Luk 3

Jon liti kaptetei le leptalo il

1Metine ili liti Rom, le metine ilitei, nange lele Taiberius, le lesio towa lele piti lontoluwepe tef re mete wuru. Eringi pele piti lesio towa fei lepei lepe, eringi pele fale pire eti plen poungo le plen poungo le pe nou piti eti poungo (15), wem fei lepe mete lipi piti pesio towa punkukuwo metine ili Taiberius lepe, Pontius Pailat le luntoluwepe mete piti Judia. Herot luntoluwepe mete piti Galili, le winke lele Filip le luntoluwepe piti tef lite Ituria re Trakonitis. Lisanias le luntoluwepe mete piti tef lite Abilene, 2le Anas re Kaiafas te rounge tesio tinuwepe mete piti peptawio Ma Ili siye. Wem fei lepe il pite Ma Ili pe falowo Jon ratei tef oli era re telmane-ye yawi. Jon le ninge lite Sekeraia. 3Liso Jon leptalo il linge tef ili yefliye linge wof Jodan, leptalo il lirpei lolo, “Yusape il olpe peise le ise yungungu, le Ma Ili ma onposiepe il olpe peise kolo.” 4Min watafei metine nimou Aisaia laptei il paitei yousi lirpei lolo,

“Metine nele lailolo ratei tef oli era re telmane-ye yawi, lailo lirpeiye, ‘Nali tisi lite Ili elpesi latowo yaltei tisi tuwopou piti le ma lingowo. 5Tef towile ma yalwe yalfofo le tumun re tef lupai linpei lifefei lepe, ise ma rarupu yire filau. Tisi piti peinenei, ise ma kesipe yaptei pire tuwopou le tisi piti fale pifefei, ise ma rarupu yire filau. 6Mete eryai, pe yeflipiye ma puluwo wem piti Ma Ili ma kaniepe.”

7Mete wurutei pau falowo Jon piti le ma kaptetei, wolo le lirpepeye, “Ise eple pite tutungu, minemple pirpeise pirpolo ise miso yantu tanio moingi lite Ma Ili piti ma faleise lepe? 8Towa men ma ise yesio piti ma kosai isotei yirpolo ise olo weitei yofu fei. Le ise ma yirpei nemple yirpolo Abraham le mani leise, olo ki kirpeise, Ma Ili miso weisipe era fei pepei laptei fale pire eple palye pite Abraham. 9Tomoiye olo elpesi luwo piti ma piri peplele nimpe, peplele pratei nalem tef, nimpe yeflipiye wuso pilape fouri teingipe kolo, olo pepe, pe ma peplele piripe pinki weli.”

10Leye lo mete wurutei pepe pe peletei Jon polpepei, “Le ku ma molomen?”

11Le Jon namti lirpepeye, “Minele piti lesienge olol twinges piti lafo pifei teingo yuwei, le ma kali nele watowo metine nele wuso le olo lepe. Le minele piti lesiepe oweli, le ma nempipe laptepe mete nemple.”

12Fei mete piti kapiepe mete era pe paule piti ma Jon kaptei le pe peletei Jon polpepei, “Ye metine piti eptalo mete, ku ma molomen?”

13“Ise ma kapiepe mete era ye yile wai lelpe wuso moli lipi pirpei piti ise ma kapipi pepe, le ise ma kapi nemple yaupe kolo olo.” Jon lirpepe.

14Leye lo yali pal piti plolpo, ilepe pelpe re peletei Jon polpepei, “Le ku, ku ma molomen?”

Le Jon namti lirpepeye, “Ise ma yire singe peise piti kapi era taniepe mete nemple kolo olo, lo ise ma yamtuwepe mete nemple yaupe kolo olo. Ise ma onom teingine yasiepe era wuso moli lipi peise paiteise pepe.”

15Fei mete enke pelpe peilo le pe onposisi re pirpei potei enke leinginim, pirpei piri Jon, onposi pirpolo le so Krais lepe. 16Liso Jon lirpepe pe yeflipiye lirpolo, “Ki keiteteise kire tipe wolo metine nele le ilitei linuki le miso laule. Ki olo teingi kolo piti ma nenfaripe foiye pite ire filengi pele. Le ma keiteteise lire singe pite Riri Teingi le lire weli. 17Le ma karipe mete teingipe taniepe piti olpe. Min watafei wit wuso mete kari lepe. Wit fouri teingi pe kari tani le wit emare oli lepe pe palowi pelesi weli piti loli wem oli oli.”

18Jon lirpepe mete lire il wuru wem le leptalo lire il teingipe pite Ma Ili. 19Wolo Jon il poluwo metine ili piti luntoluwepe mete, pinawo Herot, Jon il poluwo wusoli Herot laisene Herodias. Ne moto pite winke lele, le Herot lotei re le lingiepe il olpe wuru. 20Leye lo Herot lirkilau lingowo tisi oli, le laltei Jon lifei winem oli.

21Mete yeflipiye pungungu re fei le Jisas re lungungu. Wem Jisas wala leletetei Ma Ili, teplai lungo, 22le Riri Teingi lualo lifowo oru lite Jisas watafei nafle malpu. Le il nemple fale teplai yuwei pau pirpei polpepei, “Ye ninge nange leikitei. Ki onom teinginetei kasiye.”

Manre yaire pite Jisas

23Wem linu piti Jisas lesio towa lele, le eringi pele wuru (30). Le ninge tulei liso mete onposio yaitei Josep wuso le ninge lite Heli. 24Heli le ninge lite Mathat, Mathat le ninge lite Livai, Livai le ninge lite Melki, Melki le ninge lite Janai, le Janai le ninge lite Josep. 25Josep le ninge lite Matias, Matias le ninge lite Amos, Amos le ninge lite Nahum, Nahum le ninge lite Esli, Esli le ninge lite Nagai. 26Nagai le ninge lite Mat, Mat le ninge lite Matias, Matias le ninge lite Semein, Semein le ninge lite Josek, Josek le ninge lite Joda. 27Joda le ninge lite Joanan, Joanan le ninge lite Resa, Resa le ninge lite Serubabel, Serubabel le ninge lite Sealtiel, Sealtiel le ninge lite Neri. 28Neri le ninge lite Melki, Melki le ninge lite Adi, Adi le ninge lite Kosam, Kosam le ninge lite Elmadam, Elmadam le ninge lite Er. 29Er le ninge lite Josua, Josua le ninge lite Elieser, Elieser le ninge lite Jorim, Jorim le ninge lite Matat, Matat le ninge lite Livai. 30Livai le ninge lite Simion, Simion le ninge lite Juda, Juda le ninge lite Josep, Josep le ninge lite Jonam, Jonam le ninge lite Eliakim. 31Eliakim le ninge lite Melea, Melea le ninge lite Mena, Mena le ninge lite Matata, Matata le ninge lite Natan, Natan le ninge lite Devit. 32Devit le ninge lite Jesi, Jesi le ninge lite Obed, Obed le ninge lite Boas, Boas le ninge lite Salmon, Salmon le ninge lite Nason. 33Nason le ninge lite Aminadap, Aminadap le ninge lite Admin, Admin le ninge lite Arni, Arni le ninge lite Hesron, Hesron le ninge lite Peres, Peres le ninge lite Juda. 34Juda le ninge lite Jekop, Jekop le ninge lite Aisak, Aisak le ninge lite Abraham, Abraham le ninge lite Tera, Tera le ninge lite Nahor. 35Nahor le ninge lite Seruk, Seruk le ninge lite Reu, Reu le ninge lite Pelek, Pelek le ninge lite Eber, Eber le ninge lite Sela. 36Sela le ninge lite Kainan, Kainan le ninge lite Arpaksat, Arpaksat le ninge lite Siem, Siem le ninge lite Noa, Noa le ninge lite Lamek. 37Lamek le ninge lite Metusala, Metusala le ninge lite Enok, Enok le ninge lite Jaret, Jaret le ninge lite Mahalalel, Mahalalel le ninge lite Kainan. 38Kainan le ninge lite Enos, Enos le ninge lite Set, Set le ninge lite Adam, Adam le ninge lite Ma Ili.

Currently Selected:

Luk 3: ongNT

Highlight

Copy