Mat 5

Alum nya Jisos bungu go ero ewong

(Luk 6:20-23)

1Eji Jisos nyehne ellong ane bao, á kehm tahme go ewong. Á ji kan a me, abatꞌtoono ebe kehm bake go ege. 2Á kehm kehme bo tib re,

3“Elfuulu li ka ane ba ma gbo ekpak bio bi etohko. Tibre etul bi Esowo li ka bo.#5:3 Luk 18:13-14.

4“Elfuulu li ka ane ba jehk ndon ndon. Tibre bo bahke kake bo eltim.#5:4 Ell 7:14-17.

5“Elfuulu li ka ane ba kpi nnaange eljini. Tibre bo bahke bele njini ana ejum elehke elkv ebo.

6“Elfuulu li ka ane ba kpꞌsahb sꞌseb re bo li eno go esamahr bi Esowo. Tibre bo bahke lehke eno.#5:6 Elt 16:30.

7“Elfuulu li ka ane ba, ane kpo fili bo ndon. Tibre bo bahke tob fili Esowo ndon.#5:7 Jems 2:13.

8“Elfuulu li ka ane ba ntim ebo li saang. Tibre bo bahke nyehne Esowo.#5:8 1 Jon 3:2-3.

9“Elfuulu li ka ane ba kpo seb elkoono.#5:9 Rom 12:18. Tibre bo bahke jo lung bo re abon ba Esowo.

10“Elfuulu li ka ane ba, bo kpꞌnohko bo tib eji bo kpꞌlimi nsol nyi li go etingitingi. Tibre etul bi Esowo li ka bo.#5:10 1 Pit 3:14.

11“Elfuulu li ka-n, ane lꞌjo su-n, fere jo nohk-n, fere jo kiimi elkohn efahnge anehng anehng lak-n tib go egame esi.

12“Belen eyebatahng, wahn jo geere. Tibre eltuuru enahne ni li go ejahbetul Esowo kpꞌgbale. Ano wo bo jo tob nohk abanyehnamahr Esowo ba tohko jol, wahn kehm jini.

Akang abola ellennge

(Mak 9:50; Luk 14:34-35)

13“Wahn ba li akang ma njini.#5:13 Kol 4:6. Elyebe akang lꞌlohng go akang, bahke limi renan, kehm kpe yebe? Nehm kpe nob ellahbe. Bo bahke sale na wohng go, ane jo kadde sehng.

14“Wahn ba li ellennge ni njini.#5:14 Fil 2:15. Ejahbe ji bo si kunu go ewong nehm kpe ma biiri. 15Nnene limm, no kpo nyaale etꞌrekahng, rod ejeere konngo. Á bahke rodo na kunu go ejum ji bo kpo kunu atꞌrekahng. Owo bahke yake ka ane kpee ba wob ekpꞌkpa jio. 16Nong, ellennge enahne ni ń kpi no jo ya go esamahr ane, eji bo lꞌnyehn nnoobo enyahne nyi ń kpo lim, fere jo tehk nso ejahne no li go ejahbetul.#5:16 Ef 5:8-9.

Alum nya Jisos bungu bade atahm nya Moses

17“Kana tir re m ba re me m ba range atahm nya Moses, a eltibi ni abanyehnamahr tibi no.#5:17 Rom 3:31. M baam re me m ba range, m ba re me n gohro ba lim, biingi go nseenge.#5:17 Rom 8:3-4; 10:4. 18Etingitingi, n kp-n tongo re, Eji elbung abola ndi kpeke li, mmonrꞌrohka mmojum awohng awohng no atahm nehm range tete rehng esꞌkohro ji nsol kpee bahke male.#5:18 Luk 16:17.

19“Owo fvfo, nne awohng awohng no lꞌyuudu nrꞌrohka mmontahm awohng awohng,#5:19 Jems 2:10. afi á tibi ane ano, ye wo bahke ga jol nkpak go ejahbetul Esowo sehnge ane kpee. Nne awohng awohng no lꞌbum atahm, fere jo tꞌtib, ye wo bahke jolo njꞌjoka nne go ejahbetul Esowo.

20“N kp-n tongo re, ń nehm ma yel go ejahbetul Esowo, sehngem re, eno ejahne ji ḿ bahke lehke go esamahr Esowo sehnge ji atꞌtibi ba atahm, a Bab Farisi.#5:20 Rom 9:31-33.

Eltibi ni li bade elkoono

21“Wahn ebwuk ana bo tongo ane ba jolo mahne mahne re, ‘Kana jo wul nne! Nne awohng awohng no lꞌwul nne, bo bahk-e koko, tahm ane go elam.’ 22Wo, me n kp-n tongo re, Nne awohng awohng no eltim lꞌrak-e tob mmonannyehn, bo bahk-e koko, tahm a ne go elam. Nne awohng awohng no lꞌsu mmonannyehn, bo bahk-e koko, tahm a ne go esub. Nne awohng awohng no lꞌtong mmonannyehn re, ‘Egboolo ji!’ yeblim ebi ji bo bahk-e koko, song kak go ellulagun.#5:22 1 Jon 3:15.

23“A lꞌko ayare ba a nya go edi njom alimi, a lꞌfere buumu ona re, ń li go ntong awahn a mmonanne, 24yake ayare enya bum kohlo edi njom alimi jio, wo feere, tohko song bung ntong nyio mal, fere koono a mmonanne, wo kehm feere ba ka ayare enya.#5:24 Mak 11:25. 25Jo koono a nnekv ewa elwaare, eji ngare kpeke li,#5:25 Hib 3:13,15; 9:27. eji nnekv ewa lꞌki-a song kak esub, nlamalam rod-a kak mbehresi go ebo, á rod-a song kak ngbekobo. 26Etingitingi, n kp-a tongo re, Owo a bahke woomo tete a gohro gal mbong nyi a bele no, jol ederi ajehng ajehng nehm sa.#5:26 Mat 18:34.

Eltibi ni li bade erehbe

27“Wahn ebwuk ana bo bungu re, ‘Ka jo lim erehbe!’ 28Wo, me n kp-n tongo re, Nne awohng awohng no lꞌyehke amahr enye kunu nnenkal re á noongo a ne, yeblim abiafem nya erehbe go ege eltim.#5:28 2 Pit 2:14. 29Elmahr eboblum ena lꞌwahng re wo lim abiafem, luudu ro go! Ga nob re ejum ngubjing enya demme, sehnge re bo rod ngubjing enya kpee, song kak go ellulagun. 30Eboblum eba lꞌwahng re wo lim abiafem, kim tub go!#5:30 Kol 3:5. Ga nob re ejum ngubjing enya tan, sehnge re bo rod ngubjing enya kpee, song kak go ellulagun.

Eltibi ni li bade elbal amale

(Mat 19:9; Mak 10:11-12; Luk 16:18)

31“Bo kpe bung re, ‘Nne awohng awohng no lꞌyehke nkal ewe elbal, nong á nyon nwer ka-e, nyi á me yehke elbal.’ 32Wo, me n kp-n tongo re, Nne awohng awohng no lꞌyehke nkal ewe elbal, eji nnenlum nondiki ki noongo a ne, á kp-e limi re á lim erehbe. Nne awohng awohng no lꞌko nnenkal no bo m-e yehke elbal, á kpꞌlimi erehbe.#5:32 1 Kor 7:10-11.

Eltibi ni li bade enyam anyame

33“Wahn ebtob wuk ana bo tongo ane ba jolo mahne mahne re, ‘Ka jo tir go edaange! Ka kane enyam bi a nyame no go esamahr bi Ntul Esowo!’ 34Wo, me n kp-n tongo re, wahn kꞌjo tir nkpel anyehng anyehng. Kana jo tir elbung! Tibre elbung, eti etul ji Esowo ji. 35Kana jo tir ndi! Tibre ndi, etikunakpade eje ji. Kana jo tir Jerusalem! Tibre Jerusalem, ejahbe ji egburu ntul ji. 36Ka jo tir esi eja! Tibre a nehm ma lim ellv esi anehng re, jol mbarebare, jol a nehm ma lim re, jol nnyakenyake.

37“Nong, wahn jo faange re, ‘Ee,’ tohko jol ano, ‘Eꞌee.’ Ellum anehng anehng ni lꞌjol sehnge ano, lohng goji Ebinne jio.#5:37 2 Kor 1:17; Jems 5:12.

Eltibi ni li bada nfem abongo

(Luk 6:29-30)

38“Wahn ebwuk ana bo bungu re, ‘Nne no lꞌwa ntem elmahr, bo tob wa-e elmahr. Nne no lꞌbahk ntem elmahn, bo tob bahk-e elmahn.’ 39Wo, me n kp-n tongo re, Kana jo sahde ebi nne go eko!#5:39 Mat 26:52-53. Nne lꞌrum-a elkpal go ekpoko eboblum, sennge ekpoko ebobkal ka-e, á kpe-a rum. 40Nne no lꞌgbaame ewobo eja re á kpꞌkoko, kpe yake nkud enya ka-e.#5:40 1 Kor 6:7. 41Nne no lꞌbob-a re, wo jen mmal anyehng a ne, jen mmal ebal a ne. 42Nne no lꞌlem-a ejum, ka-e! Nne no lꞌba re á ba yaame ejum go ega, ka-e!

Ana nne, anebekv ebe bahke jo kor-e

(Luk 6:27-28,32-36)

43“Wahn ebwuk ana bo tongo re, ‘Nne ebjing ewa bahke jo kor-a, nnekv ewa jo sab-a.’ 44Wo, me n kp-n tongo re, Nong, anebekv ebahne jo kor-n. Jo biren nnoobo tv ane ba kp-n suku! Jo limen nnoobo ka ane ba kpo ko-n ekv!#5:44 Rom 12:20-21. Jo kaken ero ka ane ba kpo ka-n ebi mbol mbol, a ane ba kpo nohk-n,#5:44 Elt 7:60. 45eji ń lꞌjol abon ba Nso ejahne no li go ejahbetul.#5:45 Ef 5:1. Tibre á kpo lim njul enye jo ya tub abi ane, a anoobo ane. Á kpo na elahb ka ane ba ma li eno, a ane ba ma li ebi.

46“Anv, ane ba ń kpo kor bo, bo lꞌkor-n, eltuuru anii Esowo bahk-n tuuru? Anv, abakokatak kpehme lim anoa? 47Ń lꞌjo kak abonane ejahne nnyo ba ba, anv, nkpokosi ejum anyi nyi ḿ ma lim? Anv, ane ba ki nyi Esowo kpehme lim anoa? 48Jolen saang, wahn kꞌbel elem ajehng ajehng, ana Nso ejahne no li go ero li saang.

Currently Selected:

Mat 5: ekaNT

Highlight

Copy