A Luk Sõng 17

Taab saglg yelle

(Mt 18,6-7, 21-22; Mk 9,42)

1A Zezi yeela b karen-biisi: «Bũmb sẽn tõe n lub ned yel-wẽnd pʋgẽ kõn kong abada la na pak ned ninga sẽn wata ne bõn-kãnga. 2B sẽn dɩkd neer kugri n pid a soab kokore, n tak-a, n tus n lub mogrẽ, dẽ são a sẽn wat ne bi-bilf a ye kʋɩɩbgo. 3#Mt 18,15. Bɩ y gũus y menga!

F saam-biig sã n beeg bɩ f sagl-a, la a sã n tuubame bɩ f kõ-a sugri. 4La a beeg-f tɩ ta naoor a yopoe daar a ye, n lɛɛg n wa fo nengẽ naoor a yopoe n yeele: ‹Mam tuubdame,› fo kõt-a la sugri.»

Tẽeb yelle

5Tʋʋm-tʋmdba yeela Soaalã: «Paas-y tõnd tẽebo.» 6Tɩ Soaala na n yeele: «Yãmb da tarẽ tẽeb sẽn zemẽ seneve biiga, yãmb yetẽ la mugnugã: ‹Vik n tɩ sel mogra pʋga!› A na reegẽ yãmb noore.

Zãag-y meng ne nagre

7Yãmb sʋka, ãnd n tar-a a dakõore sẽn kood pʋʋg, bɩ sẽn gũud rũmsi t'a sã n lɛɛg n wa bɩ b yeel-a: ‹Wa zĩnd tao n dɩ?› 8A ka na n yeel-a sɩda: ‹Segl dɩɩb n kõ-ma tɩ m dɩ la m yũ tɩ f me na yaool n dɩ la f yũ?› 9A na pʋʋs a rakõora bark sɩda t'a reega a noor n maan a tʋʋmde? M ka tẽed ye. 10Woto me yãmb sã n maand b sẽn kõ-y noor tɩ y maan bũmb ningã bɩ y yeele: ka tõnd la zu-soaba teegr ye, zu-soaba ka rɩt tõnd yõod ye. D maana d sẽn tog n maan bala.»

Wãoob piig sãoogre

11A Zezi ra togda sore. Yaa Zerizalɛɛm la b da rabda la b tũu Samari la Galile sʋka. 12B sẽn waa n kẽed tẽng a yembre, wãoob piig n wa n seg-ba, n yas yɩɩga, 13n zẽk b koɛɛg n kelme: «Zezi! Karen-saamba! Zoe-y d nimbãanega!» 14#Man 14,1-32. La a Zezi yãenda b nimbãanega n na yeel-ba: «Kẽng-y n tɩ wilg y mens maan-kʋʋdba.» La b sẽn wa n dabda, b tek n sãoogame. 15La bãmb nin-yend sẽn mik t'a paama laafi, lebg n waame, n zẽk a koɛɛg n pẽgd Wẽnnaam. 16A wõgemda a Zezi taoor n pʋʋs-b barka; yẽ yaool n da yaa Samari neda. 17La a Zezi yeelame: «Ka bãmb piigã n paam laafi bɩ? A wɛ wã yẽ bɛɛ? 18Yɩɩ nin-yenda bal n lebg n wa pʋʋs Wẽnnaam barka?» 19B yaool n yeela raoã: «Yik n kẽng, fo tẽeb fãag-f lame.»

Wẽnd Rĩung waoongo

(Mt 24,23-28, 37-41)

20Farizẽ rãmb sẽn sok a Zezi n na n bãng Wẽnd Rĩungã wata ra-bʋre, b leok-b lame: «Wẽnd Rĩungã ka wat boto, tɩ neb nin neẽ ye. 21B kõn yeele: ‹A bee ka, bɩ a bee ka-sẽnẽ.› Ges-y, Wẽnd Rĩung zoe n be-la y sʋka.»

22B yeela b karen-biisi: «Daar n wate, tɩ yãmb na n tʋlg n yãe Ned Biiga zamaana daar a ye bala, la y kõn yãend ye. 23B wat n yeela yãmba: ‹B bee ka,› ‹B bee ka-sẽne,› ra kẽng-y, ra zoe-y n kẽng-y ye. 24Tɩ sɩda, wala saag sẽn tãoosd a bugum yaanga n wẽneg n yãg taoore, na n yɩɩ boto ne Ned Biigã, b likra raare. 25Yaa modgre tɩ b reng n nams wʋsgo, tɩ zamaan kãnga kamba yiis b buudẽ.

26 # Bs 6,5-8. Sẽn maan a Nowe wẽnnẽ n na n le maan Ned Biiga waoong wakato. 27#Bs 7,6-24. Neb da rɩta b rɩɩbo la b yũuda, tɩ rapa peegd pagba, tɩ pagba rɩkd sɩdba tɩ tol n ta a Nowe sẽn kẽ a koglga pʋgẽ daare, la sa-kẽenga koom waame n dɩ-b zãng fãa. 28Na n yɩɩ wala a Lot wẽnnẽ. Neba ra rɩta rɩɩbo la b yũuda la b raadẽ la b send tɩɩse la b metẽ, 29#Bs 18,20—19,25. la a Lot sẽn yi Sodom daare, saag nii bugum la kidibri tɩ rɩ-b zãng fãa. 30Ned Biiga me likr daare na n yɩɩ boto.

31 # Mt 24,17-18; Mk 13,15-16. Badaare, sẽn be-a a gaosg zugu t'a teed be roogẽ bɩ a ra sig n wʋk-b ye, la sẽn be-b pʋʋgẽ me ra leb b poorẽ ye. 32#Bs 19,26. Tẽeg-y pag a Lot yelle. 33#Mt 10,39; 16,25; Mk 8,35; Lk 9,24; Zã 12,25. Sẽn na n bao-a a yõor fãagre, na n menes-a lame; la sẽn menesd-a a yõore, na le pam-a. 34Mam yeta yãmba, ba daar yʋngo neb a yiib na n naaga taab gãag a ye, tɩ b yãk a ye n bas a ye. 35Pagb a yiib kẽeda neere, tɩ b yãk a ye n bas a ye. [ 36Neb a yiib kẽngda pʋʋgẽ, tɩ b yãk a ye n bas a ye.]» 37Karen-biisa yeela a Zezi: «Na n yɩ yɛ, Soaala?» Tɩ b leoke: «Dɩgre sẽn be zĩig ninga, yibrendã tigimda be.»

Currently Selected:

A Luk Sõng 17: SSDC98

Highlight

Copy