Mak 1

Etib bi Jon ji nwohngalahb tiingi no

(Mat 3:1-12; Luk 3:1-18; Jon 1:19-28)

1Mbomannahb a nnoobo etib bi Jisos Kraist Mmon Esowo bi a. 2Mahne mahne nnyehnamahr Aisaya nyono go ege a nwer ana Esowo tongo Mmon ewe re,

“M bahke tumu ntiingetib ewame tv re á gbo-a mbang,

ba lennge mbang ka-a.”

3“Nne noa, kpꞌrabe go elka emahng re,

‘Tuungen mbang nyi Ntul bahke sehnge,

wahn lim tꞌtor.’ ”

4Ane noo bo jo lung-e re Jon, á je go elka emahng, song kehme ane tiingi re, “Gboon ndon go egahne abiafem, wahn bel ewohngalahb, eji Esowo lꞌtahm ka-n go egahne abiafem.” 5Ane kpee ba lene o nfam nyio nyi Judea, a ane kpee ba lene go Jerusalem jo lohngo je goji Jon, song fvvrv abiafem ebo, fere bel ewohngalahb go Jodan. 6Jon jo kake nsol nyi bo limi go anyar nnyam nyi bo kpo lung re ekamel, fere jo gbaange egbaange ngunyam go ebun. Á jo li agohrobi, fere jo yab akehng ekon.

7Á kehm kehme ane tiingi re, “Nne no kpꞌbake go, á li njꞌjoka nne sehnge me. Jol me, n tohkem fꞌfuumu re, me n kehme go ndi fannge alehke akpaketa enye. 8Eltum ename li re, me n jo wohng-n alahb maka maka. Ye ji kpꞌbake, bahk-n wohngo alahb go Etingi Etohko.”#1:8 Elt 2:4.

Ewohngalahb ji Jisos bele no, a elgaare ni nnehm gar-e no

(Mat 3:13—4:11; Luk 3:21-22; 4:1-13)

9Ngare nyio Jisos lohngo go Nasaret ji Galili, ba go Jodan. Jon kehm-e wohngo alahb.

10Jisos lohngo kan go alahb me, á kehm nyehne ejahbetul Esowo kpꞌlennge. Etohko ji Esowo kehm lohngo go elfoongo ni ebbehl, badde ba jol a ne. 11Á kehm wuku ellum go ejahbetul Esowo ni bungu re, “Wo wo li akor-m mmon ewame no kpo kor-m sꞌsehng.”#1:11 Mak 9:7.

12Tvtv ona etohko ji Esowo kehm soro rod-e tahm a ne go elka emahng. 13Á kange elka emahng nio nfung atahl abal. Owo nnehm gar-e no, re á yel go abiafem. Enyam bi kpo jol emahng jolo ona fvfo. Owo enjel nyi Esowo kehm lohngo ba kak-e ebo.#1:13 Luk 22:43; Hib 1:14.

Ana Jisos lungu abasahre nsahre, ane na ani

(Mat 4:12-22; Luk 4:14-15; 5:1-11)

14Ngare nyio, Jon, bo m-e kak go ngbekobo. Jisos kehm tahme song rehng go Galili, song tiingi nnoobo etib bi Esowo. 15Á jo bungu re, “Etingitingi, ngare ebrehng.#1:15 Gal 4:4. Etul bi Esowo ebkabbe. Gboon ndon go egahne abiafem, wahn taame tv nnoobo etib bi Esowo!”

16Eji Jisos jo jen egbuk eto ji Galili, á nyehne abasahre nsahre, ane na abal, Saimon, a Andru ji mmonannyehn Saimon, bo jo kake erim go eto. 17Jisos kehm tongo bo re, “Tahmen toon-m wahn! M bahk-n limi, ń nehm kpe bim nsahre, ḿ bahke fere jo bim ane.”

18Bo kehm soro yake arim ebo, tahm toono Jisos. 19Á kehm jene mmokidi, song kpiri Jems, a Jon ba jolo abon Sibidi. Bo woomo egbang, jo baade arim ebo. 20Jisos kehm mahke bo. Bo kehm soro tahm nde ebo, a alokeltum ebe sa go egbang, tahm toono Jisos.

Nne no bele ebi etohko go ege atahng

(Luk 4:31-37)

21Bo kehm song rehng go ejahbe ji bo jo lung re Kapenium. Efung Esabat Jisos kehm ba yel ekpꞌkpa ero kehm kehme eltibi. 22Ane ba wuk-e no, kpo bo esi sehng tib go mbang nyi á jo tib. Á jolem ana atꞌtibi baka gana ba atahm. Á jo tibi area, ana nne no kpi nsahm.

23Nne no bele ebi etohko go ege atahng kehm soro lohng, ba yel ekpꞌkpa ero jio. 24Á kehm rabe tong Jisos re, “Jisos ji Nasaret, a ba jen ko go egahre? A ba re wo ba ranng-ra? N kpꞌkahne elkohn nne no a li no. A li mbarebara nne no Esowo. Ebi ajehng ajehng wa wobem go ega eltim. A lohng goji Esowo ba.”

25Jisos kehm rabe tong ebi etohko jio re, “Rahke ewok, wo lohng nne noa!”

26Ebi etohko jio limi nne noo, á soro gbo ngbabohngo, fere rabe tiim, kehm soro lohng nne noo.

27Ane kpee ba jolo o, kpo bo esi area. Bo kehm kehme elbungu atemtem re, “Jen ji jo jol ana? Nkpokosi anyi a? A eltibi ni nfenfe ni! Nne noa kpi nsahm nyi abi atohko kpo wuk-e, á lꞌbung a bo.”

28Elgahm ni Jisos kehm yeere na yeere go nfam nyio nyi Galili kpee.

Ana Jisos limi ane gbalee, bo nob

(Mat 8:14-17; Luk 4:38-41)

29Jisos, Jems, a Jon, bo kehm lohngo go ekpꞌkpa ero jio asongo go etahk ji Pita a Andru lene no. 30Saimon, nnyehn nkal ewe noongo edilnong, jo yam arumbum. Jisos rehnge kan a me, bo kehm-e tongo bada nnenkal noo. 31Á kehm jeere kohl-e, song jabb-e go ebo, tab-e yiimi. Á soro nob arumbum nyao. Nnenkal noo kehm tahme fvfo, kehme bo loko.

32Elgung ba kan a me, ngare nyi njul ma lahm, ane kehm koko aneb ayam kpee, a aneb abi atohko ba goji Jisos. 33Ane kpee ba jolo ejahbe jio kehm ba nyo na nyo go mbutahk. 34Jisos limi aneb ayam gbalee, bo nob elkohn eyam abehng abehng, fere kam ane gbalee abi atohko. Á taamem re, abi atohko nyao bung ejumjum.#1:34 Elt 16:17-18. Tibre bo jo kꞌkahn nne no Jisos li no.

Ana Jisos bungu alum Esowo go Galili

(Luk 4:42-44)

35Etoono efung behko Jisos kehm fungu atv atv tahm song rehng go edi ji li soom, song kak ero.

36Saimon, a atem bako go kehm tahme, kehm-e elsebe. 37Eji bo nyehn-e no, bo kehm-e tongo re, “Nsoo, ane kpee kp-a sebe.”

38Jisos kehm faange re, “Wahr tahmen go abon ajahbe bako. M bahke tob bung alum Esowo tong bo. Tibre nya nya wahng ka m ba no.”

39Á kehm mehle, kehme elyannge go Galili, jo bung alum Esowo go ntahk ero, fere kam ane abi atohko yehke go bo a ntim.

Ana Jisos limi nne abili, á nob

(Mat 8:1-4; Luk 5:12-16)

40Efung abehng nne abili kehm bake goji Jisos, ba gbo jamm-e alahng, kehm-e gboongo re, “Lꞌfere kor-a, lim-m, me n nob.”

41Jisos, ndon kehm-e fili. Á kehm tanne ebo, koor-e, kehm-e tongo re, “Kor-m kor, wobnob.”

42Tvtv o nnenlum noo kehm soro nob abili nyao.

43Jisos kehm-e rehke tꞌtahne, fere tong-e re á song. 44Á kehm-e tongo re, “Wuungu atung, n kp-a tongo re, wo kꞌtiki tong nne awohng awohng jia ana! Song goji nlimajom, á feed-a, wo song lim njom nyi Moses tibi no, eji ane lꞌkahn re wobnob.”

45Nne noo kehm tahme, kehm kehme eltiingi nkpokosi nyi m-e lim, tong ane edi ajehng ajehng. Á tooro area, kehn jol Jisos kꞌkpe ma lohng go nfam gbul gbul gbuul. Á jo fere jen eje adi nya li soom. Ane jo kpe lohng edi ajehng ajehng, song kpir-e.

Currently Selected:

Mak 1: ekaNT

Highlight

Copy