Zãa 21

Yesu azĩa ɔlɔa a iwaɔnɛ isidalɛ

1Bee gbɛa Yesu ɛ̀a à azĩa ɔlɔ̀ a iwaɔnɛ lɔ Tibelia isidalɛ. Lá à azĩa ɔlɔ̀nɛ́n kɛ: 2Simɔ Piɛɛ ku sãnu ń Toma pɔ wì mɛ Sìao ń Kana pɔ ku Galile gbɛ̃́ Natanaɛlio ń Zebede nɛɔ ń Yesu iwa gbɛ̃ɔn pla pãleɔ. 3Simɔ Piɛɛ ònɛ́: Malɛ gɛ́ kpɔwɛiɛ. Ɔ̃ aa òɛ̀: Wapiɔ sɔ̃ wá gɛ́nnɔɛ. Ɔ̃ aa gɛ̀ gɛ̃̀ go'ilɛna guu, ãma aai pɔe e aa kũ̀ gwã beeo.

4Kɛ́ gu lɛ́ dɔ, Yesu zɛa gɔ̃sɔ̃lɛ, ãma aà iwaɔ i dɔ̃ kɛ́ aapi no. 5Ɔ̃ à lɛzù, à ń lá à mɛ̀: Gbɛ̃́ɔ, i kpɔe e á kũ̀o le? Aa mɛ̀: Aawo! 6Ɔ̃ a ònɛ́: À bafã gó ɔplaai, á kpɔ kṹ. Kɛ́ aa fã̀, aa kpɔ kũ̀ dasidasi, aa fùa sɛi. 7Ɔ̃ iwa pɔ Yesu yeaazipi ò Simɔ Piɛɛɛ: Diiɛ. Piɛɛ ula daao. Kɛ́ a mà wà mɛ̀ Diiɛ, ɔ̃ à a ula sɛ̀ a dà, à kùsi íwa. 8Iwa kĩniɔ lɛ́ bapi galɛ, à pà ń kpɔo, aalɛ suò ń góo, asa aa zã̀ ń gɔ̃sɔ̃lɛoo, a dɛ gãsĩsuu ɔaa do taalao.

9Kɛ́ aa bùa baa, aa pɛ̃ɛ è kalɛa we ń kpɔo kpaa tɛ́a. 10Yesu ònɛ́: À mɔ ń kpɔ pɔ á kũ̀ tia keeɔ. 11Ɔ̃ Simɔ Piɛɛ gɛ̃̀ gó guu, à ba gàlɛ a bùaò sĩsĩa, à pà ń kpɔ gbɛ̃̀nɛɔ mɛn basoplakwi ń aaɔ̃o. Baa kɛ́ a dasi màa, ba i kɛ̃o. 12Yesu ònɛ́: À mɔ pɔble. Aà iwae i fɔ̃ lɛbɔ̀ à aà là dén aà ũio, asa aa dɔ̃ kɛ́ Diiɛ. 13Yesu mɔ̀ à pɛ̃ɛ sɛ̀ a kpàmá. Màa a kɛ̀ ń kpɔo lɔ. 14Yesu azĩa ɔlɔa a iwaɔnɛ gɛ̃n aaɔ̃den we aà bɔa gau gbɛa.

15Kɛ́ aa pɔblè wa làa, Yesu Simɔ Piɛɛ là à mɛ̀: Zãa nɛ Simɔ, ń yemazi dɛ lá gbɛ̃́ɛ beeɔ yemazilaa? A wèwà à mɛ̀: Ao Dii, ń dɔ̃ kɛ́ má yenzi. Yesu òɛ̀: Blɛ kpa ma sãnɛbɔlɔɔwa. 16A gɛ̃n plaade Yesu ɛ̀a à aà là lɔ: Zãa nɛ Simɔ, ń yemazia? A wèwà à mɛ̀: Ao Dii, ń dɔ̃ kɛ́ má yenzi. Yesu òɛ̀: Ma sãɔ dãmɛɛ. 17À aà là a gɛ̃n aaɔ̃de: Zãa nɛ Simɔ, ń yemazia? Kɛ́ Yesu Piɛɛ là a gɛ̃n aaɔ̃de tó a yeazi, aà pɔ yà, ɔ̃ a òɛ̀: Dii, ń yãpii dɔ̃. Ń dɔ̃ kɛ́ má yenzi. Yesu òɛ̀: Blɛ kpa ma sãɔwa. 18Sĩana malɛ onɛ, kɛ́ ń dɛ ɛwaaso ũ, ni pɔɔ da nzĩa ǹ gɛ́ gu pɔ ń yei, ãma tó n zikũ̀, ńyɔ̃ n ɔ poo, gbɛ̃pãle i danɛ, i gɛ́nnɔ gu pɔ ń yeio. 19Kɛ́ a ò màa, Piɛɛ ga pɔ a Lua tɔbɔ ɔ̃ àlɛ o. Bee gbɛa Yesu òɛ̀: Tɛmazi.

20Piɛɛ lìli à iwa pɔ Yesu yeaazipi è tɛńzi. Gbɛ̃́pi mɛ́ sɔ̃kpàlɛ Diizi, à aà là gɔɔ pɔ aalɛ pɔble gbɛ̃́ pɔ a aà kpamái.#Zãa 13.25 21Kɛ́ Piɛɛ aà è, a ò Yesuɛ: Dii, gbɛ̃́ɛ bee sɔ̃ bɛ? 22Yesu òɛ̀: Tó má ye aàɔ ku e mà gɛ mà mɔò, a yã n e má ni? Tɛmazi. 23Ɔ̃ yãpi fã̀aa Yesudeɔ guu, kɛ́ iwapi a gao. Ãma Yesu i oɛ̀ a gao no. À mɛ̀ tó á ye aàɔ ku e à gɛ mɔò, a yã aà e má niɛ?

24Iwapi mɛ́ yãɛ beeɔ seelade ũ, aapi mɛ́ láɛ bee kɛ̃̀, mɛ́ wá dɔ̃ kɛ́ aà seeladekɛ naai vĩ.

25Yesu yãpãleɔ kɛ̀ lɔ, aa dasi. Tó wàlɛ kɛ̃́ lá guu dodo pii, malɛ e dũnia azĩawa a fɔ̃ taala pɔ wa kɛ̃piɔ sio.

Currently Selected:

Zãa 21: Boo2024

Highlight

Copy