Zãa 11

Lazaa gaa

1Gbɛ̃́ pɔ wì mɛ Lazaa lɛ́ gyãkɛ Bɛtani, wɛ̃lɛ pɔ aà dãeɔ Maliama ń Maatao kuu. 2Maliamapi mɛ́ nɔɛ pɔ tulale kà Diiwa à aà gbá wàa ń a mikão ũ. 3Ɔ̃ Lazaa dãepiɔ lɛkpãsãkɛ̀ Yesuɛ aa mɛ̀: Dii, n gbɛ̃na lɛ́ gyãkɛ. 4Kɛ́ Yesu yãpi mà à mɛ̀: Gyãpi miá ga no. Kɛ́ Lua zɔ̃ɔkɛ bɔ gupuau yãiɛ, Lua Nɛ i tɔbɔ a musu. 5Yesu ye Maata ń aà dãunao ń Lazaaozi. 6Aà Lazaa gyãkɛa baomaa gbɛa à kɛ̀ gu pɔ a kuu lɔ gɔɔ pla.

7Bee gbɛa ɔ̃ a ò a iwaɔnɛ: Wà ɛa gɛ́ Yude. 8Ɔ̃ aà iwaɔ òɛ̀: Mɛtulu, Yudaɔ ye wà n papa ń gbɛo i gɛ̃gɛ̃o, ɔ̃ ń ye wà ɛa gɛ́ we lɔa? 9Yesu mɛ̀: Fãanɛ do lɛɛlu kuɛpla nolo? Gbɛ̃́ pɔ lɛ́ bɛbɛ fãanɛ lí kpá pɔao, kɛ́ àlɛ gu'e dũniaɛ bee gupuai yãi. 10Tó àlɛ bɛbɛ gwãasĩna, a kpá pɔaɛ, kɛ́ a gupua vĩo yãi.

11Yãpi oa gbɛa Yesu ònɛ́: Wá gbɛ̃na Lazaa i'ò. Malɛ gɛ́ aà vuiɛ. 12Ɔ̃ aà iwaɔ òɛ̀: Dii, tó àlɛ i'oɛ, a aafia'e. 13Lazaa gaa yã Yesu lɛ́ onɛ́, ɔ̃ aalɛ e i'oaɛ sĩana. 14Ɔ̃ Yesu ònɛ́ sa wasawasa: Lazaa gàɛ. 15Ma pɔ kɛ̀ na kɛ́ má ku weo, kɛ́ à e à ma naaikɛ. Wà gɛ́ aà kĩi. 16Ɔ̃ Toma pɔ wì mɛ Sìa ò a gbɛ̃́ɔnɛ: Wà gɛ, wí ga ń Diio sɔ̃.

17Kɛ́ Yesu kà we, a è Lazaa vĩa gɔɔ siiɔ̃den we. 18Bɛtani ku Yelusalɛũ saɛ, lon aaɔ̃ taa. 19Yudaɔ bɔ̀ we dasi aa mɔ̀ Maata ń Maliamao kĩi aa ń nɔsɛnininɛ́ an dãɔ gaa yãmusu. 20Kɛ́ Maata mà Yesu lɛ́ mɔ́, à gɛ̀ daiaalɛ. Maliama gɔ̃̀ zɔ̃lɛa bɛ. 21Ɔ̃ Maata ò Yesuɛ: Dii, tó ń ku la yãa, ma dãɔ a gao. 22Baa tia má dɔ̃ kɛ́ yã pɔ ń gbɛ̀a Luawa, a kɛnɛ. 23Yesu òɛ̀: N dãɔ a vu. 24Maata òɛ̀: Má dɔ̃ kɛ́ a vu zĩ́ pɔ gɛɔ vu gɔɔgbɛzãzĩ. 25Yesu òɛ̀: Mamɛ má gbɛ̃́ pɔ ì gɛɔ vu à wɛ̃nikpamá ũ. Baa tó ma naaikɛna gà, aɔ kuɛ. 26Gbɛ̃́ pɔ ku mɛ́ àlɛ ma naaikɛ a ga bauo. N bee sìa? 27Maata òɛ̀: Ao Dii, má sì kɛ́ Mɛsi, Lua Nɛ pɔ wà mɛ̀ a mɔ dũniaun n ũ.

Lazaa vua

28Kɛ́ Maata yãpi ò, à gɛ̀ à a dãuna sìsi, a òɛ̀ asii guu: Mɛtulu mɔ̀, àlɛ n gbɛa. 29Kɛ́ Maliama yãpi mà, à fɛ̀lɛ kpakpa, àlɛ gɛ́ aà kĩi. 30Yesu i gɛ̃ wɛ̃lɛ guu yãao, a ku gu pɔ Maata dàuaalɛ gĩ́aɛ. 31Yudaɔ ku kpɛ́u ń Maliamao, aalɛ aà nɔ̀sɛ niniɛ̀. Kɛ́ aa è, à fɛ̀lɛ kpakpa à bɔ̀, aa bɔ̀ wa tɛaazi, asa aalɛ e àlɛ gɛ́ ɔɔlɔi miaaɛ.

32Kɛ́ Maliama kà gu pɔ Yesu kuu, kɛ́ à aà è, à kùlɛ aà gbázĩ a òɛ̀: Dii, tó ń ku la yãa, ma dãɔ a gao. 33Yesu è àlɛ ɔɔlɔ mɛ́ gbãade pɔ mɔ̀aanɔpiɔ lɛ́ ɔɔlɔ sɔ̃. Ɔ̃ tolobi zùaagu, aà pɔ yà. 34Ɔ̃ à mɛ̀: A aà vĩ̀ má ni? Aa wèwà aa mɛ̀: Dii, mɔ ǹ gwa. 35Yesu wɛ'ikàu. 36Ɔ̃ Yudaɔ mɛ̀: À gwa lá a yeaazi. 37Ɔ̃ an gbɛ̃eɔ mɛ̀: Aà gbɛ̃́ pɔ à vĩ̀a wɛ́ wɛ̃̀, a fɔ̃ gi Lazaa ga yãao le?

38Kɛ́ Yesu lɛ́ gɛ́ miapi kĩi, ɔ̃ tolobi zùaagu lɔ. Miapiá gbɛ'ɛɛ, gbɛ̀ gbɛ̃̀nɛ ta a lɛ́lɛ. 39Yesu mɛ̀: À gbɛpi go ɛpilɛ. Ɔ̃ gɛpi dãe Maata òɛ̀: Dii, à yaikɛ̀ kɔ̀, asa à kɛ̀ gɔɔ siiɔ̃ɛ. 40Yesu òɛ̀: Mi onɛ, tó nlɛ ma naaikɛ, ńyɔ̃ Lua zɔ̃ɔkɛ eo le? 41Ɔ̃ wà gbɛpi gò. Yesu wɛsɛ̀ musu à mɛ̀: Baa, ma n saaukɛ̀ kɛ́ n ma yãmà. 42Má dɔ̃ kɛ́ niɔ ma yãma gɔɔpii, ãma má ò màa bila pɔ ku la yãiɛ, kɛ́ aa e si mmɛ n ma zĩ.

43Kɛ́ a ò màa, ɔ̃ à pũ̀na gbãugbãu à mɛ̀: Lazaa, mɔ ǹ bɔ. 44Ɔ̃ gbɛ̃́ pɔ gàpi bɔ̀, pɔlɛ fĩfĩa aà mɛwa mɛ́ zwãa yea aà miwa. Yesu ònɛ́: À pɔ polowà, í aà gbaɛ.

Lɛkpaaĩa Yesuzi

45Yuda pɔ aa mɔ̀ Maliama kĩipiɔ, kɛ́ aa yã pɔ Yesu kɛ̀pi è, aa aà naaikɛ̀ dasi. 46Ãma an gbɛ̃eɔ gɛ̀ Falisiɔ kĩi, aa yã pɔ Yesu kɛ̀ ònɛ́. 47Ɔ̃ sa'onkiaɔ ń Falisipiɔ gbãadeɔ gbɛ̀a kɔ̃kãaawa aa mɛ̀: Gbɛ̃́pi lɛ́ dabudabukɛ dasi, wá sɛ́ kpelewa ni? 48Tó wá tò àlɛ kɛ màa, wa aà naaikɛ piiɛ, Lomadeɔ i mɔ aa wá Lua kpɛ́ ń wá buio suumpa pii. 49Ɔ̃ an gbɛ̃do Kaaifa pɔ dɛ sa'onkia ũ wɛ̃ bee ònɛ́: Á yãe dɔ̃o. 50Kɛ́ gbɛ̃́ mɛndo gaa gbɛ̃́ɔ gbɛu maa dɛ wá bui midɛala, á dɔ̃o le? 51I yã bee o ń azĩaoo. Kɛ́ a dɛ sa'onkia ũ wɛ̃ bee yãi, ɔ̃ à ãnabikɛkɛ̀, à dɔ̀aa à lá Yesu a su ga a bui gbɛu ò. 52I kɛ a bui adoo, ń Lua nɛ pɔ fãaaaɔɛ lɔ, kɛ́ aà ń kɛ mɛ̀ doũ. 53Za zĩ́ bee ɔ̃ gbãadepiɔ zɛ̀o wà Yesu dɛ. 54A yãi tò Yesu i bɔ gupuau Yudaɔ guu lɔo. Ɔ̃ à gɛ̀ zɔ̃ɛwia pɔ ku gbáa lɛ́a, wì mɛ Ɛflaiũ. À gɔɔplakɛ̀ we ń a iwaɔ.

55Yudaɔ Gɛ̃amusu dikpɛ kãikũ̀. Wà bɔ̀ zɔ̃ɛwiaɔ guu dasidasi, wà gɛ̀ Yelusalɛũ e dikpɛpi àɔ ka gbãbɔa yãi. 56Wàlɛ Yesu wɛɛlɛ, wa zɛa Lua ua, wàlɛ kɔ̃lala wà mɛ̀: Á è kpelewai? A we mɔ dikpɛue? 57Sa'onkiaɔ ń Falisiɔ dìlɛ tó gbɛ̃e Yesu kukĩi dɔ̃, aà onɛ́ kɛ́ wà e wà aà kṹ.

Currently Selected:

Zãa 11: Boo2024

Highlight

Copy