Jon 2

Bu ai Keina ijia sanamikuai iro inva ijin

1-2Naki nokarok (2) barko bu ai Keina Gareri guf ijia sanamikuai iro bomana be ijga Jesuon asiej iji fu ijia vain. Regavo Jesu ga e vuak fuon faivo iji bu madu bu iro iji sarekuai kiavga bun ijia vain. 3E uruvana bun iro iji iknum do be bu kua vuain no kuavo iji iknum ijegre vake vuain iji fun barekoga Jesuon asiej iji fun uri Jesu kua, E iji bu do vuain iji bun i barenvano kuain. 4Fu ijeg kuamga Jesu fu uri kua, Asienu a irerafuon na nijaidie ga kuardiem? Ire fok nan vierafen ga tavan nun na anerene ik nun rekfuon iji fuba ruainmano kuain. 5Fu ijeg kuardamga Jesuon asiej iji fun una e iji ire karme e fok vajiaoijo iji kia, Jesu fu irerag kuardiaga ni ire iji fu kuardiamo iji mukoi faime refno kiain.

6Regavo ar iji bu karine duok ijo samaij ijia bu saror mamkanuk imut roin ga nikit (6) besum ijeg bu kege ijia nain. E Jius bu akai buon bu nainva ijia bu vierafe bu imut do sokva God fu oimaik. Ijefuon bu saror iji kege ar ijia nain. Saror iji buka mamkanuk ijefuon bu do uruvana jiaga buka irtoijev. 7Jesu fun e iji bu duok nifie e iji vajiaoijo iji kiamga bu rokga fu kia, Ni saror igi karme do jiafno kiain. Fu ijeg kiamga bun saror fok karme do jiava buka irtoije baren. 8Areme fun una kia, Nin do iji kafo jiame va e gafi iro igi inma iji samuamo iji vajafno kiain. 9-10Fu ijeg kiamga bu do iji kafo veseme va e iro iji samuamo iji vajava fu kege ine faik do iji fun ma vuain. E iji iro samuamo iji fu vuain iji bu izia kege ruainva iji fuba giain. Regavo bun e iji do iji veseme vainva ijieb vuain iji fu izia ruainma iji bur mukoi vierafen. Areme e iro iji samuamo iji fun e iji sanamivo iji abevo e fok kiamga bu isuar kariko fun uri Jesu kua, No unam nuvuon no rejo iji fu be. No amur no do vuain ma ijar ijknum e fok vajiame rad noson vuain ise iji ijo. Regavo aiji a vuain ma iji a abe abede fine radkma ijia abe e fok no vajuinmano kuain.

11Rega Jesu fu amur anerene darokma ire sumakin fu kege e fok nijaidiainma iji fu ai Keinan Gareri guf ijia ijeg ren. Ar ijia fu fuon sanainma iji abe e fok nijaidiamga e vuak fuon faivo fok bu ijia game fu ma vierafen. 12Bu ijegrene Jesu ga asiefuon ijigam uviaifijaf ijigam e vuak fuon faivo iji bun uri vake ai Kafoniam ijia useme naki sibank ijia karin.

Jesu fu Godon Ar ijia aru vainma ijin

(Metiu 21:12-13; Mak 11:15-17; Ruk 19:45-46)

13Areme e Jiusbuon tavan iji bu kua Fasovano kuavo bu iro ine una saifijaf iji bu ai Ijift ijia vajai fian abeknum e ijiebuon ikreoija God fu karauniainma iji vierafejo iji fun samairen. Ijefuon Jesu fun Jerusarem aji vain. 14Fu va Jerusarem kekome Godon ar ijia arume gak e uruvana bu ijia arume maf-kau ga maf-sif ga um iji kege isufuon una e kafobuon kimej. Regavo fu giak e roin bu fata ijia karine mon dame vajuonamiv. 15Fu giame uri ire be isua igekin ka gigikin iji abe dab fanuf fok bu kege ijia aru karine kimejo iji fijiama bu usem subin. Bu usem subi vakga fu uri e ijiebuon fata iji bu karine mon dame vajuonamivo iji kam karoime mon buon kam uduim kozen. 16Areme fu uri e iji karine um kimejo iji kia, Um jon iji kare usem vaf. Ja erar kiaga ja Asoinun ijefuon ar igi abe maket akar igeg amarvno kiain. 17Jesu fu ijegrega e vuak fuon faivo iji bu migegare Godon vuak iji bu usuibe buk akaij ijia bu isoinva iji vierafen. Regavo vuak iji fu ijeg kuai,

O God ar on ijia bu vuak ma iji kuaiknum sirimamejor iji oinun fuka mian igeg naino kuain.

18Jesu fu ijegrega e Jiusbuon e mamkanuk iji bu migegare una duna be kua, Ni ire sumakin be rega no ijia game vierafero a daro namo ijefuon a ivia no kuriairega no usem vakno kuain. 19Bu ijeg kuavga Jesu fu una kia, Ja Godon ar bomana igi bujakorekva na naki nokbek (3) guf ijia na una sa barekno kiain. 20Fu ijeg kuardiamga bu una kua, Ar igi no juaivasia uruvana foti siks (46) ijeg akozme ar iji sa baren revo a izeg naki nokbek (3) ijia una sakno kuain. 21Rega Jesu fu Godon ar ijefuon kuainma bakin revo fu vajai fuon ijefuon bijame kuaima e Jius iji buba fain. 22Regavo rad Jesu fu guame naki nokbek (3) barga fu uriga e vuak fuon faivo iji bu vuak fuon iji fu Godon ar ijia bija kuainma iji vierafen. Areme bu ijia una Jesuon vuak fu kuainma ijiga Godon buk akaij iji ma vierafen.

23Jesu fu Jerusarem ijia tavan bu kua Fasovano kuavo ijia iro iji bu ijo ijia fu fiknum ire sumakin uruvana reoga e fok bu iji giame bu fu ma vierafen. 24-25Regavo Jesu fu e uruvana ijiebuon oij iji fun giain ijefuon fu erar una ema ijiebuon unam bu kegoijo ijin Jesu nijaikma bakin. Rega fun oibuon giainma ijefuon fuba bu ma vierafene fuon ma iji abe samafrediama bu gain.

Currently Selected:

Jon 2: nvm

Highlight

Copy