Zãa 5

Gyãe gbãgbãa kpaa'okĩi

1Bee gbɛa Yudaɔ dikpɛe kà, ɔ̃ Yesu ɛ̀a gɛ̀ Yelusalɛũ. 2Kpaa'okĩi ku we Sãbɔlɛ saɛ, wì mɛ Bɛzata ń hɛbɛluyão. Kpaa'okĩipi velanda vĩ sɔo, 3gyãeɔ wulɛau dasidasi, vĩ̀aɔ ń kɔ̃̀ɔɔ ń gbɛ̃́ pɔ an gu imiaɔ. 4-5Gɔ̃ɛe ku we àlɛ gyãkɛ à kà wɛ̃̀ bla plasai. 6Kɛ́ Yesu aà è wulɛa we, a dɔ̃̀ kɛ́ àlɛ gyãkɛ à gɛ̃̀gɛ̃ maamaaɛ, ɔ̃ a òɛ̀: Ń ye ǹyɔ̃ aafiaa? 7Gyãepi wèwà à mɛ̀: Mae, má gbɛ̃e vĩ aà ma da í guu gɔɔ pɔ à dèedeeo. Tó malɛ gɛ́ gɛ̃ui, gbɛ̃pãle ì dɔaa gɛ̃ ma ãaɛ. 8Yesu òɛ̀: Fɛlɛ ǹ zɛ ǹ n pɛ sɛ ǹ taa'o. 9Wegɔ̃ɔ gɔ̃ɛpi aafia è. À a pɛ sɛ̀, à taa'ò.

Gɔɔpiá kãmabogɔɔɛ, 10ɔ̃ Yuda gbãadeɔ ò gɔ̃ɛ pɔ gbã̀gbãpiɛ: Kãmabogɔɔn gbã. I kũ ǹyɔ̃ n pɛ sɛao.#Zel 17.21 11A wèmá à mɛ̀: Gbɛ̃́ pɔ ma gba aafia mɛ́ òmɛɛ mà a pɛ sɛ mà taa'o. 12Ɔ̃ aa aà là aa mɛ̀: Demɛ ònɛ ǹ n pɛ sɛ ǹ taa'oi? 13Gbɛ̃́ pɔ gbã̀gbãpi dɔ̃ dé no, asa Yesu gɛ̃̀lɛ bila pɔ ku we guuɛ. 14Bee gbɛa Yesu aà è Lua ua, ɔ̃ a òɛ̀: Ma, n aafia è. Nsu duunakɛ lɔo, kɛ́ yã pɔ a vãi dɛ beea su n leo yãi. 15Ɔ̃ gɔ̃ɛpi gɛ̀ a ò Yuda gbãadeɔnɛ Yesu mɛ́ tò a aafia è.

16Ɔ̃ gbãadepiɔ fɛ̀lɛ ń ĩadaa Yesuwao, kɛ́ ì yã bee taaɔ kɛ kãmabogɔɔzĩ yãi. 17Ɔ̃ Yesu yãzãsìmá à mɛ̀: Ma Mae ìɔ zĩkɛ kãmabosaiɛ, màa malɛ kɛ sɔ̃. 18Yã bee yãi gbãadepiɔ lɛ́ Yesu wɛi dɛ a káaua. I kɛ kɛ́ ìli kãmabogɔɔ yãdao ado yãi no, kɛ́ ì mɛ Lua mɛ́ a Mae ũ, àlɛ saakpa ń Luao yãiɛ.

Lua Nɛ iko

19Yesu ɛ̀a à a zãsìmá à mɛ̀: Sĩana malɛ oɛ́, Lua Nɛ lí fɔ̃ yãe kɛ̀ ń azĩaoo, sema yã pɔ a è a Mae lɛ́ kɛ baasio, asa yã pɔ aà Mae ì kɛ pii, bee aà Nɛpi ì kɛ sɔ̃. 20Asa Mae Lua ye a Nɛzi, ɔ̃ ì yã pɔ ì kɛ ɔlɔɛ̀ pii. A yã pɔ a zɔ̃ɔ dɛ beea ɔlɔɛ̀, i bɔ á saɛ. 21Lá Mae Lua ì gɛɔ vu à wɛ̃nikpamá, màa aà Nɛ ì wɛ̃nikpa gbɛ̃́ pɔ á yeiɔwa. 22Mae Lua lí yãkpalɛkɛ ń gbɛ̃eoo, à yãkpalɛkɛa iko kpà a Nɛwa piiɛ, 23kɛ́ gbɛ̃pii aà Nɛ kpɛla, lá aaì Mae Lua kpɛlawa. Gbɛ̃́ pɔ lɛ́ Lua Nɛ kpɛlao lɛ́ aà Mae pɔ aà zĩ̀ kpɛlao.

24Sĩana malɛ oɛ́, gbɛ̃́ pɔ lɛ́ ma yãma mɛ́ àlɛ gbɛ̃́ pɔ ma zĩ naaikɛ wɛ̃ni laasai vĩ. Yã a zɔ̃lɛwào, à bɔ̀ gau, à gɛ̃̀ wɛ̃ni guuɛ. 25Sĩana malɛ oɛ́, a gɔɔ lɛ́ mɔ́, à kà kɔ̀, kɛ́ gɛɔ Lua Nɛ yã'oa ma, an gbɛ̃́ pɔ màɔ i vu. 26Lá Mae Lua wɛ̃nikpaama iko vĩ, à wɛ̃nikpaama iko kpà a Nɛwa sɔ̃.

27À yãkpalɛkɛa iko kpàwà lɔ, kɛ́ a dɛ Gbɛ̃nazĩn Nɛ#Dan 7.14 ũ yãi. 28Ásu to bee bɔ á saɛo, asa a gɔɔ lɛ́ mɔ́ kɛ́ gɛ pɔ ku miauɔ aa aà lɔɔ ma, 29aai bɔlɛ pii. Maakɛnaɔ i vu wà gɛ̃ wɛ̃ni guu, vãikɛnaɔ sɔ̃ yãzɔ̃lɛama guu.#Dan 12.2 30Mili fɔ̃ ma yãe kɛ̀ ń mazĩaoo. Mi yãkpalɛkɛ lá a òmɛɛwaɛ, mɛ́ mi yãkpalɛkɛ a zɛ́wa, asa mili mazĩa pɔeã wɛɛlɛo, sema gbɛ̃́ pɔ ma zĩpi pɔ.

Yesu iko seeladeɔ

31Tó má dɛ mazĩa seelade ũ, ma yã naai vĩo. 32Seelade pãle ku ì ma yã'o, mɛ́ má dɔ̃ kɛ́ ma yã pɔ ì o naai vĩ. 33Baa apiɔ, a gbɛ̃́ɔ zĩ̀ Zãawa, ɔ̃ à sĩana òɛ́.#Zãa 1.19 34Má daa gbɛ̃nazĩna seeladekɛ gãuo, malɛ bee oɛ́ kɛ́ à e bɔ zia yãiɛ. 35Zãa mɛ́ filia pɔ naa àlɛ gupu ũ, ɔ̃ a we a pɔnakɛ̀ aà gupuai gɔɔpla. 36Yã pɔ Mae Lua dàmɛɛ mà kɛɔ, yã pɔ malɛ kɛpiɔ dɛɛ́ seela ũɛ kɛ́ Mae Lua mɛ́ ma zĩ. Ma seelapi dɛ Zãa pɔla. 37Ma Mae pɔ ma zĩ ma yã'ò lɔ. I aà yã'oa ma ziio, mɛ́ i wɛsiaalɛo,#Maa 1.11 38mɛ́ aà yã i zɔ̃lɛkĩi e á sɔ̃ guuo, kɛ́ álɛ gbɛ̃́ pɔ a zĩ naaikɛo yãi. 39I mɛkpa Lua yã kyokɛawa, asa iɔ e we á wɛ̃ni laasai eu. Ma yã ɔ̃ lápi lɛ́ o sɔ̃, 40ɔ̃ álɛ gí mɔi ma kĩi à wɛ̃nipi e.

41Malɛ sáau wɛɛlɛ gbɛ̃nazĩnawao, 42ãma má á dɔ̃, má dɔ̃ kɛ́ á ye Luazio. 43Ma mɔ ń ma Mae tɔ́o, ɔ̃ i ma dilɛo. Tó gbɛ̃pãle mɔ̀ ń azĩa tɔ́o, á aà dilɛ. 44Lá i sáau wɛɛlɛkɔ̃wa, ili sáau wɛɛlɛ Lua mɛndonawao, kpelewa á fɔ̃ à ma yãsii? 45Ásu àɔ e mamɛ má gɛ́ ń á yão ma Mae kĩio, Mɔizi pɔ á wɛ́ dɔi mɛ́ a gɛ́ò. 46Tó a Mɔizi yãsì, dɔ̃ a ma yãsì sɔ̃, asa ma yã ɔ̃ a kɛ̃̀. 47Lá i yã pɔ a kɛ̃̀ɔ sio, á ma yãsie?

Currently Selected:

Zãa 5: Boo2024

Highlight

Copy