Luke 22

Yudasi Yesu nibaineyao agaidiya ginahawavemogatalena.

Madiu 26:1-5,14-16; Maki 14:1-2,10-11; Yoni 11:45-54

1 # Yem 12:21-27 Tu tafalolo ana egana lobama ana tovenuwa'ata yana Abamaduviviya giluvedaveda'ufo. Medema tovai-nadi beledi keke wa'isina hi'au'ana, fa'ina tafalolo-nadi ana egana velugana Beledi keke Wa'isina. 2Ada badi abaveyao ana tofaisewa kikaiwabudiyao kadu Mosese yana vehimeya ana tovehawala eda hilelelena be gavaimi Yesu hinaluve'alikani, tu yo'o himatausedi. 3#Yo 13:2Hidemi hinuwanuwa tu Yudasi-Isikaliyota ase'asene Setani giluku, bana Yesu yana yo'o tuwelo kalivana. 4Au gina abaveyao ana tofaisewa kikaiwabudiyao kadu tuilala adi tonagona buye hilulukahihi be gavaimi Yesu badi agaidiya ginahawavemogataleni. 5Au badi nuwadi giyamumu ada higahe higa vaita mani hinavelena. 6Ada bana gigayo, “Au yamumuna.” Au gina tu tova yamumuna gilelena be badi agaidiya ginahawavemogatalena yo'o keke hinavaga'auta againe.

Tomuliya Abamaduviviya a'ana hikidewedewena.

Madiu 26:17-19; Maki 14:12-16

7Himiyami tu tafalolo ana egana Beledi keke Wa'isina ana tova giyemu, medema tovai-nadi Abamaduviviya ana sifi kabi'odiyao himunumunudi. 8Au Yesu Fita be Yoni gi'iveninisedi gigahedi gigayo, “Wana Abamaduviviya a'ana wakidewedeweni be buye kana'a.”

9Higahena higayo, “Ha'againe nuwanuwa anakidewedeweni?”

10Bana gigayo, “Wanogali! Melala againe ahe wanayemu-yo kaliva gufa watuwavina gi'avalana-ma ginamaduhagami. Au wanamuliyena be gava manuwa againe ginaluku mededei buye wanaluku. 11Au tonimanuwa wanagahena wanagayo, Tovehawala gigahe gigayo, Hadema vetawana Iya fa'ikuya uhawahegeni be Abamaduviviya a'ana aku tomuliya buye ana'ani? 12Ada vetawana lakahina manuwa getane ivi ahe hi'iyaveyavela-ma ginavehawalemi. Mededei wanakidewadewa.”

13Au tomuliya adi'iselu hina ada Yesu gilukahihiyena amine hinuhagana. Au Abamaduviviya a'ana hikidewedewena.

Yesu ana tomuliya buye hi'a tu sakalameni ana dewa

giseyemaunena.

Madiu 26:20-30; Maki 14:17-26; 1 Kolinita 11:23-25

14Tu au ana tova ahe gilakayemu againe, Yesu gi'enolukekela ada badi afositolo Bana buye hi'enolukekela. 15Ada gigahedi gigayo, “Iya nuwanuwaku lakahina hida Abamaduviviya a'ana omi buye kana'ana. Nagona kana'a, muliya yaku tagiya ginalakayemu. 16E, gagahemi Abamaduviviya a'ana keke-mo'a kadu gana'a-havagileni tu tova mulina hida a'a ana nuwanuwa badi Yaubada yana yo'ogaga agaidiya hinaluku-ma nuwahinagediya ginalakayemu velemo'ena yo gana'ana.”

17Gigahe-yo au gowa givaina digo Yaubada againe givesiule gitunena gigayo, “Hida wavaini be agaimiya wanafolaka. 18E, gagahemi aimo keke tamo oine ganayu-havagileni tu tova mulina Yaubada yana avemwamwala ana tova ginalakayemu, kadu oine ganayuna. Mena avemwamwalai-nadi badi yana yo'ogaga agaidiya hiluku-ma fa'idiya gisena.”

19Au a'a givaina digo givesiule gikihinena au ana tomuliya giveledi gigayo, “Hida wowoku gahawahegena-ma omi fa'imiya. Hidede amine tova moya'aina wananuwa-nunauyeku.”

20 # Yel 31:31-34 Meda anafaiweya hi'a gihavaina gowa givaina gigayo, “Hida gowa dayagiku omi fa'imiya ginamadu be Yaubada yana veyao ivaguna omi agaimiya gisena-ma ana iya'iyaya. 21#Sam 41:9; Yo 13:21-22Tu wa'ita, bana'e nibaikweyao agaidiya ginahawavemogataleku-ma, we'a buye atogaluga be a'a'au'a. 22#Af 2:23Au Iya Tohobu'ela gana'alika tuwai-mo'ena Yaubada givehimeya amine, tu hoiyoi bana kaliva nibaikweyao agaidiya ginahawavemogataleku amanadi! Bana'e vita lakahina ginanuhagana.” 23Au hivebutu hive'atolitoli higa vaita hakwadi badi agaidiya medede amine ginahuluva.

Tomuliya kaiwabu hivekwageyena.

24Kadu'e, ana tomuliya kaiwabu hivekwageyena ka'i hakwadi badi agaidiya kaiwabu againe wai ginago-mo'eni kaliva matadiya. 25#Md 20:25-28Ada Yesu gigahedi gigayo, “Yo'o tulidiyao adi tokikaiwabu yadi wa'agodadaga hi'ita'itave'avidi, kadu yadi tovehimeya taudiyao hivewagadi tonuwakabubu. 26#1Fi 5:1-5Tu omi'iyao ma keke medede amine wanahuluhuluva. Hai kaliva kikaiwabu-mo'ena, medema ginavekwana-we'owe'o. Kadu hai tonagona, medema tobohiyaneyao agaidiya ginave'agetoga. 27#Yo 13:12-15Fa'ina hakwadi kikaiwabu-mo'ena? Ka'i bana'e givetoga be gi'au'a amanadi o ka'i bana'e give'agetoga amanadi? Au bana'e givetoga gi'au'a amanadi, tu Iya'eku agetoga amine hinafamiya gamimiyami. 28#2Ti 2:12Tu omi'iyao vita tulina tulina ganuhagana-ma agaidiya lilikuya wamidi be wavelugaku kalivai-mina. 29Ada Kamaku abavehimeya giveleku amine, meda abavehimeya omi ganavelemi. 30#Md 19:28Tova mulina yaku wa'abavehimeya ganamiyami ana toveya, yaku tolameya wana'au'a wanayuyu kadu didiga'u'uya wanavetoga miIsileli ami yo'o tuwelo kalivai-dina wanavedewayaugidi.”

Yesu Fita yana vekeke fa'ina gilukahihi.

Madiu 26:31-35; Maki 14:27-31; Yoni 13:36-38

31 # Yob 1:6-12, 2:1-6 Kadu gigayo, “Ho Saimoni, Saimoni! Setani give'o'ola be vehimeya givaina higa witi hisibutuna be yogo hinasevehailena amine, omi gaveyao yogo ma ginasibutumi. 32#Yo 17:9,11,15, 21:15-17Tu o fa'iniya gave'o'ola be ya vetumagana Yaubada againe keke ginahavaini. Ada aimo Iya agaikuya ahe unahagavila againe tobohiyamomo ase'asedi unakivevatuna.”

33Tu Fita gigahena gigayo, “Kauveya, iya gahawahegeku be O unaluku deliya kadu iya buye kanaluku. Ka'i O una'alika kadu iya buye kana'alika.”

34Yesu gigayo, “Fita o ganagahe. Tova adamoya kamukamu keke ginakwage tu nagona unamidivekekeyeku tohiye vaita keke udahalamaneku.”

35 # Lu 9:3 Hidemi gigahe, kadu moya'aidi gigahedi gigayo, “Boi melala tulina tulina agaidiya ga'iveninisemi be keke yami mani ana fose, keke yami vainuwana, keke ami ageyafayafa wana ana toveya, ka'i tamo gavadi againe wakali'uho?” Au higayo, “Keke tamo gavadi.”

36Au Bana gigayo, “Tova adamoya hakwadi yana wamani, au gidavaina be gidanauwena, meda anafaiweya vainuwana. Kadu hakwadi yana feto keke, au ana aikeva gidatunedamanena be yana feto gidakimonena. 37#Ais 53:12; Lu 23:32-33Fa'ina agaimiya ganagahe, gavaimi tuwai-mo'ena Veyao Tuwaina ana buki Iya fa'ikuya gigaheye-vagahina, anafaiweya medemi gidalakayemu velemo'ena gigayo,

Hivaita bana'e tokoyona adi yo'o kalivana.

E, gavaimi tuwai-mo'ena Aiseya Iya fa'ikuya gi'etoladina, medemi adamoya gilakalakayemu.”

38Yesu gigahe-yo badi higayo, “Kauveya u'ita, hide'i feto luhei.” Bana gigayo, “Au adafata.”

Yesu yana wavedivediwe Tamana againe give'o'ola.

Madiu 26:36-46; Maki 14:32-42

39Tu Yesu Yelusalema gihegena be gina oya Olive againe yana huluva tova moya'aina amine. Ada ana tomuliya hivebwa'uliyena. 40Ada ahe hiyemu-yo gigahedi gigayo, “Wanave'ove'o'ola be keke aladibidibi againe wanaluku.” 41-42Au gina kabala ka'atugena ana lauva amine be tugana give'etodonena give'ove'o'ola gigayo, “Kamaku, ka'i ya nuwanuwa amine digo, hida aulolo ana gowa udavaihegena tu keke yaku nuwanuwa amine, au ya nuwanuwa amine unahuluva.” 43Hidede amine give'o'ola-yo lobama ana tovenuwa'ata sa'eyana giyemu gilemena. 44Tu ase'asena gi'aulolove'ine fa'ina, yana ve'o'ola againe gifaiwala-mo'a au gihitana ana hitana vaita dayaga babiya gidahelohelolo amine.

45-46Ada give'o'ola gihavaina, gimidi ana tomuliya agaidiya giyewana, badi yadi wanuwavita fa'ina hidauda-ma gigahedi gigayo, “Gavana fa'ina wadadauda? Wamidi wanave'ove'o'ola be keke aladibidibi againe wanaluku.”

Yesu nibaineyao hikive'avina.

Madiu 26:47-56; Maki 14:43-50; Yoni 18:2-11

47Gigahegaheni yo'o hilakayemu, ada kaliva ana egana Yudasi ginagoyedi, bana Yesu yana yo'o tuwelo kalivana. Au Yesu liline gi'ela be higa ginaveyaugina. 48Tu Yesu gigahena gigayo, “Yudasi, ka'i hima veyauga againe Iya Tohobu'ela nibaikweyao agaidiya unahawavemogataleku?”

49Au Yesu ana tomuliya gavadi ginalakayemu ma hi'ita-yo higayo, “Kauveya, ka'i feto againe kanamunudi?” 50Ada tomuliya sa'eyana abaveyao ana tofaisewa adi tokaiwabu ana agetoga gilauna tagana wa'i'atagine giluyo'ena.

51Tu Yesu gigayo, “Auwe gimiya.” Au tagana gikivefosena be gisiveyawana.

52Ada abaveyao ana tofaisewa kikaiwabudiyao kadu tuilala kadu kaliva lakahidiyao hi'ela vaita hidakive'avina be hidanauwena-ma agaidiya Yesu gigahe gigayo, “Vaita Iya tomunugakai'afu amine yo wa'ela wafetomiyao wafulumamiyao. 53#Lu 19:47-48Tova tova manuwa-tafalolo againe omi buye kamiyami tu keke wadakive'aviku. Atu tova adamoya ma yami tova higa umalovana yana abavehimeya giyemu.”

Fita Yesu givekekeyena.

Madiu 26:57-58,69-75; Maki 14:53-54,66-72; Yoni 18:15-18,25-27

54Yesu gigahe-yo au hikive'avina be hinauwena abaveyao ana tofaisewa adi tokaiwabu yana manuweya. Bana Fita wai gimulina lauveya. 55Atu ahe hiyemu be manuwa eda'awana hinafane ai hikulina digo buye hihiyoto-ma againe, Fita gi'ela badi buye hihiyoto. 56Gihiyoto tu agetoga kwamayoku sa'eyana ai mahaline Fita gi'itana, ada gi'itadonedonena gigayo, “Hei! Hidema kalivai-nadi kadu Bana'e buye himiyami.”

57Tu gihawavekema gigayo, “Kwamayoku, Bana kalivai-nadi iya keke gadahalamaneni.”

58Himiyami tu kadu kaliva sa'eyana Fita gi'itana gigahe gigayo, “Kadu o'eni sa'eya agaidiya.” Fita gigayo, “Kaliva iya keke.”

59Bai sa'eyana himiyami tu kadu kaliva velugana gigahedona gigayo, “Au makewa hidema kalivai-nadi Bana'e buye himiyami, fa'ina bana kadu kwanaGalili!”

60Tu Fita gigayo, “Kaliva, gavaimi ugahegahe ma iya keke gadahalamane.” Ada auhe'ama aimo gigahegaheni kamukamu gikwage. 61#Lu 22:34Ada Kaiwabu gihagavilana be Fita gi'itadonena. Au Fita Kaiwabu yana gahe nuwana gi'afolena gigahena gigayo, Kamukamu keke ginakwage tu nagona unamidivekekeyeku tohiye. 62Ada gina yuwa kabu'avane gitagitagi agona lakahina.

Yesu miYuda yadi Koniselo agaidiya hinauwena.

Madiu 26:57-68; Maki 14:53-65; Yoni 18:12-14,19-24

63Tu badi kalivai-dina Yesu hikive'avina-ma hivebutu hihawahawavelaigena himunumununa. 64Kadu matana kalekoya hisebodana au hitoliluvaluva higayo, “Hakwadi gimunumunu-ma mene u'ayauneni?” 65Kadu wonakoyokoyo moya'aina againe hi'ihawadamanena.

66Tu mala gilauna abaveyao ana tofaisewa kikaiwabudiyao kadu Mosese yana vehimeya ana tovehawala higa miYuda yadi Koniselo hivaga'auta, ada Yesu hinauwena yadi vaga'auta againe.

67 # Yo 10:24-26 Au higayo, “Ka'i makewa O Keliso Yaubada yana Tovegida, au agaimeya udahawavemogatala.”

Tu gigahedi gigayo, “Ka'i ganahawavemogatala, keke-mo'a wanavetumaganeku. 68Kadu ka'i agaimiya ganatoliluvaluva, keke bonaku wanalaufata. 69#Af 7:56Tu tova adamoya Iya Tohobu'ela abavetoga kikaiwabuna Yaubada Tofaiwala-mo'a i'atagine ganahiyoto be ganamiyami.”

70Au moya'aidi hitoliyena higayo, “Ka'i O'eni Yaubada Natuna?” Ada gigahedi gigayo, “Wagahe amine Iya'eku.”

71Au higayo, “Kadu kaliva velugadiyao yana hawatagona Yaubada againe hinahawavemogatalena-ma keke kanalele. Au taudeyao Bana Tauna awane ahe kanogalina.”

Currently Selected:

Luke 22: viv

Highlight

Copy