Maatiyu 16

Ardiiɓe Ngiɗi Waɗaneeki Kayɗiniiɗum

(Markus 8.11‑13; Luka 12.54‑56)

1Faarisanko'en e Saadusanko'en ngari to Yeesu, e ɓe ngiɗi foondukimo, sey ɓe mbi'imo o waɗanaɓe goɗɗum kayɗiniiɗum ƴiwoyɗum to Allah.#Maat 12.38; Luk 11.16. 2Yeesu nootii, wi'iɓe, “To naange hiirii, dow woojii, on mbi'a, ‘Jaango njayri wooɗay.’ 3Ɗonmaa to subaka waɗii on ngi'ii dow woojii e woodi duule koo toye, on mbi'a, ‘Hande ɗum waɗay iyeende.’ On mbaawi raaruki ko woni e dow andon ko waɗata, ammaa on mbaawataa faamuki ma'ana kuuɗe ɗe ngaɗaymi. 4Yimɓe jaamanu ɗu'um kalluɓe ɓe kulataa Allah, e ɓe ngiɗi holleeki goɗɗum kayɗiniiɗum, ammaa walaa ko ɗum hollataɓe sey ni ko heɓuno Annabi Inuusa.”#Maat 12.39; Luk 11.29.

Sey o aliɓe o dilli.

Ƴuufinirɗum Faarisanko'en e Saadusanko'en

(Markus 8.14‑21)

5Nde tokkuɓemo kuuli fongo mbeela, ɓe ngi'i ɓe ngejjitii ɓe ngardoya e buroodi. 6Sey Yeesu wi'iɓe, “Paamee, ngaɗee hakkiilo e ƴuufinirɗum Faarisanko'en e Saadusanko'en.”#Luk 12.1.

7Sey tokkuɓemo meddi hakkunde maɓɓe, ɓe mbi'i, “O wi'u non ngam en ngaddaayi buroodi.”

8Nde Yeesu faami ko ɓe mbi'ata, sey o ƴamiɓe, o wi'ii, “Onon gooduɓe hoolaare seɗɗa, ngam ɗume meddoton dow on ngalaa buroodi? 9Haa jooni on paamaayi? On ciftoraayi no nyamnirmi yimɓe 5,000 e buroodi jowi, e kondooje sappo e ɗiɗi ɗe ɓoptuɗon e keewi horaano?#Maat 14.17‑21. 10Ɗonmaa on ciftoraayi no nyamnirmi yimɓe 4,000 e buroodi joweeɗiɗi, e kondooje joweeɗiɗi ɗe ɓoptuɗon e keewi horaano?#Maat 15.34‑38. 11No ɗum waɗi on paamaayi naa' dow buroodi metaymi? Mi wi'ii paamanee ƴuufinirɗum Faarisanko'en e Saadusanko'en.”

12Nden tokkuɓemo keɓti naa' e mo metanaɓe ɓe paama dow ƴuufinirɗum gaɗeteeɗum nder buroodi, ammaa ɓe ngaɗa hakkiilo e ekkitinol Faarisanko'en e Saadusanko'en.

Biiturus Wi'ii Yeesu Woni Almasiihu

(Markus 8.27‑30; Luka 9.18‑21)

13Nde Yeesu wari leydi Kaysaariya Filibi, sey o ƴami tokkuɓemo, o wi'i, “Moye yimɓe mbi'ata Ɓii Neɗɗo woni?”

14Sey ɓe mbi'i, “Woɓɓe e mbi'a a Yahaya Gaɗoowo Baptisma. Woɓɓe boo e mbi'a a Annabi Iliya. Nden woɓɓe e mbi'a a Annabi Irmiya koo go'oto nder annabo'en.”#Maat 14.1,2; Mar 6.14,15; Luk 9.7,8.

15O wi'iɓe, “Ammaa onon, moye mbi'otonyam?”

16Sey Siiman Biiturus nootii, wi'i, “An woni Almasiihu, Ɓiɗɗo Allah mo yonki.”#Yah 6.68,69.

17Yeesu nootii wi'imo, “A barkiɗinaaɗo, Siiman ɓii Inuusa, ngam naa' ɗum neɗɗo wi'imaaka, sey ni Nyaako am Mo Dow. 18E mi wi'imaa, an woni Biiturus, waato Tafaare. Dow tafaare nden njooɗinaymi tokkuɓeyam. Mayde fuu e bawɗe mayre waawataa jaalooɓe. 19Mi hokkete maɓɓitirkoy Laamu Allah, fuu ko kaɗuɗaa e duuniyaaru, Allah Mo Dow jaɓi. Ɗonmaa fuu ko aluɗaa ɗum waɗa e duuniyaaru, Allah Mo Dow jaɓii.”#Maat 18.18; Yah 20.23.

20Sey Yeesu haɗi tokkuɓemo to' ɓe mbi'aka koo moye kanko woni Almasiihu.

Yeesu Wi'ii No Mayrata

(Markus 8.31—9.1; Luka 9.22‑27)

21Daga ngel ɗon carel Yeesu fuɗɗi wiiki tokkuɓemo doole o yaha Urucaliima, o yara bone ɗuɗɗum to juuɗe mawɓe yimɓe, e mawɓe ardiiɓe diina, e moodiɓɓe Attawra, nden o waree. Nder nyalnde tatawre boo ɗum umminaymo.

22Sey Biiturus noddimo wuttudu go'o fuɗɗi haɓankimo, e wi'a, “Allah hoyna, Moodibbo! Non heɓataama haa abadaa!”

23Ammaa Yeesu waylitii, wi'i Biiturus, “Sendir e am, an Ceyɗan! A kaɗayɗoyam waɗuki ko Allah yiɗi, ngam naa' to Allah nyumo maaɗa ƴiwoyi, iri nyumo yimɓe nyumataa.”

24Sey Yeesu wi'i tokkuɓemo, “Fuu giɗɗo warta tokkuɗoyam, doole wanya hoore muuɗum, hocca gaafaangal muuɗum, tokkayam.#16.24: Waato siryoo yaruki bone koo ndeye haa mayde. Maat 10.38; Luk 14.27. 25Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am o heɓayki.#Maat 10.39; Luk 17.33; Yah 12.25. 26Ko ɗum nafanta neɗɗo to o heɓii duuniyaaru fuu, ammaa dullii yonki maako? Koo boo ko neɗɗo waawata hokkuki ngam jaɓtoya yonki muuɗum? 27Ngam Ɓii Neɗɗo waray nder teddungal Nyaako muuɗum Mo Dow e malaa'ika'en maako, o waatanay koo moye ko waɗi.#Maat 25.31; Jab 62.12; Room 2.6. 28E mi wi'a'on goonga, e woodi woɓɓe dariiɓe ɗo'o ɓe maayataa naa ɓe ngi'ii Ɓii Neɗɗo e waroya nder laamu muuɗum.”

Currently Selected:

Maatiyu 16: fuv

Highlight

Copy