Luk 9

Yesu a iwa gbɛ̃ɔn kuɛplaɔ zĩa

(Mat 10.5-15; Maa 6.7-13)

1Yesu a iwa gbɛ̃ɔn kuɛplaɔ kã̀aaazi, ɔ̃ à ń gbá zɛ́ aaɔ iko vĩ tãa bui piiwa, aa gyãeɔ gbãgbã. 2Ɔ̃ à ń zĩ́ kia pɔ Lua kpà yã waasokɛi, aaiɔ gyãeɔ gbãgbã. 3A ònɛ́: Ásu pɔe sɛ à gɛ́òo, gopana ge babalabɔɔ ge kũsũa ge ɔ̃a ge ula plaade. 4Ua pɔ a pilau àɔ ku we e à gɛ gɛ̃ò zɛ́a. 5Wɛ̃lɛ pɔ wi gbãakpauázio à bɔu, í kɔɔlɛmá an toa ń Luao seela ũ. 6Ɔ̃ aa dà zɛ́u aa bɛ̀bɛ wɛ̃lɛ ń wɛ̃lɛo, aa baonakpànɛ́, aa gyãeɔ gbã̀gbã gupiiu.

7Kɛ́ ki Helodi yãpiɔ mà pii, ɔ̃ à bilikɛ̀, asa gbɛ̃eɔ mɛ̀ Zãa Da'ilɛna mɛ́ bɔ̀ gau, 8gbɛ̃eɔ mɛ̀ Ɛlia mɛ́ bɔ̀ à mɔ̀má, gbɛ̃eɔ mɛ̀ lɔ ãnabi yãaɔ do mɛ́ vù. 9Helodi mɛ̀: Ma Zãa mizɔ̃̀ɛ. Dén gbɛ̃́ pɔ ma aà baomàpi ũi mɔɔ? Ɔ̃ àlɛ wɛɛlɛ à wɛsiaalɛ.

Yesu blɛkpaa bilawa

(Mat 14.13-21; Maa 6.30-44; Zãa 6.1-15)

10Kɛ́ zĩnapiɔ sù, ɔ̃ aa yã pɔ aa kɛ̀ɔ dàu aa sìu Yesuɛ. Ɔ̃ à ń sɛ́ ntɛ̃ɛ à gɛ̀ńnɔ wɛ̃lɛ pɔ wì mɛ Bɛsaida. 11Bila dɔ̃̀, ɔ̃ wà pɛ̀lɛaazi. À gbãakpàńzi à kia pɔ Lua kpà yã'ònɛ́, ɔ̃ à gbɛ̃́ pɔ aa ye aafiaiɔ gbã̀gbã.

12Ĩatɛ̃ busaa iwa gbɛ̃ɔn kuɛplaɔ sɔ̃̀aazi aa òɛ̀: Gbɛ̃́ɔ gbaɛ aa ta pilakĩi ń pɔbleao wɛɛlɛi zɔ̃ɛwiaɔ ń bualoũ pɔ ku kãikãiɔ guu, asa sɛ̃gbã wá kuu la. 13A ònɛ́: Apiɔ à pɔblea kpamá. Aa mɛ̀: Pɛ̃ɛ mɛn sɔo ń kpɔ mɛn plao ɔ̃ wá vĩ. Sema wà gɛ́ blɛ lui bilaɛ baasio. 14Gɔ̃ɛ pɔ ku weɔ kà lan gbɛ̃ɔn ɔaasɔsɔo lɛɛ sɔo taawa (5 000). Ɔ̃ a ò a iwaɔnɛ: À to aa zɔ̃lɛzɔ̃lɛ gãgã gbɛ̃ɔn blakwikwi. 15Ɔ̃ aa kɛ̀ màa aa ń zɔ̃lɛzɔ̃lɛ pii. 16Ɔ̃ à pɛ̃ɛ mɛn sɔo ń kpɔ mɛn plapio sɛ̀, à wɛsɛ̀ musu à baaadàu. Ɔ̃ a ɛ̀'ɛ a kpà a iwaɔwa, aa bìilɛ bilaɛ. 17Ampii aa pɔblè wà kã̀, ɔ̃ wà a miɔna pɔ fɛ̃̀ɔ sɛ̀lɛ gbi kuɛpla.

Piɛɛ Yesu Mɛsikɛ oa

(Mat 16.13-23; Maa 8.27-33)

18Zĩewa kɛ́ Yesu lɛ́ wabikɛ ado, aà iwaɔ mɔ̀ aa aà lè, ɔ̃ à ń lá à mɛ̀: Dé gbɛ̃́ɔ lɛ́ o má dɛ a ũi? 19Aa wèwà aa mɛ̀: Zãa Da'ilɛnaɛ. Gbɛ̃eɔ ì mɛ Ɛliaɛ. Gbɛ̃eɔ ì mɛ ãnabi yãaɔ do mɛ́ vù.#Luk 9.7-8 20Ɔ̃ à ń lá à mɛ̀: Apiɔ sɔ̃, dé álɛ o má dɛ a ũi? Piɛɛ wèwà à mɛ̀: Lua gbɛ̃́ pɔ wì mɛ Mɛsiɛ. 21Ɔ̃ à gìnɛ́ aa yãpi o gbɛ̃eɛ. 22Ɔ̃ à mɛ̀: Sema Gbɛ̃nazĩn Nɛ taasikɛ maamaa. Gbɛ̃zɔ̃ɔɔ ń sa'onkiaɔ ń Mɔizi ikoyãdanɛdeɔ giaazi wì aà dɛ, a gɔɔ aaɔ̃dezĩ i vu.

Gɔ̃a Yesu iwa ũ

(Mat 16.24-27; Maa 8.34-38)

23Ɔ̃ a ò gbɛ̃piiɛ: Tó gbɛ̃́ ye tɛmazi, aà gí a wɛ̃nizi, iɔ a lipãakɔ̃a sɛa lagulɛdɔ, i gbasa tɛmazi. 24Gbɛ̃́ pɔ ye àɔ a wɛ̃ni kũa, wɛ̃nipi a piliwàɛ. Gbɛ̃́ pɔ ɔkpà a wɛ̃nizi ma yãi sɔ̃, ade mɛ́ a zia e. 25Tó gbɛ̃́ gɔ̃̀ dũnia bṹu vĩ, mɛ́ a kpà azĩai à kùa ziawa, bɔ́ ài a èi? 26Tó gbɛ̃́ zɛamanɔ widɛ̀ ge ma yã, Gbɛ̃nazĩn Nɛ a zɛaaanɔ widɛ sɔ̃ɛ, gɔɔ pɔ a mɔ ń a gawio ń a Mae gawio ń a malaikaɔ gawio. 27Sĩana malɛ oɛ́, gbɛ̃́ pɔ aa ku laeɔ gaga kia pɔ Lua kpà esaio.

Yesu lia

(Mat 16.28–17.13; Maa 9.1-13)

28Yã bee oa gbɛa, a gɔɔ la taawa ɔ̃ à Piɛɛ ń Zãao ń Zakio sɛ̀ à dɛ̀dɛńnɔ gbɛsĩsĩ musu wabikɛi. 29Kɛ́ àlɛ wabikɛ, ɔ̃ aà oa lìlɛ, aà ulaɔ lɛ́ tɛkɛ puntaitai. 30Kãndo gɔ̃̀ɔ gbɛ̃ɔn plaeɔ ku we, Mɔizi ń Ɛliaoɛ, aalɛ yã'o ń Yesuo. 31Aa bɔ̀ aa mɔ̀wà ń gawio, aalɛ ãnua pɔ a to Yelusalɛũ yã'o. 32Piɛɛ ń a gbɛ̃́ɔ gɛ̃̀ ń io. Kɛ́ aa vù, aa Yesu gawi è ń gbɛ̃ɔn pla pɔ zɛ aà saɛɔ. 33Kɛ́ gbɛ̃ɔn plapiɔ lɛ́ kɛ̃kɔ̃wa ń Yesuo, Piɛɛ òɛ̀: Mae, a maa wàɔ ku laɛ. Wà lakpɛ dɔ mɛn aaɔ̃, n pɔ do, Mɔizi pɔ do, Ɛlia pɔ do. A dɔ̃ lá álɛ oo. 34Kɛ́ àlɛ o màa, lounaa kũ̀aamá. Kɛ́ aa gɔ̃̀ ka a guu, vĩa ń kṹ. 35Ɔ̃ yã'oae bɔ̀ lounaapiu à mɛ̀: Gbɛ̃́ɛ beeá ma Nɛɛ. Ma aà sɛ̀, à aà yãma.#Isa 42.1; Soũ 2.7; Luk 3.22 36Yã'opi maa gbɛa aa è Yesu mɛ́ gɔ̃̀ we ado. Iwapiɔ ń lɛ́ fɔ̃̀, aai yã pɔ aa è o gbɛ̃eɛ gɔɔ beeo.

Yesu nɛgɔ̃ɛ tãade gbãgbãa

(Mat 17.14-23; Maa 9.14-32)

37Kɛ́ gu dɔ̀, aa pìla sĩ̀sĩpiwa, ɔ̃ bila mɔ̀ dai Yesulɛ. 38Bila guu gɔ̃ɛe pũ̀na à mɛ̀: Mɛtulu, n yã na! Ma nɛ gwaa, asa ma nɛ pɔ má vĩn we. 39Tãa ì fɛlɛwà, ɔ̃ ì wiilɛ kãndo. Ì aà zĩazĩa e aà lɛ'i fula bɔlɛ, ì ĩadawà, ìli gowà kpaao. 40Ma wabikɛ̀ n iwaɔwa aa tãapi go, ɔ̃ aa fùa. 41Yesu mɛ̀: Gbãgbɛ̃ dɔɔsai luanaaikɛnsaiɔ! Máɔ kuánɔ e bɔɛ ni? Máɔ mɛnakɛánɔ e bɔɛ ni? Mɔ ń n nɛpio la. 42E nɛpi àɔ gɛ́ sɔ̃iaazi, ɔ̃ tãapi aà nɛ̀, à aà zĩ̀azĩa. Ɔ̃ Yesu gì tãapiɛ à nɛpi gbã̀gbã, ɔ̃ à aà kpà aà maewa. 43Lua iko zɔ̃ɔ yãpi bɔ̀ gbɛ̃pii saɛ.

Gbɛ̃pii lɛ́ gɔ̃̀ ɛlɛa Yesu yãkɛawa, ɔ̃ a ò a iwaɔnɛ: 44Àɔ yãɛ bee kũa á nɔ̀sɛ guu. Wa Gbɛ̃nazĩn Nɛ na gbɛ̃́ɔnɛ ń ɔzĩ tia. 45Aai yãpi gbá dɔ̃o, a mi ulɛanɛ́ɛ, ɔ̃ aai mao, mɛ́ aa yãpi laawà vĩakɛ̀.

Tɛa Yesuzi

(Mat 8.19-22, 18.1-5; Maa 9.33-40)

46Ɔ̃ aa fɛ̀lɛ ń lɛkpaao dɛakɔ̃a yãmusu. 47Yesu laasoo pɔ ku ń nɔ̀sɛ guu dɔ̃, ɔ̃ à nɛ sɛ̀ a zɛ̀ a saɛ. 48A ònɛ́: Gbɛ̃́ pɔ nɛɛ bee taa dìlɛ ma iwakɛ yãi, ade ma dilɛɛ. Gbɛ̃́ pɔ ma dilɛ sɔ̃, ade gbɛ̃́ pɔ ma zĩ dìlɛɛ. Á gbɛ̃́ pɔ dɛ gbɛ̃́ kpɛɛ ũ á guu mɛ́ zɔ̃ɔ.

49Ɔ̃ Zãa yãsɛ̀ à mɛ̀: Mae, wa gbɛ̃e è àlɛ tãago ń n tɔ́o, ɔ̃ wá ye giɛ̀, kɛ́ ìliɔ tɛwázio yãi. 50Ɔ̃ Yesu òɛ̀: Ásu giɛ̀o, asa gbɛ̃́ pɔ i ibɛlɛsɛánɔo á baakpɛɛɛ.

51Kɛ́ Yesu taa luabɛ gɔɔ kà kãi, à mipɛ̀ Yelusalɛũwa. 52Ɔ̃ à gbɛ̃́ɔ gbàɛ aa dɔaaɛ. Aa gɛ̀ gɛ̃̀ Samali busu zɔ̃ɛwiae guu sɔukɛiɛ̀. 53Ɔ̃ wɛ̃lɛpideɔ i aà dilɛo, kɛ́ à mipɛ̀ Yelusalɛũwa yãi. 54Kɛ́ aà iwaeɔ Zaki ń Zãao è màa, aa mɛ̀: Dii, ń ye wà o tɛ́ bɔ musu à mɔ kũmá yã?#2 Kia 1.9-16 55Ɔ̃ Yesu lìli à gìnɛ́. 56Ɔ̃ aalɛ gɛ́ wɛ̃lɛ pãleu.

57Kɛ́ aa bɛ zɛ́u, gbɛ̃e mɔ̀ a ò Yesuɛ: Gu pɔ nlɛ gɛ́u pii, máɔ tɛnziɛ. 58Yesu òɛ̀: Gbɛ̃gbonaɔ ń tòo vĩ, bãɔ ń sakpɛ vĩ. Gbɛ̃nazĩn Nɛ sɔ̃ a ĩampakĩi vĩo. 59Yesu ò gbɛ̃pãleɛ: Mɔ ǹ tɛmazi. Ɔ̃ gbɛ̃́pi mɛ̀: Dii, to e ma de'ia kpagui gĩ́a. 60Yesu òɛ̀: Tó gɛɔ ń gɛɔ vĩ. Mpi sɔ̃, gɛ́ kia pɔ Lua kpà baokpainɛ́. 61Gbɛ̃pãle ò lɔ: Máɔ tɛnzi Dii, ãma to mà gɛ́ lɛzai ma bɛdeɔwa gĩ́a.#1 Kia 19.20 62Yesu òɛ̀: Gbɛ̃́ pɔ soona na a ɔzĩ mɛ́ àlɛ a kpɛ gwa, ade i kɔ̃si ń kpala pɔ Lua kpàoo.

Currently Selected:

Luk 9: Boo2024

Highlight

Copy