Gen 11
11
Babilon damsi numa ivowai da ighe kirakai.
1Karenai dobu kudubina kamonai wawaya peyarisi i gamo ma i sisiya na sago. 2Ma wawaya viya ibaba inae ku warere sago maramatanai ma nani dobunai ivivi makiiyana. Dobuna kana vava Babilon.
3Ma dughu kamonai ivona bo, “Tanae, dobodobo tavopasipasi ma takapuna da ina pakora, ini wakima.” Nani dobunai wakima vaghata kegha, tuna kubiine dobodobo pakorisi itura numa vowana kubiine. Ma bade pasi dumadumana gwabisiyai da dobodobo wakimisi ita pasitatana. 4Ma nani murinai ivona bo, “Tanae, kwanatu ghamana tayamoni ma kamonai na numa sago gurina tavowai ina ghae ku kunuma. Nakanani taberai da kata vava ina rakata ma ke meyani tibogebogeta ku dobu bogii ma bogiiyai.”
5Ma kegha, Bada ioru da ita rugenarisi, kwanatuna ma numa gurina iyamoyamoni na ita kitai. 6Ma ivona bo, “Weni damsi gamo sago kava isisiya da ivi sagosi. Ma weni berana ivi karei da eberaberai na karakava kesago aviyavisina ina tarapotesi. 7Toru da weni wawayisi i gamo tavirai da ke kovokovoghina ini akovavivirana.”
8Vaghina ma Bada ikiivisawarisi da Babilon ikiibutawei inae da dobu ine yavui. Ma kwanatuna iyamoyamoni na ivoterei. 9Nani kwanatunai ivi notaragharaghisi da gamo bogii ma bogiiyai ivivi sisiya, tuna kubiine kana vava vuna na ‘Babel.’ Ma wawayisi ikiivisawarisi da ivi bogebogesi inae da dobu bogii ma bogiiyai imakii yavui.
Sem tupurereghina.
10Sem tupurereghina na weni. Kutukutuva murinai madegha ruwa ikovi na Sem kana madegha 100. Ma ivi tuwa da natuna Apakisadi. 11Murinai na madegha 500 ku tepana imakai. Ma kamonai na natunatuna viya, tomotomowisi ma wivinesi itupuwa.
12Ma Apakisadi kana madegha 35 na ivi tuwa da natuna tomowa. Ma ivi vavei Sela. 13Ma tuna murinai na madegha 403 ku tepana imakai. Ma kamonai na natunatuna viya, tomotomowisi ma wivinesi itupuwa.
14Sela kana madegha 30 na ivi tuwa da natuna tomowa, ma ivi vavei Eba. 15Ma tuna murinai na madegha 403 ku tepana imakai. Ma kamonai na natunatuna viya, tomotomowisi ma wivinesi itupuwa.
16Ma Eba kana madegha 34 na ivi tuwa da natuna tomowa, ivi vavei Pelegi. 17Ma tuna murinai na madegha 430 ku tepana imakai. Ma kamonai na natunatuna viya, tomotomowisi ma wivinesi itupuwa.
18Ma Pelegi kana madegha 30 na ivi tuwa da natuna tomowa, ivi vavei Reyu. 19Ma tuna murinai na madegha 209 ku tepana imakai. Ma kamonai na natunatuna viya, tomotomowisi ma wivinesi itupuwa.
20Ma Reyu imakai da kana madegha 32 na ivi tuwa da natuna tomowa, ma ivi vavei Serugi. 21Ma tuna murinai na madegha 207 ku tepana imakai. Ma kamonai na natunatuna viya, tomotomowisi ma wivinesi itupuwa.
22Ma Serugi imakai da kana madegha 30 ma ivi tuwa da natuna tomowa. Ma ivi vavei Nayo. 23Ma tuna murinai madegha 200 ku tepana imakai. Ma kamonai na natunatuna viya, tomotomowisi ma wivinesi itupuwa.
24Ma Nayo imakai da kana madegha 29 na ivi tuwa da natuna tomowa. Ma ivi vavei Tera. 25Ma tuna murinai na madegha 119 ku tepana imakai. Ma kamonai na natunatuna viya, tomotomowisi ma wivinesi itupuwa.
Tera ina rakaraka.
26Tera kana madegha 70 muriyai na ivi tuwa da natunatuna Abram, Nayo ma Haran. 27Ma ina rakaraka i varagutugutu na weni. Haran ivi tuwa da natuna tomowa kana vava na Lot. 28Ma Haran ina mamai Tera na patana da yawayawana imakamakai ma Haran irabobo, Uru kwanatunai. Kwanatuna na Kaldiya damsi i dobu kamonai, ma nani dobunai itupuwa. 29Ma bade Abram ma Nayo wivine ipanana da itavine. Nayo kawana na Milka. Milka ma tina kikei Iska ivi ruwa i mamai na Haran. Ma Abram kawana na Serai. 30Tuna wavinena na gagarina, ke iti tuwa.
31Mara sago Tera ina rakaraka irutinisi da Uru dobuna ikiibutawei. Natuna Abram kawana Serai yavata ma tupuna Lot (tuna ina mamai na Haran) na peyarisi iviinisi da ita nae ku Keinan dobuna. Ma keta borinai ku Haran kwanatuna inekiibau na nani dobunai imakii kirakai.
32Tera imakai da kana madegha 205 ma Haran kwanatuna kamonai irabobo.
Currently Selected:
Gen 11: pwgB
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
