Ruk 21

Bara amun fu mon God mainma ijin

(Mak 12:41-44)

1-2Areme tavan be Jesu fu Godon ar ijia aru fine giako e sinuom zarainva ijieb arume mavua iji bu mon savo ijia mon saknum ijegrej. Fu ijia fine giamo ijia fu gak bara amun be fu mon kavuan ukakna nokarok (2) kege mavua ijia sama fu gain. 3-4Ijefuon fu uri kia, Na ma kuardiav e fok mon iji bu abesvo iji fu bara amun garar asidiain. Ijefuon maiji e roin mon uruvana karevo iji roin bu bui kega bum ukaknak kege vajiev. Regavo bara amun iji fu mon ma ukakbe fu duok kimekafa abedenma iji fun fok abe miainmano kiain.

Jesu fu Godon ar ijefuon kuainma ijin

(Metiu 24:1-2; Mak 13:1-2)

5-6Areme e Jesuon vuak faivo roin bu kari Godon ar iji game kuai, Ar maiguri sainva iji buka mun ka mukor ijesugin kareme sain. Regavo madu ar guf ijia buka ire uruvana kege Godon isuf baroijo kuain. Bu ijeg kuavga Jesu fu uri kia, Ire fok igi ja giavo iji bu rad tavan be ruakma mun igi besum be fuba guri fu namo ijia ijeg nakfuon. Regavo rad bu bujame kozega mun iji bu uduim arikno kiain.

Afikin abeknum vajai fian abejo ijin

(Metiu 24:3-14; Mak 13:3-13)

7Fu ijeg kuardiamga e vuak fuon faivo iji bu uri kuai, E Nijaidiamo a vierafega ire iji fu ivez rekfuon? Regavo a vierafe no anf irerag ijar rega no ijia ga vierafero ire iji fu rekro no ijeg vierafekno kuain. 8Bu ijeg kuardava Jesu fu una kia, Tavan rad e buka oine biesiakno nika amarigia giaknum of. Ijefuon maiji e uruvana buka if nun ijia usem biesiame kiak, Noiji no e iji fu ruakafa kuainva ijin ijefuon tavan iji fun ruainmano kiaga jab uri jajiak. 9Regavo madu e roin buka una e roina bijaiknum vo e mamkanuk buon bu samuagdiavo ijiena vuak gigikin kuaimoga jab juk. Regavo igia faif. Tavan ijia ire kafokafo buka rega ja giakfuon. Regavo jab vierafero iji fun tavan radkma iji barno ijinro jab ijeg vierafek iji fui bakin.

10Ja e moik kafokafo ijia karioinva iji buka una bui bijaiga ja faik. 11Regavo madu moikigi fuka unam ma ise ijia urake vasia kekokega e kafo bu vasia oriaga buka aoik. Regavo madu e uruvana buka adam ise abekfuon. Ijegrekega ire ni kafokafo ka ise ja jukfuon iji bu ijia rekega varur gufia anf mamkanuk roin bu ijia rek. 12Regavo ire uruvana na kuardiavo iji bu rad rekfuon. Regavo amur e buka e Jiusbuon ar bu afuime vuak kuaivo ijia ja kam arafiriaknum aferdiame dibur uniakfuon. Regavo madu buka ja aferdiame e kin iji ga e mamkanuk ijiebuon vaga bur uri ja kege kam unam gigikin ijia vajai fian vajiakfuon. Ijefuon maiji jaka na ma vierafejo ijefuon bu ijeg rek. 13Regavo bu unam ijegrejo iji bun ja ar aremdiado ja ijia vuak nun ma iji ijia kuardiakfuon.

14Ijefuon jab uri vuak jon ja izeg una bu kuardiakfuon ijin uruvana vierafek. 15Ijefuon maiji nar oijon ijia ga nigen jon ijia vuak vierafe vajiaga ja e iji bu ja kam vuak gigikin kuardiavo ijiebuon vuak iji karatuame una roin kuardiakfuon. 16Regavo madu bu asie asoijon ijigam uviaifjon ijigam makifjon ga e jana ai besum karioijo ijieb ja ziegafiak. Bu ijegrene buka ja tomdiame kam e ani iji vajiaga bu kege arafiriaga e roin ja aoikfuon. 17-19E fok ja buka kam unam kafokafo ijia ijeg arafiriaknum ziegafiak ijefuon maiji jan una enun rene if nun dab kuaimoijo ijefuon bu ijeg rek. Regavo igia faif. Na e besubesum jaiji naka amarigia samuagdiak. Ijefuon jaka koikjo giriesainki God fu ifejdiame daro miaga ja tavan bog ijia ma karivak.

Jesu fu ar Jerusarem bu arafirikrejo ijefuon kuardiainma ijin

(Metiu 24:15-21; Mak 13:14-19)

20Areme Jesu fu uri kia, Ja tavan iji e bijaivo bu usem mai Jerusarem okurakva ni vierafero Jerusarem bun abe iserekrejoro ja ijeg vierafekfuon. 21Regavo e iji eraneb ja ar Judia guf ijia karinva iji ni subime va uruor mamkanuk irif ijia sauif. Regavo madu e iji eraneb ja mai guf ijia karijo iji ni subime vaf. Regavo eraneb ja mai iji areme usem makaf ijia vainva iji jab una mai ijia ruak. 22Ijefuon maiji tavan iji ire iji bu ijegrekfuon iji bun buk akaij ijia isoin. Bu isoime kuai, Tavan ijia bu e moikigia oinva iji abevo ire fok moikigia naoivo iji kam vajai fian miakuai kuainva iji fu ijekma aresrek. 23Ijefuon vake tavan ise iji fu moikigia reno ijia bara am fudienva ijiga am iviakma nafenva iji buka afikin abek. Regavo God fu tavan ijia e Jius iji ziegafiakma bu unam ma ise ijia vajai fian abekfuon. 24Regavo tavan ijia e bijaivo iji bu e roin kaniaga e roin bu aferdiame moik kafokafo ijia dibur uniak. Regavo mai Jerusarem iji bu e Jius bakin ijieb dab isereknum vake rad God fu una kiak tavan jon fun barenmano kiakno kiain.

Tavan iji ema ijiebuon farif fu una roko ijin

(Metiu 24:29-31; Mak 13:24-27)

25-26Jesu fu ijeg kuardiame kia, Bu ijegreke varur gufia anf ka mamkanuk kafo bu veni ga asam ga mujur ijia rega bu giak. Regavo madu moikigia fuka buibur bomana ufike saof fu foine ma iserke ijia e fok buka nonamime ka juk. Ijegrene Godri ire fok varur gufia kege katiga bu uri iji giame kuaik, Ire iji fukafu uniaibe moikigia rekreno kuaik. Regavo ire ijefuon daro ijar bu kekma buka bomana oi bijukuriakfuon. 27Areme tavan ijia Ema ijiebuon Farif igi na una vana araf ijia daro ga sanaima nun ijekma roga ja giek. 28Ijefuon ja oga ire fok bun anerene rega nin oimaref. Ijefuon maiji e iji fu ja karauniakfuon iji fun samairen.

Jesu in makam ijia bijame kuardiainma ijin

(Metiu 24:32-35; Mak 13:28-31)

29Areme Jesu fu vuak be ijeg bijame kuardiame kia, Ni in makam ga in kafo bu a kanavo iji vierafef. 30Ja oine in iji bu a kanavo ja giame vierafero tavan iji juar mekfuon iji fun samairenmaro ja uri anere juar mej. 31Unam besum ijeg vo ja oine giaga ire kafokafo bu rega ni vierafero tavan iji God fu efuon ijiebuon oij iji samuagdiakfuon iji fun samairenmaro ni ijeg vierafef. 32Regavo na igi kuardiako e iji ja iviakma vek karinva iji irerag na kuardiaiva iji fu Jerusarem ijia rega ja game radson aoik. 33Regavo varur ijiga moikazan igia ire fok God amardiainma iji bu iserme barek gavo vuak nun fuba barek gavo fu tavan bog ijia nakno kiain.

Ja joi samuanamikfuon ijin

34Jesu fu ijeg kuardiame una kia, Ijefuon nika amarigia joi samuanamikgavo jab uri iro ine do kugi iknum una moik igefuon ire iji uruvana vierafek. Ja ijegrekva moik igefuon ire ijieb ja kam utufutuf miaga ja tavan iji Ema ijiebuon Farif igi na una roko iji ja afurvene samuakva bakin. 35Ijefuon maiji tavan iji na una roko iji fu ire buar iji fu dasuikome fanuf muamafamo ijeg jaba samuainva ijia nam ijia una ruak. 36Ijefuon jab zazaigavo nika amarigia jon samuanamiknum ga tavan bog sirimamef. Ja ijegrejknum karinki Ema ijiebuon Farif igi na una roko ijia ire fok bu rekva ja giriesame uri irekno kiain. 37Areme naki besubesum ijia Jesu fu ro Godon ar bu sirimamejo ijia vuak nijaidiame tavan nakimon iji fu una va uruor Orivs manino ijia naino. 38Ijefuon e uruvana bu tavan bog suok vana ijekma va Godon ar ijia vuak fuon fu nijaidiamon iji faikuai vak.

Currently Selected:

Ruk 21: nvm

Highlight

Copy