Lukashi 21

Shadaka shaumidye namwili

Malukushi 12:41-44

1Napanelo Yesu andílalyanga kutwala kuvona vatajili vajela njuluku mulishanduku lyashadaka, 2namomo kumwona namwili ákave pashinu nanae ajela njuluku wake padyoko namene mulishanduku lyolyo. 3Yesu kutwala kushidoni, “Mwiu, nkongwe aju ni ájadile poe kuvapunda vanu avalá uti 4mwaa vanu vanji uti vajadilé vatwala padyumbele kanji nkongwe aju muungave-pashinu wake aumididyé uti vyavénavo.”

Kubamalegwa kwaing'ande ya Nnungu

Mateu 24:1-8; Malukushi 13:1-8

5Napanelo vanji valambwalela ing'ande ya Nnungu mwavadangadile na majanga akumanyikanga na mwavanamadidye na vinu vyashadaka vyavashimuumidya Nnungu, Yesu andívaulila doni, 6“Uti vyamwona avi, lindawika liduva lyakubamalegwa pavakaleka lijanga lìikele pashanya lijangamwagwe.” 7Vanavo kumudya, “Mwalimu! Da vinu vyene vyo vilota kutandeka duvani na pavilota kutandeka po, shilota kulilodya shimanyikilo shani?”

8Yesu kushidoni, “Lilaledye! Hanapagwe wakunduwanga mwaa vandaida vanu voe vatumila lina lyangu vaashidoni, ‘Nangu ni Masiya’ na kushidoni, ‘Wakati undiwika’ kanji hamunavode. 9Mukona ding'ondo na vijungulima, mwenu hamunaitukange mwaa vinu avi shitandi vindivaikila vitandeke kanji hauva shinu wakati wamwisho.”

Vimanyikilo vyakulilodya mwisho

Mateu 24:7-8; Malukushi 13:8

10Kutwala kavili kushidoni, “Venentete vandatandana ing'ondo shivenevene na utawala umo undatandana ing'ondo na utawala unji. 11Mumautu akuvilingananga mundaumilila vindangenda vyakujowa, shivanga, vilwele, vinu vyakwituwanga na kuwa kundalilodya vimanyikilo vikumene namene.

Kupapatigwa kundaida

Mateu 24:9-14; Malukushi 13:9-13

12“Kanji vinu avyo uti vikanava kutandeka, kwamwaa walina lyangu mwenu vanankamula kumuuvyauvyanga, vamuukanavo kuvitala vyakulipudidya, vanjela mudikalaboshi na vamuukanavo kwavaumu na kwavananangalaledi vashilikali. 13Napanelo lyolyo lyo, lindava litala lyakulota mwenu kunguumidya nangu ushuda. 14Napavedoni mmitima mwenu amuwa kaladavo kuleka kulipundisha mwakulishililididya. 15Nangu apa nantadya mutangole malove alimanyilo; malove alo, vamongo venu havapinga ata kutaukanga hakupagwa. 16Napanelo mwenu ata vatatavenu, vakuluvenu na vanung'unuvenu, vakwenu, vabwadivenu vanannimya na pakati penu vanji vandabyaigwa. 17Vanu uti vanammangedya mwaa wangu nangu 18kanji mmyuti mwenu mo, haukulika ugwimbu ata ukava umo. 19Ni mwaa wakulipililila kwenu kwamulota kupata ungumi wenu.

Kubamalegwa kwa Yelusalemu

Mateu 24:15-22; Malukushi 13:14-20

20“Napanelo mukavona vaing'ondo vàtang'anadidye Yelusalemu, manyinneu doni wakati wakubamalegwa likaja alyo undiwika. 21Napavedoni vanu valóta kupagwa ku Yudeya vatilile kumashinga, vapanjini vaume na valóta kupagwa kumala, havanaujile kukaja. 22Mumaduva alo shindaumilila shaushanga vitandeka vinu uti vyandikíke. 23Shonde vakongwe vílota kuvakodya vinu avyo vàimitenge na vílota kuvakodya vajang'edya mwaa mushilambo ashi andaida mauvilo makumene; Nnungu andavang'unulangila mevo venentete ava. 24Vanu voe vandavabyaa maambila, vanji kuvakamula mikole kuvaukanavo muvilambo uti vyavamidi na Yelusalemu vamidi vandatimbanga mpaka wakati wave uvamalilikile.

Kwida kwa Mwana Wamunu

Mateu 24:23-31; Malukushi 13:21-27

25“Liduva, mwedi na dinondo vinu avi vyakuwa vindavanavo vimanyikilo; mushilambo venentete vandalijugulanga kwamwaa washilindimu shamawimbi shilóta kulindimuka mwimanga. 26Vanu vandadilikanga matuva vakumbukila vinu vilóta kutandeka mushilambo mwaa vyadimongo vyakuniania vindating'inigwa. 27Apo vandamwona Mwana Wamunu aaloka mulyundi na dimongo pamo na lishangelo lyoe.#21:27 Lola Daniele 7:13. 28Pavilota kutandeka vinu avyo, mwenu takatukanga mwimilange munyanyulile vilaka kuwa mwaa kwambolegwa kundivandika.”

Kwankungu lipundishe

Mateu 24:32-35; Malukushi 13:28-31

29Napanelo Yesu andívakang'ela nkong'o au, “Lola nkungu na milandi vinji uti. 30Pamunona viipukila, mwemwe mmene mundamanyinneu doni shipondo shiwikile. 31Nadoni pamwona vinu avi vitandeka, momo manyinneu doni utawala wa Nnungu undivandika. 32Ninkumwaulila mwiu doni, vanu vaimbula ai havamalilika vinu avi vikanava kuumilila. 33Shilambo shakuwa na shapai, vindapita kanji malove angu mwiko hapita.

34“Lishunge! Hamunaleke mitima vyenu viidapelwa kwambalwa na ulevi na mangaikangilo ashinamidyo ashi kutwala liduva alyo kunkodya shingangala kenga ntego 35mwaa liduva alyo, vanu uti ndyoko na nkulu mushilambo uti, lindavawikila. 36Ngwengwe muve mevo mujugwa mupate dimongo kwambangidya vilóta kutandeka vyo vinkowe na mwimile bila kujagajega pamevo pake Mwana Wamunu.”

37Yesu kula liduva, mui ashindapagwa mwing'ande ya Nnungu apundisha, shilo kuka ndaikala kulishinga lyavashema Lyamilandi Vyaulivela. 38Lyamba linyeiku, vanu uti vashindauka kwing'ande ya Nnungu ndamwigwilila.

Currently Selected:

Lukashi 21: kde

Highlight

Copy