bobem atv mao ona.
4Eji efungfu yahke se, Jisos kehm bake ba yiimi go nkpe eto. Abatꞌtoono ebe we liingem re, Jisos wo.#21:4 Jon 20:14; Luk 24:16.
5Jisos kehm bahbe bo re, “Abon ebame, ḿ bꞌbob nsahra?”
Bo kehm-e faange re, “Eꞌee, ejumjum e bobem.”
6Jisos kehm tongo bo re, “Yaken erim ebahne kak alahb go ejang eboblum bi egbang, ḿ bahke bobo nsahre.”
Owo bo kehm limi ano. Bo kpeem ma tohng erim bio, tibre nsahre ruru go erim sehng.#21:6 Luk 5:6.
7Ntꞌtoono no jo kor Jisos sꞌsehng, kehm tongo Pita re, “Ntul ewahre wo o!”#21:7 Jon 13:23.
Saimon Pita wuku kan a re, Ntul wo, á kehm soro kak nsol enye go ege a ngubjing, nyi á yehke no lim eltum, kehm soro yehb yel go alahb.
8Abatꞌtoono Jisos bako fingi egbang, ba rehng go nkpe egbuk. Bo jo tohngo erim bi nsahre ma gbo gbalee, tibre nkpe egbuk gaam jol fee, jolo ejum eyake ego ewaya ajehng.
9Eji bo rehnge go egbuk, bo kehm nyehne agun nya bo fohko go akal nsehng, fere nyehn nsahre kun go akal ngun, a ebred.
10Jisos kehm tongo bo re, “Koono nsahre nyindiki ba a nyi, nyi ń kpꞌna bobo.”
11Owo Saimon Pita kehm tahme song tohng erim bio ona, lohng a bi go egbuk. Erim bio nsahre ruru sehng. Nfange enyamalahb bio jolo nnyamalahb atahl asehma kunu ewubu a nnyamalahb era. Jol eji nsahre ruru rur ano, erim yarem.
12Jisos kehm tongo bo re, “Baan, wahn ba bob ala go elehke ejum jia.” Jol ntꞌtoono ewe awohng awohng jolem, no sahbe no bahb-e re, “Wo nne awo?” Tibre bo jo kꞌkahn re, Ntul a Jisos wo. 13Jisos kehm bake ba rod ebred jio ka bo, tob rod nsahre nyio ka bo.#21:13 Ell 3:20.
14Nkpel nyia nyi biingi nkpel era nyi Jisos tibi abatꞌtoono ebe elne, bomo eji á nyahme go elkv.
Jisos abola Pita
15Eji bo ma li nsol alehke mal, Jisos kehm bungu tong Saimon Pita re, “Saimon ji mmon a Jon, anv, n kp-a koro sehnge ane bakoa?”
Pita kehm faange re, “Ee Ntul, a kpꞌkahne re, a kpo kor-m sehng.”
Jisos kehm-e tongo re, “Le abon ejoro ebame!” 16Jisos kehm-e kpe bahb go nkpel ebal re, “Saimon ji mmon a Jon, anv, n kp-a kora?”
Pita kehm-e faange re, “Ee Ntul, a kpꞌkahne re, a kp-m koro.”
Jisos kehme tongo re, “Baabe ejoro ebame!”#21:16 1 Pit 5:2-4. 17Jisos kehm-e kpe bahb go nkpel era re, “Saimon ji mmon a Jon, anv, n kp-a kora?”
Pita atahng kehm-e moongo, tib eji Jisos bahb-e nkpel era re, “N kp-a kora?” Á kehm faange re, “Ntul, a kpꞌkahne ejum ajehng ajehng.#21:17 Jon 16:30. A kpꞌkahne re, a kp-m koro.”
Jisos kehm-e tongo re, “Le ejoro ebame! 18Etingitingi, n kpꞌbungu tong-a re, Ngare nyi a jolo njangkun, a jo gbaange egbaange eja go ebun, jo je edi ajehng ajehng ji kor-a no. Eji a ma kul, a bahke tanne abo enya. Nne nondiki bahk-a gbaange egbaange eja go ebun, ko-a tahm a na go edi ji ki-a kor re wo je.”
19Jisos bungu alum nyaa re, á tib Pita elkohn elkv ni á bahke kpoko, ka Esowo ellub. Owo Jisos kehm-e tongo re, “Tahm toon-m!”
Jisos, a ntꞌtoono ewe noko
20Pita kehm keebe, nyehn ntꞌtoona Jisos noko, kpi bo toono, no jo kor Jisos sꞌsehng, no ji kohlo Jisos, eji bo jo li nsol alehke elgung, fere bahb-e re, “Ntul, nne awo li nne no bahk-a gungu?”
21Eji Pita nyehn-e no, á kehm bahbe Jisos re, “Ntul, nne noa mee?”
22Jisos kehm faange Pita re, “Lꞌkor-m re á jol a, tete me n feere ba, elam eja sang, wo toon-m na toono!”
23Eka jia kehm yeere na yeere go ellong aneb Esowo re, ntꞌtoono a Jisos noo nehm kpo, jol eji Jisos ki-e tꞌtong ejumjum re, á nehm kpo. Alum nya Jisos bungu no li re, “Lꞌkor-m re á jol a, tete me n feere ba, elam eja sang.”
24Ntꞌtoona Jisos noo wo kpꞌyiimi ntianse go nsol nyia a. Ye wo fere nyon nwer nyia. E kpꞌkahne re, alum enye nya á yiimi ntianse lohko li go etingitingi.
25Nsol nyehko nyia gbalee, nyi Jisos limi no. Li re bo nyono nsol kpee kak go awer, me m bum re, njini ebse sehng re awer nyaa kpee jol.
Currently Selected:
Jon 21: ekaNT
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
