Luke 14
14
Yesu kaliva wowona gitubukoyo-ma gisiveyawana.
1Tu sabati sa'eyana Yesu gina tonagona tafatafalolodiyao adi egana Falisi adi yo'o kalivana kikaiwabuna againe be gina'a, ada kaliva hi'itakwanekwanena. 2Ada medema manuwai-nadi againe kaliva sa'eyana gimiyami, wowona gitubukoyo. 3#Lu 13:10-16Au Yesu badi Falisi kadu Mosese yana vehimeya ana tonuwahuya gitoliluveluvedi gigayo, “Ka'i yada buki-vehimeya gihawahegeda be sabati againe kaliva kanasiveyawana o ka'i keke?” 4Tu hive'amata. Au Yesu kaliva gi'abina be gisiveyawana ada gigahena gigayo, “Au unana.”
5Kadu gitoliluveluvedi gigayo, “Ka'i kaliva sa'eyana agaimiya sabati againe natu o ka'i ya yomuyomu folufolu againe ginabe'u, sabati nonogana auhe'amanadi unasilakahina o ka'i keke? Makewa'e unasilakahina.” 6Au hidedemi gigahe tu keke tamo bonalaufata adifaiweya.
Nuwahobu kadu nuwadoga fa'ina Yesu givehawala.
7 #
Md 23:2-3,6 Kaliva Yesu buye Falisi againe hi'ela be hina'a tu wakawaka tufoidi abavetoga kikaiwabuna againe himaduhiyoto-ma gi'itadi-yo gigahetalahobuhobuyedi. 8-9Gigayo, “Ka'i tamo hakwadi kwamayoku kedukeduna ginatagovena againe ginayowani digo, keke didiga'u'uya unahiyoto. Ka'i mededei unahiyoto tu ka'i kaliva velugana gikaiwabuhege-ma muliya ginalakayemu, ada toni'inuba ami'iselu giyowanimi-ma againiya gina'ela ginagayo, Hei uhobu, didiga'u'u kaliva lakahina ana ivi. Ka'i gidawavi, o udawowomumu udana didiga kumine udahiyoto. 10Atu tamo hakwadi ginayowani againe, didiga kumine unahiyoto be higa aimo toni'inuba againiya gina'ela ginagayo, Kusebo, u'ela didiga'u'u againe unahiyoto. Ada au hidede amine wakawaka velugadiyao moya'aidi matadiya kaiwabu unanuhagana. 11#Lu 18:9-14Fa'ina hai kaliva tauna ana egana ginakilakahina, Yaubada mena kaliva ginakivewowomumuna. Hai kaliva tauna ginanuwahobu, medema ana egana Yaubada ginakilakahina.” Au hidedemi Yesu gigahedi.
12 #
Lu 6:32-35
Tu kaliva Yesu au fa'ina giyowanina-ma againe gigahe gigayo, “Avemwamwala unasena ana toveya, keke a kusebomomo o tobohiyamomo, keke ya yo'o kalivai-dina o ka'i wakalivadiyao unayowanidi. Ka'i badi unayowanidi digo, aimo ya nuwakabubu hinafatana ada au a laufata unavaina. 13Atu avemwamwala unasena ana toveya, koyokoyo felafela tonube'ube'u tomatakoyo unayowanidi. 14Badi keke adifaiweya ya nuwakabubu hinafatani fa'ina, vemwamwala gavatubuga ma unanuhagana. Aimo tova mulina Yaubada badi yegayegadiyao alikeya ginasivemidididi ana toveya, a laufata ginavele.” Au hidedemi Yesu gigahe.
Avemwamwala lakahina ana gahetalahobuhobu.
Madiu 22:1-10
15 #
Ha 19:9
Tu kaliva sa'eyana Yesu buye hi'au'a-ma yana gahe ginogalini-yo gigahena gigayo, “Badi aimo Yaubada yana abageya hinaluku be yana tolameya hinavetoga yana avemwamwala hina'ana-ma yadi vemwamwala gavatubuga!”
16Yesu gahetalahobuhobu amine gigahena gigayo, “Kaliva sa'eyana avemwamwala lakahina gisena ada kaliva moya'aidi giyowanidi. 17Avemwamwala ana tova gilakayemu againe, yana tomaduyowayowana gi'iveninisena be kaliva avemwamwala againe giyowanidi-ma ginagahenauwedi ginagayo, Kidewadewa ahe gihavaina, au wana'ela.
18Atu moya'aidi hivebutu gavadi gavadi yadi nuwanuwa gisebodana fa'ina hiyakayakahina, yadi gahe leleleya. Kaliva nagona gigahe gigayo, Adamoya babi sa'eyana gakimonena ada gilubodaku be ganana gana'itana fa'ina siule lakahina keke akufaiweya gana'ela.
19Kadu kaliva anavelu gigayo, Adamoya okesi luhei luhei adi yo'o matatabuna teni gakimonedi be gananauna ganagaluveluvedi abakeyova hinatai-hagihagiyena o ka'i keke. Fa'ina siule lakahina, keke akufaiweya gana'ela.
20 #
1Ko 7:33
Kadu sa'eyana ma gigayo, Adamoya kwamayoku ganagina fa'ina keke akufaiweya gana'ela.
21Ada tomaduyowayowana yana kauveya againe giyewana kaliva bonadi gilukahihiyena. Au toni'inuba yana wanuwakoyo ana agetoga gigahena gigayo, Unamaduna melala kadu eda agaidiya be koyokoyo felafela tonube'ube'u tomatakoyo unavega'auledi be hinaluku yaku manuweya.
22Ada tomaduyowayowana gina be giyewana yana kauveya gigahena gigayo, O uvehimeya amine kaliva ahe gavega'auledi tu yo'o aimo kabi'ona.
23Au kauveya ana agetoga gigahena gigayo, Kadu unana eda lakahina againe ada eda kabi'ona wala'aiya kaliva unasive'auyedi be hina'ela yaku manuwa hinavemagana. 24Wona velemona gagahe badi kalivai-dina gamidiyowanidi-ma agaidiya keke tamo hakwadi yaku avemwamwala a'ana kasimina ginavaini.” Au hidedemi Yesu yana gahetalahobuhobu.
Yesu ana vetomuliya keke ihayana.
Madiu 10:37-38
25-26 #
Lu 18:28-30
Tu yo'oyo'o Yesu buye hinauna ada badi agaidiya gihagavilana gigahedi gigayo, “Gava kaliva Iya agaikuya una'ela be unavetomuliya, giluboda be tama hina vavine natumomo tobohiyamomo noumomo unavenikohiyedi kadu tauni ya nuwanuwa unavenikohiyeni-yo nuwa agaikuya unase-'owona. Ka'i keke hidede amine unavenikohiyedi, kadu keke afaiweya agaikuya unavetomuliya. 27#Lu 9:23Kadu hai kaliva keke nuwanuwana tavagikuya ginanunaudadana kadu Iya fa'ikuya alika againe ginahawahegeni, medema keke anafaiweya Iya agaikuya ginavetomuliya.
28Ka'i nuwanuwami vetomuliya digo, nagona wananuwanuwa-hagihagi ka'i amifaiweya o ka'i keke. Wa'ita, ka'i kaliva sa'eyana agaimiya nuwanuwana manuwa tunugi-vadavada'aina ginakivemididina, gavaimi ginaga? Nagona yana mani ginahawana be ginahalamanena ka'i mani manuwa anafata o ka'i keke. 29-30Ka'i yana mani fa'ina keke ginanuwanuwa-hagihagi, tu yana manuwa ginayalalakahina, au yana mani ginahavaina fa'ina fa'isewa gina'ilovena. Ada au gaveyao moya'aidi hina'ita-yo hinahawavelaigena hinagayo, Wa'ita, wama kaliva givebutu manuwa gidayogona tu gimaduhegena.
31Kadu'e, ka'i tokaiwabu sa'eyana mali tokaiwabu yana yo'o 20,000 buye gaviya fa'ina hi'ela'ela ma valeyadi ginanogalina, gavaimi ginaga? Nagona ginanuwanuwa ka'i yana yo'o 10,000 anafaiweya yo'o 20,000 hinalugaviyadi o ka'i keke. 32Ka'i keke adifaiweya digo, tomaduyowayowana gina'iveninisedi hinana mali tokaiwabu hinamidilauveni tu hinakova hinagayo, Ama tokaiwabu nuwanuwana veyao. 33#Md 5:27-28Meda anafaiweya ka'i keke wanahawahega be yami gaitoma moya'aidi Iya fa'ikuya wanavekwaulaugedi, kadu keke amifaiweya Iya agaikuya wanavetomuliya.
Yesu givehawala ana muliya ana venuwakibokibo fa'ina.
Madiu 5:13; Maki 9:50
34Lehaga gaitoma hagihagina. Tu ka'i lehaga yana digadigaga gidahavaina digo, keke adafaiweya kadakivedigagi-havagileni, au keke-mo'a. 35Ka'i lehaga ana digadigaga keke, a'a o kevakeva ana iveyamumu fa'ina yana faisewa keke. Au kadahegena. Omi watagami bonaku wadavenogalena.” Au hidedemi Yesu givehawala.
Currently Selected:
Luke 14: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
