Mat 22
22
Elgan ni li bade elkak elbal
(Luk 14:15-24)
1Jisos kehm kpe tub bo elgan nehko re, 2“Etul bi Esowo li ana ntul no toobo ebjing bi elkak elbal, ni mmon ewe yahke ko nkal.#22:2 Jon 3:29. 3Á kehm tumu alokeltum ebe re, bo song tong ane ba á tiingi bo elkak re bo ba.#22:3 Ell 19:7. Korem bo elbake. 4Á kehm kpe yehke alokeltum bako, kehm tongo bo re, ‘Songen, wahn song tong ane ba n tiingi bo elkak re, Me n toobo ejum ajehng ajehng kpee bum. Bobwul efong ebame, a atohkondi nya m ma le bo, bo ma jok. Baan go elkak elbal!’
5“Ane ba bo tiingi bo elkak, elkak nio lubem bo. Bo tahme na go bo alimi nsol. Noko tahme go ege egbe, noko tahm go ege a nju are. 6Egom ane bako bobo alokeltum ntul noo, nohk bo, fere wul bo.
7“Ntul, atahng rak-e sehng. Á kehm tumu nsoja enye, bo song wul awulane bao, fere jahm ejahbe ebo fi.#22:7 Mat 24:2. 8Owo á kehm tongo alokeltum ebe re, ‘Nsol elkak kpee, me n toobo bum. Ane ba n tiingi bo, bo kpeem fuumu. 9Songen go ayaame mbang! Nne awohng awohng no ń lꞌnyehn-e, tongen ye, á ba go elkak elbal.’
10“Alokeltum bao kehm tahme, jo yannge. Nne awohng awohng no bo nyehn-e no, lꞌkor-e, bo ko-e tahm a ne go elkak. Ane bandiki jolo abi ane,#22:10 Luk 19:1-10. bandiki jol anoobo ane.#22:10 Elt 10:1-2. Ekpꞌkpa elkak nio kehm ruru ane ane.
11“Owo ntul kehm tahme re á song nyehn ane ba jo li nsol. Á kehm nyehne nne no kake ewobo ji ki fuumu elkak elbal nio. 12Ntul kehm-e bahbe re, ‘Mbi, a limi renan, kehm yele a, kꞌkak ewobo ji fuumu elkak nia?’#22:12 Kol 3:12; Ell 19:8.
“Nne noo belle na belle eje.
13“Owo ntul kehm tongo alokeltum ebe re, ‘Boben ye, wahn gba-e alehke go abo, a akpade akpade, fere ro-e tv go elatahk, edi ejannge jio ji ane kpo woomo, jo ling, fere jo kono amahn go esi.’
14“Tibre ane gbalee ba bo tiingi no. Abon amohk ane abik abik ba bo ma jak.”
Bade etak atahbe
(Mak 12:13-17; Luk 20:20-26)
15Bab Farisi kehm tahme, song toobo ana bo bahk-e bobo go ege alum nnyo. 16Bo kehm tumu abatꞌtoono ebo, a aneb ntul a Herod tv goji Jisos. Bo kehm song bahb-e re, “Ntꞌtibi, e kpꞌkahne re, wo etingi nne ji. A kpo tib mbang nyi Esowo go etingitingi. A kpehme rang nnene. Jol esamahr ane, a kpehme be. 17Tong-r ana a kpꞌtiri bade ejum jia. Nꞌnob re wahr jo tahb etak ka ntul a Roma, afi nobem?”
18Jisos kꞌkahn ebi ntir atahng ebo, owo á kehm faange re, “Wahn aneb alum abal abal ba! Jen ji wahnge ń kp-m gare? 19Tib-m wahn akpohko nya ḿ bahke koko tahb etak.” Bo kehm koko ba a nya.
20Jisos kehm bahbe bo re, “Esi jia ji nyehne ji? Mbing nyia nyi nyehne nyi?”
21Bo kehm faange re, “Esi jia ji ntul ji. Mbing nyia nyi ntul nyi.”
Owo Jisos kehm tongo bo re, “Kaan ntul ji li ka ntul,#22:21 Rom 13:1-7; Luk 23:2. wahn ka Esowo ji li ka Esowo.”#22:21 1 Pit 2:17.
22Eji bo wuku ano, kehm kpoko bo esi. Bo kehm-e yaame sa, tahm ebo.
Bade elnyahme go elkv
(Mak 12:18-27; Luk 20:27-40)
23Efung bꞌnehm ona, egom Sadusi jindiki kehm bake ba kpiri Jisos. Bo ba kpo tib re, elnyahme go elkv limm.#22:23 Elt 23:8. Owo bo kehm tongo Jisos re, 24“Ntꞌtibi, Moses bungu re, ‘Nne lꞌkpo, eji á ki jel abon, mmonannyehn nkvne ko nnenkal noo, eji á lꞌjel abon ka mmonannyehn no ma kpo.’
25“Abonanyehn na asehma ba jolo a nahre. Ngbokambang ko nkal, mmon awohng awohng á jelem, á kehm kpoko, nkal ewe sa. 26Ano wo tob lim etoono mmonannyehn, a mmonannyehn noko no toono noo, a erik abonanyehn bako kpee. 27Esꞌkohro, nnenkal noo tob kpo. 28Anv, efung bi ane lꞌnyahme go elkv, nne awo á bahke jolo nkal ewe? Tibre bo ane kpee ko-e ana nkal abo.”
29Owo Jisos kehm faange bo re, “Ń kpo soodo, tibre ń nehme kahn nwer Esowo, a nsahm nyi Esowo. 30Ngare nyi ane ma nyahme go elkv, bo bahke jolo ana babenjel. Aneblum nehm kpe jo ko akal. Anebkal nehm kpe jo bal alum.#22:30 1 Kor 15:44. 31Bade elnyahme ngubjing go elkv, ń ka lung alung ana Esowo tong-n no re, 32‘Me wo li Esowo bi Ebraham,#22:32 Luk 16:22. a bi Aisik, a bi Jekob.’ Jia lohngo re, Ye li Esowo bio bi ane ba li go elkpin, bi akvne sang.”
33Eji ellong ane bao wuku ana á jo tib, kpo bo esi sehng.
Ntahm nyi ga gbal
(Mak 12:28-34; Luk 10:25-28)
34Eji Bab Farisi wuku re, Jisos ebga aneb Sadusi, bobbelle, bo kehm song kono edi ajehng. 35Nne awohng go bo ellong no jolo ntꞌtibi no atahm kehm bake ba bahb Jisos mbahbe, jo gar-e. Á bahb-e re, 36“Ntꞌtibi, ntahm anyi ga gbal kpee go egahre atahm?”
37Owo Jisos kehm-e faange re, “ ‘Esowo, ntul ewa bahke jo kor-a eltim eltim ena, etohko etohko eja, a ntir a ntir enya.’ 38A wo li ngbokambang a ntahm nyi ga gbal. 39Etoono ntahm tob li na li ana nyio o, nyi li re, ‘Nne ebjing ewa jo kor-a ana ebjing eba.’ 40Atahm nya Moses kpee, a eltibi ni abanyehnamahr tohk ntahm ebal nyia.”#22:40 Rom 13:10; Gal 5:14; 1 Jon 4:20-21.
Mbahbe nyi li bada Mesaya
(Mak 12:35-37; Luk 20:41-44)
41Ngare nyi Bab Farisi ba kono edi ajehng, Jisos kehm bahbe bo mbahbe re, 42“Anv, ń kpo tir renan bada Mesaya? Ye mmon a nyehne wo?”
Owo bo kehm-e faange re, “Mmon a Devid wo.”
43Jisos kehm tongo bo re, “Jen ji wahnge Devid lungu Mesaya re, ‘Ntul ewame’, eji Etingi Etohko mehl-e no, á bungu re,
44“ ‘Ntul Esowo tongo ntul ewame re,
Ji go egame ejang eboblum
tete me n lim anebekv eba etikunakpade eja.’
45“Yefono Devid jo lung-e re, ‘Ntul ewame’, bahke limi renan, ntul noo kehm fere jol mmon ewe?”#22:45 Mat 1:1; Ell 5:5.
46Nnene jolem, no male elfaange Jisos ellum anehng anehng. Bomo efung bio asongo nnene kpeem jo sahb, bahb-e mbahbe.
Currently Selected:
Mat 22: ekaNT
Highlight
Share
Copy
Want to have your highlights saved across all your devices? Sign up or sign in
© 2012, The Nigeria Bible Translation Trust and Wycliffe Bible Translators, Inc. All rights reserved.
