Luke 16
16
Lokoloko ana to'itave'avina nuwahuyahuyana tu koyona.
1Kadu'e Yesu ana tomuliya agaidiya gigahetalahobuhobu gigayo, “Wakalivana sa'eyana gimiyami, yana giba ana to'itave'avina valeyana ginogalina higa kaliva tufoidi hi'awatalatalainena vaita yana giba gihebahebana. 2Au gikovana be gi'ela-yo gitoliluveluvena gigayo, Higa tamo gavadi ugana-ma ganogalina? Ya faisewa ana valeya una'ihagihagiyena be yaku giba ana itave'avina againe ya vemadu ganahalamanena. Valeya koyona ganogalina fa'ina ya faisewa ganadabana.
3Wakalivana hidedemi gigahe-yo yana giba ana to'itave'avina nuwahinage gigahe gigayo, Yaku taubada yaku faisewa ginalemaku. Gavaimi ganaga? Fa'ina iya hima faha againe keke fifiwalaku, kadu a'a lokoloko ana ve'o'ola againe wowomumu gananuhagana. 4Oo! Nuwaku gi'afolena. Hidemi hidemi ganahuluva be yaku faisewa yaku taubada ginadabani-yo kaliva hinavetobohiyaneku be agaidiya ganamiyami.
5-6Au hidedemi gigahe-yo kaliva sa'eyana sa'eyana yana taubada againe hibuki-ma giyowanidi. Kaliva nagona gi'ela gigahena gigayo, Yaku taubada againe a buki gavaiyehi? Bana gigayo, Olive gufana dolomu 100. To'itave'avina gigayo, A buki ana fefe uvaini uhiyoto be 100 unayawelina be 50 unamadu'etoladina.
7Kadu kaliva anavelu gitoliyena gigayo, Kadu o'eni a buki gavaiyehi? Bana gigayo, Witi wabaikina 100. Kadu to'itave'avina gigayo, A buki ana fefe uvaini be 100 uyawelini tu 80 u'etoladini. Au hidedemi to'itave'avina gihuluva.
8Tu yana taubada mena valeyana ginogalina againe gigahe gigayo, Yana dewa koyona tu kaliva adi buki gikivekabi'ona fa'ina yana wanuwanuwa gihuluva.” Kadu Yesu gigayo, “Wa'ita, badi babi ana kikaiwabugaga hinuwenuwena-ma yadi wanuwanuwa tobohiyadiyao nuwadi hikivedivedigagina be aimo tova mulina fa'ina hinakidewadewa. Tu badi mahalina ana kaliva ma keke hidanuwanuwa lakahina higa vaita tobohiyadiyao nuwadi ana kivedivedigaga guwana hinanuhagani. 9#Lu 12:33Gagahemi babi ana kikaiwabu wanafolafolakena be medema againe kaliva wanavetobohiyanedi. Ada au aimo kikaiwabu-nadi ginahavaina ana toveya, abaga miyamiya-vagahina againe wanaluku be wanamiyami.” Au hidemi Yesu gigahe.
Babi ana kikaiwabu fa'ina gavaimi kananuwanuwa?
10 #
Md 25:21
Kadu Yesu gigayo, “Hai kaliva vehimeya kabi'ona yana wa'idibumuhiga gi'itave'avina, kadu medema adafaiweya vehimeya lakahina kanavelena. Tu hai kaliva vehimeya kabi'ona keke gida'itave'avini, kadu medema vehimeya lakahina keke gina'itave'avini. 11Au ka'i babi ana kikaiwabu keke yami wa'idibumuhiga wada'itave'avini, hakwa'adi lobama ana kikaiwabu ginavelemi-yo wana'itave'avini? Au keke tamo. 12Kadu ka'i gava kaliva yana giba keke yami wa'idibumuhiga wana'itave'avini, hakwa'adi giba taumiyao fa'imiya ginavelemi-yo wana'itave'avini? Au keke tamo.
13 #
Md 6:24
Tofaisewa keke anafaiweya taubada luhei fa'idiya ginafaisewa. Ka'i adi'iselu fa'idiya ginafaisewa digo, sa'eyana againe ginanuwanuwakoyo tu sa'eyana againe ginanuwanuwa yamumuna, kadu sa'eyana againe ginamiyave'avina tu sa'eyana gina'itatagona. Au keke amifaiweya wananuwanuwaluga. Ka'i nuwanuwami Yaubada digo, Yaubada ana nuwanuwa'eya. Ka'i mani digo, mani ana nuwenuwe'eya.” Au hidede amine Yesu gigahe.
14 #
Md 23:27-28
Tu tonagona tafatafalolodiyao adi egana Falisi mani nuwadi givaina fa'ina, mena Yesu yana gahe babi ana kikaiwabu fa'ina hinogalina againe Yesu hihawavelaigena. 15#Lu 18:9-14Bana Yesu gigahedi gigayo, “Omi wafolafolaka be higa mali kaliva hinagayo, Badi kaliva yegayegadiyao, tu Yaubada ase'asemi gihalamanena. Gavadi agaimiya kaliva hihawaveyamumuyedi, medema vaita iyohoyoho Yaubada matane.”
Mosese yana vehimeya fa'ina.
Madiu 11:12-13, 5:31-32, 19:9; Maki 10:11-12
16Kadu Yesu Falisi agaidiya gigayo, “Tuwai-mo'ena Yaubada yana vehimeya Mosese givelena kadu yana nuwanuwa bonana ana to'awatalatalaina giveledi be hidedemi ginauna Yoni Tobafitaiso yana toveya. Yoni gilakayemu-yo Yaubada yana yo'ogaga ana luku fa'ina yana kaliva hilulumamala, ada kaliva moya'aidi hififaiwala alu'aluwadi givedivediwe be higa hinaluku. 17#Md 5:18Ihayana be lobama babi anafaiweya ginahavaidi tu keke tamo Yaubada yana vehimeya gina'awowolini.
18 #
1Ko 7:10-11
Hai kaliva vavinena ginakilowedi-yo kwamayoku velugana ginanagina, medema ana egana to'udo. Kadu hai kaliva kwamayoku moganedi gikilowedi-ma ginanagidi, medema ana egana to'udo.” Au hidedemi Yesu givehawala.
Wakalivana be Lasalo kahihidi.
19Kadu Yesu gigahetalahobuhobu gigayo, “Wakalivana sa'eyana gimiyami, kaiwabu adi vaigau yabeyabelina be kwayakwaya-mo'ena againe givivaigau kadu aiyeta sa'eyana sa'eyana a'a kevakeva bunabunavina gi'au'ana. 20Yana miyami yamumunaga tu koyokoyo sa'eyana ana egana Lasalo wowona kolikoliyana gimiyami, tova be tova tobohiyaneyao wakalivana yana eda'awaneya hi'ali'aliyena. 21Ada nuwanuwana wakalivana ana awamukumuku gibe'ube'u-ma gina'au'a. Ada galu'eta hi'ela'ela ana koliya hiyamoyamona.
22Himiyami tu bana koyokoyo gi'alika be aluwana lobama ana tovenuwa'ata hinauwena be Abelahamo liline hisena. Tu muliya kadu wakalivana gi'alika be hitauna. 23Ada bana abaga koyona againe givedivediwe tu gida'italele ma yuwa lauveya Lasalo Abelahamo buye hivetogalugedi-ma gi'itadi. 24Au gikova gigayo, Ho kamaku Abelahamo, udahinekalikaliyeku be Lasalo uda'iveninisena ada nimatabona gufa againe gida'utuvini-yo meyaku gidakiveduvedubana be gidatuluna, fa'ina ai'ala'alata againe gavedivediwe lakahina.
25Tu Abelahamo gigayo, Boi babiya ya walokoloko umiyami tu bana Lasalo yana miyami keke yamumuna medema tovai-nadi unanuwenuwena. Tu adamoya bana yana wanuwayamumu gimimiyami tu o ya wa'ase'u'aulolo umimiyami. 26Kadu'e hahavi lakahina gilugolohina fa'ina gaveyao nuwanuwadi omi agaimiya hinadamana-ma keke adifaiweya. Meda keke tamo hakwadi ime agaimeya ginadamana.
27-28Ada wakalivana gigayo, Auwe tu kamaku, gahawayafeyafe gavaimi udagahe be Lasalo uda'iveninisena kamaku yana yo'o agaidiya, fa'ina tobohiyakweyao faifi himimiyami-ma gida'ago'abiyedi be hida hima aulolo lakahina ana abageya keke hina'ela.
29Tu Abelahamo gigayo, Auwe, Mosese yana buki-vehimeya be Yaubada bonana ana to'awatalatalaina yadi buki tobohiyamomo agaidiya hidadauda. Gilubodadi be bonai-dina hidavenogaledi.
30Tu kadu bana gigayo, Keke kamaku Abelahamo, ka'i keke hinavenogaledi. Atu tamo hakwadi alikeya gidamididi-havagi be gidana agaidiya, au makewa hidanuwavilana.
31 #
Yo 11:45-48
Bana Abelahamo gigayo, Mosese be to'awatalatalaina bonadi hikilowena, kadu meda ka'i tamo hakwadi gidamididi-havagi digo, bonana keke hinavenogaleni.” Au hidedemi Yesu Falisi gigahedi.
Currently Selected:
Luke 16: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
