GENESIS 47
47
1Kanyan intagar nen Jose so limara ed saray agagi to tan linma rad ari. Inkuanen Jose ed sikato, Sinmabin nanlapud Canaan ira di amak tan saray agagik a kaiba da ray karniro ra, saray baka ra, tan amin a kayaryan da. Wala ra natan ed Gosen. 2Imparontal tod ari ira may agagi to. 3Inkuan na ari, Antoy anapan yo?
Inmebat ira, Pumapastol kami, a singa saray atateng mi. 4Linma kami dian manayam ed sayan bansa, ta lapud mapalalon eras ed Canaan, anggapoy pangipastolan mid saray karniro mi. Abuloyan yo kami pan manayam ed Gosen.
5Inkuan na ari ed kinen Jose, Natan ta sinmabi lay amam tan saray agagim, 6tan walad silong na pakayarim so intiron dalin na Egipto, panayam mo rad Gosen a sankamaungan a parti na bansa. No wala ra bilang so lalakin marunong a mankomponiy ayep, ipasen mo ran inkargado ed saray dilin ayayep ko.
7Insan inyakar nen Jose ed ari so ama to. Si Jacob initdan toy ari na bindision to. 8Tinepet na ari, Pigara lay taon mo?
9Inmebat si Jacob, Sanlasus tan talomplon taon lay impanbilay kon alis-alis so panayaman. Antikey tan mairap so bilay ko, ya aliwan singa saray atateng ko ya andokey so impanbilay da ya alis-alis met so nanayaman da. 10Kasakbayan ya inmalis si Jacob binindisionan to may ari, insan la linma. 11Si Jose impanayam tod Egipto si ama to tan saray agagi to, tan inter tod sikaray sankamaungan a dalin a walad abay na siudad na Rameses, onung na ingganggay ari. 12Initdan met nen Jose na pambilay si ama to, saray agagi to, tan amin da ray arum a kabyangay pamilya nen ama to, pati say sankayogtanan ya anak.
Say Eras
13Dinmalan so mapalalon eras ta anggapoy nakan ed amin a pasen, et kinmapoy iray totood Egipto tan Canaan. 14Kapag manaliw iray trigo, tiponen nen Jose so kuarta tan iyakar tod palasio. 15Nen naoput lad Egipto tan Canaan so kuarta, linmad kinen Jose ray taga Egipto tan inkuanda, Itdan mo kamiy nakan! Ag mo kami papaolyan ya ompatey. Anggapo lay kuarta mi.
16Inmebat si Jose, Awit yo ra diay ayayep yo; sikara lay ibayar yod tagano ya iter kod sikayo, no anggapo lay kuarta yo. 17Kanyan inawit dad kinen Jose iray ayayep dan kabayo, karniro, kanding, baka, tan asno. Diad saman a taon, initdan to ray nakan a salat na saray ayayep da.
18Nen ontombuk a taon linma rad sikato tan inkuanda, Ag mi iyamut ed sika ya anggapo lay kuarta mi; pati saray ayayep mi et kayaryan mo la ra. Anggapo lay nakdaan ya iter mid sika likud ed saray laman mi tan saray dalin mi. 19Ag mo kami papaolyan ya ompatey. Gawam so manepeg a polaing! Ag mo aabuloyan a nataynan iray kaalogan mi. Itdan mo kami lay nakan, ta sikami tan saray dalin mi lay ombayar. Magmaliw kamin aripen na ari, tan kayaryan to la ray dalin mi. Itdan mo kami na trigo a pambilay mi tan say bini ya itanem mid kaalogan mi.
20Sinaliw nen Jose a para ari so amin a dalin ed Egipto. Apasootan ya amin iray Egipsio a mangilakoy dalin da, ta mapalaloy eras. Nagmaliw sirin a kayaryan na ari so amin a dalin. 21Manlapud sakey a samput ya anggad sananey a samput na Egipto, impagmaliw nen Jose ya aripen iray totoo. 22Say dalin labat na saray papari so ag to sinaliw. Ag da kinaukolan ya ilako ray dalin da, ta walay inter na ari a pambilay da. 23Inkuanen Jose ed saray totoo, Sinaliw ta kayo la tan saray dalin yo a para ari. Niay trigo ya itanem yod kaalogan yo. 24No panagani, iter yoy kakalima ed ari. Say kera ikana yon bini tan tagano yo tan tagano na saray pamilya yo.
25Inmebat ira, Sinambot moy bilay mi tan maung kad sikami; paaripen kami lad ari. 26Kanyan impaakseb nen Jose so sakey a ganggan ed Egipto a kayaryan na ari so kakalima na ani. Wala ni yan ganggan ya anggad natan. Saray dalin labat na papari so ag kayaryan na ari.
Say Kaonuran a Kerew nen Jacob
27Nanayam ed Egipto ira may Israelita, diad Gosen; minmayaman ira tan dinmakerakel ira. 28Nanayam ed Egipto si Jacob na labimpitoy taon, anggad mantaon na sanlasus tan apataplo tan pito. 29Nen asingger lan ompatey, impatawag toy anak ton Jose tan inkuantod sikato, Iyan moy limam ed nanleetan na saray ulpok#47:29 IYAN...ULPOK: Nengneng yoy 24:2. tan isipan mo ya ag mo ak ipopompon ed Egipto. 30Labay koy nipompon ed kawalaan da ray atateng ko; ipaway mo ak ed Egipto tan ipompon mo ak ed angipomponan ed sikara.
Inmebat si Jose, Gawaen koy imbaga yo.
31Inkuanen Jacob, Mansamba ka a gawaen mo. Nansamba si Jose, tan akisalamat si Jacob diad katri to.
Currently Selected:
GENESIS 47: PnPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1977, Bible © 1983
