EXODO 3

1Aminsan ya agew, nen si Moises et mampapastol na saray ayep na katolangan ton Jetro a pari na Madian, imbeltang tod kalawakan iray ayep tan akasabid Sinai, say masanton palandey. 2Diman pinmanengneng ed sikato so anghil na Katawan ed nengneng na apoy a manlalapud pegley na sakey ya abeban kiew; anengneng nen Moises a mandarlang imay kiew, balet ag napopoolan. 3Maya, inkuanen Moises ed sikaton dili, Onasingger ak, ta nengnengen ko no anto yan pakelaw; ag napopoolan so kiew anta mandarlang.

4Nen anengneng na Katawan a Dios ya onaasingger si Moises, tinmawag ed sikato manlapud pegley na abeban kiew, Moises, Moises!

Wadya ak, ebat nen Moises.

5Ag ka onaasingger dia, inkuan na Dios, ekal mo ray sandalyam, ta masanto so dalin a kawalaan mo. 6Siak so Dios na saray lalakim, say Dios di Abraham, Isaac, tan Jacob. Sinakuban nen Moises so lupa to, ta tinmakot ya onnengneng ed Dios.

7Insan say Katawan inkuanto, Anengneng ko so ontan lan kakairapan na saray totook a wadman ed Egipto; nadngel koy tagleey da lapud saray maruksan opisyal da. Amtak so kakairapan da, 8kanyan linmasur ak, ta iyagel ko rad saray Egipsio, tan itaynan ko ra manlapud saman a dalin; insan ko ra iyakar ed mataba tan maawang a dalin, sakey a dalin a panagagosay gatas tan dilo, a panaayaman natan na saray Cananeo tan Heteo, saray Amorreo tan Perezeo, saray Heveo tan Jebuseo. 9Nadngel koy tagleey na saray totook tan anengneng kon peteg so pamapairap na saray Egipsio ed sikara. 10Natan, ibaki ta ka ed ari na Egipto, pian nipaway mod bansa to iray totook ya Israelita.

11Balet si Moises inkuantod Dios, Siopa ak ya onarap ed ari tan mangipaway ed Egipto na saray Israelita?

12Inmebat so Dios, Say katwaan to, siak so kaibam. Say pakabirbiran ya imbaki ta ka saya: no nipaway mo lad Egipto iray totook, igalang yo ak diad sayan palandey.

13Inkuanen Moises ed Dios, Onla ak ed saray Israelita, ta ibagak ed sikara, Say Dios na saray lalaki yo imbaki to ak ed sikayo; et no tepeten dad siak, Antoy ngaran to? Antoy iyebat kod sikara?

14Siak si siak, inkuan na Dios. Ibagam ed sikara, Say natatawag a SIAK ET SIAK,#3:14 Siak si siak...SIAK ET SIAK: Diad salitay Hebreo say tanul na sayan ngaran singa Yahweh (odino Jehovah) a sinalatan na salitan KATAWAN ed sayan patalus, likud labat ed pigaran pasen. imbaki to ak ed sikayo. 15Ibagam ed saray Israelita a siak a Katawan, say Dios na saray lalaki ra, say Dios nen Abraham, Isaac, tan Jacob, so angibakid sika ed sikara. Sikato yay ngaran kod anggad angga; sikato yan ngaran so tawagan na amin a kailalakan. 16Laka sirin, ta tipon mo ray pangulo na Israel tan ibagam ed sikara a siak, say Katawan na saray lalaki ra, say Dios di Abraham, Isaac, tan Jacob et pinmanengneng ak ed sika. Ibagam met ed sikara a dinalaw ko ra tan anengneng koy gagawaen na saray Egipsio ed sikara. 17Kanyan ginetmak lan ipaway ira ed Egipto a pakapapairapan da, tan iyakar ko ra ed mayaman tan mataba a dalin a panaayaman natan na saray Cananeo, saray Heteo, saray Amorreo, saray Perezeo, saray Heveo, tan saray Jebuseo.

18Dengelen day salitaen mod saray totook, insan ka nepeg ya onlad ari na Egipto a kaolup mo ray pangulo na Israel, tan ikuanyod sikato, Pinmanengneng ed sikami so Katawan a Dios min Israelita. Abuloyan mo kami pan onlad kalawakan ed loob na taloy agew, ta mangibagat kamid Katawan a Dios mi. 19Amtak ya ag kayo abuloyan na ari na Egipto ya onla, anggad napasoot na biskeg na pakayari. 20Balet ipakanak so pakayarik ed Egipto tan dusaen ko na saray makapataktakot a pakelaw a gawaen kod man. Kasumpal na sarayan nagawa, abuloyan to kayo lan onla.

21Paabigen koy linawa na saray Egipsio ed sikayo, pian ag kayo ontaynan a kalima-lima. 22Onkerew so balang biin Israelita ed saray kaabay ton Egipsio, tan diad siopaman a biin Egipsio a manaayam ed abung to, na saray kawes tan saray alahas a balituk tan pilak. Paisolung yo ra yan bengatla ed saray anak yon lalaki tan bibii et, diad ontan, naalaan yo na kayamanan iray Egipsio.

Currently Selected:

EXODO 3: PnPV

Highlight

Copy