Luk 18
18
Wabikɛa
1Yesu yãlɛ̀ɛũnɛ́ kɛ́ aaɔ Lua wabikɛ kɔ̃sɔ̃kɔ̃sɔ̃, aasu kpasao yãi. 2À mɛ̀: Yãkpalɛkɛnae mɛ́ ku wɛ̃lɛeu, a Lua vĩa vĩo, mɛ́ ìli gbɛ̃e yãdao. 3Gyaae ku wɛ̃lɛpiu, ìɔ mɔ aà kĩi mɔɔmɔɔ ì mɛ: Zɛmanɔ ma ibɛɛ yãmusu. 4I weio e gɔɔpla. Bee kpɛ a ò azĩawa: Baa tó má Lua vĩa vĩo, mɛ́ mili gbɛ̃e yãdao, 5lá gyaapi lɛ́ ma suuzɔ̃, má zɛaanɔɛ. Tó mi kɛ màao, aà zɛamala laasaiɛ a ma dɛɛ.
6Ɔ̃ Dii mɛ̀: À yãkpalɛkɛn vãi yã'oa ma. 7Lua a zɛ ń a gbɛ̃́ pɔ aalɛ wiilɛwa fãanɛ ń gwãasĩnaoɔo le? A zigbiakɛ ń dɔańlɛo yã? 8Malɛ oɛ́, a zɛńnɔ kpakpaɛ. Ń beeo tó Gbɛ̃nazĩn Nɛ mɔ̀, a a naaikɛna e dũniaua?
9Ɔ̃ à ɛ̀a yãɛ bee lɛ̀ɛũ gbɛ̃́ pɔ aalɛ ńzĩa dilɛ gbɛ̃maa ũ mɛ́ aaìɔ saka gbɛ̃kĩniɔguɔnɛ à mɛ̀: 10Gbɛ̃ɔn plaeɔ mɛ́ gɛ̀ wabikɛi Lua ua, gbɛ̃doá Falisiɛ, gbɛ̃do sɔ̃ ɔsinaɛ. 11Falisipi zɛa, àlɛ wabikɛ. A ò a sɔ̃ guu à mɛ̀: Lua, ma n saaukɛ̀ kɛ́ má dɛ lan dãɔwao, diidiindeɔ, naaisaideɔ, gbãsĩkɛnaɔ ge ɔsinaɛ bee. 12Miɔ lɛye gɔɔ plapla ãsɔ̃a ń ãsɔ̃aoɛ. Pɔ pɔ má è pii mi a kwide bɔnɛ. 13Ɔsinapi sɔ̃, i sɔ̃ńzio, i fɔ̃ wɛsɛ̀ à musu gwà seo. Àlɛ azĩa gbɛ̃gbɛ̃ à mɛ̀: Lua, suuukɛmanɔ, duunkɛnan ma ũ. 14Malɛ oɛ́, gɔ̃ɛpi tà a bɛ Lua siaaanɔ guu, i kɛ Falisipi no. Asa gbɛ̃́ pɔ ì azĩa kãfĩ Lua a aà busaɛ, mɛ́ gbɛ̃́ pɔ ì azĩa busa Lua a aà kãfĩɛ.#Luk 14.11
Kpala pɔ Lua kpàá zĩabusanaɔ pɔɛ
(Mat 19.13-15; Maa 10.13-16)
15Wà mɔ̀ɛ̀ ń ń nɛɔ aà ɔnanamá. Kɛ́ aà iwaɔ è, ɔ̃ aa gìnɛ́. 16Ɔ̃ Yesu nɛɔ sìsi à mɛ̀: À to nɛɔ mɔ ma kĩi, ásu kpanɛ́o, asa kpala pɔ Lua kpàá gbɛ̃́ bee taaɔ pɔɛ. 17Sĩana malɛ oɛ́, gbɛ̃́ pɔ i kpala pɔ Lua kpà yã sí lan nɛwao, a gɛ̃uo.
Ɔde
(Mat 19.16-30; Maa 10.17-31)
18Yudaɔ kiabuie mɔ̀ à Yesu là à mɛ̀: Mɛtulu maa, kpelewa má kɛ mà aizãna ei? 19Yesu òɛ̀: Bɔyãi n mɛ̀ má maai? Gbɛ̃e maao, sé Lua ado. 20Ń yã pɔ Lua dìlɛɔ dɔ̃: Nsuli wulɛ ń gbɛ̃pãle nɔoo. Nsuli gbɛ̃́ dɛo. Nsuli kpãi'oo. Nsuli yãdɔ n gbɛ̃deewao. Nìli n de ń n dao kpɛla.#Bɔa 20.12-16 21Ɔ̃ a òɛ̀: Za ma ɛwaasogɔɔ, má yãpiɔ kũa piiɛ. 22Kɛ́ Yesu bee mà, a òɛ̀: Yã gɔ̃̀nɛ mɛndo. Pɔ pɔ ń vĩ yia pii, ní a ɔ̃a biilɛ taasideɔnɛ, ńyɔ̃ɔ aizɛɛ vĩ luabɛ. Bee gbɛa ní mɔ ǹ tɛmazi. 23Kɛ́ à yãpi mà, aà pɔ siakũ̀, asa ɔde sà gbãngbooɛ. 24Kɛ́ Yesu è aà pɔ siakũ̀ à mɛ̀: Gɛ̃a kpala pɔ Lua kpà guu zĩ'ũ ń aizɛɛdeɔ. 25Yiongo gɛ̃a abaawɛu àa dɛ ɔde gɛ̃a kpala pɔ Lua kpà guula. 26Gbɛ̃́ pɔ aa yãpi màɔ mɛ̀: Demɛ a aizãna e lɔi? 27Yesu wèmá à mɛ̀: Yã pɔ gbɛ̃nazĩna lí fɔ̃ kɛ̀o, Lua ì fɔ̃ kɛɛ.
28Ɔ̃ Piɛɛ mɛ̀: Wa wá pɔpii tò weɛ, ɔ̃ wá tɛnzi fa. 29Ɔ̃ Yesu ònɛ́: Sĩana malɛ oɛ́, gbɛ̃́ pɔ a bɛ tò ge a na ge a vĩiɔ ń a dãunaɔ ge a de ń a dao ge a nɛɔ kia pɔ Lua kpà yãi, 30a ɛa bee taa e dɛ beea maamaa dũnia tiaɛ bee guu, mɛ́ a aizãna e dũnia pɔ lɛ́ mɔ́ guu.
Vĩ̀a baakɛna gbãgbãa
(Mat 20.29-34; Maa 10.46-52)
31Yesu a gbɛ̃ɔn kuɛplaɔ kã̀aaazi, ɔ̃ a ònɛ́: Wálɛ gɛ́ Yelusalɛũɛ. Wekĩi yã pɔ ãnabiɔ kɛ̃̀ Gbɛ̃nazĩn Nɛ yãmusu a pau pii. 32Wa aà kpa buipãleɔwa, wi aà kɛ pɔɔpɔɔ, wi aà sɔ̃sɔ̃, wi lɛ'ikakawà, 33wi aà gbɛ̃ ń flaalao, wi aà dɛ, a gɔɔ aaɔ̃dezĩ i vu. 34Ãma aà iwapiɔ a kee gbáɛo, asa yãpi mi ulɛanɛ́ɛ, aa yã pɔ àlɛ o dɔ̃o.
35Kɛ́ Yesu kà kãi ń Yelikoo, vĩ̀ae zɔ̃lɛa zɛ́lɛ, àlɛ baakɛ. 36Kɛ́ a mà bila lɛ́ gɛ̃, ɔ̃ a ń lá bɔmɛ kɛ̀i. 37Ɔ̃ wa òɛ̀, Yesu Nazalɛti mɛ́ lɛ́ gɛ̃ we. 38Ɔ̃ à lɛzù à mɛ̀: Yesu, Davidi Bui, ma wɛ̃nagwa. 39Gbɛ̃́ pɔ dɔaaaɔ lɛ́ gíɛ̀, aa mɛ̀ aà nilɛ, ɔ̃ aà wiilɛa gbãakũ̀, àlɛ mɛ: Davidi Bui, ma wɛ̃nagwa. 40Yesu zɛ̀ à mɛ̀ wà mɔaanɔ. Kɛ́ à mɔ̀, ɔ̃ Yesu aà là à mɛ̀: 41Bɔ́ ń ye mà kɛnɛi? A wèwà à mɛ̀: Dii, má ye màɔ gu'eɛ. 42Ɔ̃ Yesu òɛ̀: Gu'e. Ma naai pɔ ń kɛ̀ mɛ́ tò n gbãgbã̀. 43Wegɔ̃ɔ à gu'è, ɔ̃ à bɔ̀ tɛaazi, àlɛ Lua saaukpa. Kɛ́ gbɛ̃pii è màa, aa Lua saaukpà.
Currently Selected:
Luk 18: Boo2024
Highlight
Share
Copy
Want to have your highlights saved across all your devices? Sign up or sign in
Boko Bible © SIM International, 2024.
Free Reading Plans and Devotionals related to Luk 18
Journey Through the Gospel of Luke
Faith & Love: A One Year Bible Reading Plan - Part 8
The JESUS Film 24 Day Challenge
