Madiu 14
14
Yoni Tobafitaiso gi'alika.
Maki 6:14-29; Luke 9:7-9
1Tu medema tovai-nadi Helodi, fafali ana egana Galili adi tovehimeya, Yesu valeyana ginogalina. 2Au yana kalivamomo gigahedi gigayo, “Bana kalivai-nadi valeyana kanogalina-ma au Yoni Tobafitaiso. Gi'alika tu gimididi-havagi. Medema fa'ina abaveyaulowoga valeyana kanogalina-ma anafaiweya gififaisewana.”
3-4Helodi hidedemi gigahe fa'ina boi yana kaliva givehimeyedi be Yoni hikive'avina ada hiyogona be deliya hisena. Helodi tobohiyana Filifi vavinena adi egana Helodiyasi giluhabuyedi fa'ina, bana Yoni Helodi gidakeyena gigayo, “Badi kwamayoku-dina unagidi fa'ina nagi ana vehimeya keke uda'itave'avini.” Hidedemi gigahe fa'ina Helodi Yoni deliya gisena. 5Ada Helodi nuwanuwana Yoni ginaluve'alikana, tu yo'o yadi nuwakoyo gimatausena fa'ina badi Yoni hive'amohimohinena higa vaita bana Yaubada bonana ana to'awatalatalaina. Hidedemi hinuwanuwa fa'ina Helodi giga-wayoga.
6-7Himiyami tu Helodi yana tubuga ana toveya yana a'a lakahina gitagova be yana yo'o buye hi'a. Hivemwamwala tu Helodiyasi natudi kwamayoku yo'o matadiya givagavaga. Helodi gimatamatawabuwabu tu nuwana giyamumu-mo'a fa'ina kwamayoku againe giwonadabadaba gigayo, “Yaubada matane gagahe velemo'ena be gavadi gavadi fa'ina unave'o'ola, medema ganevele.” 8Au ulaulatanina hinana Helodiyasi Yoni yana dakeya hi'ago'ugena fa'ina natudi hihawaveleveleni-yo gigayo, “Udavehimeya be Yoni Tobafitaiso u'una hinanikehegeni-yo nau'a againe hina'aliyena be bana ali'alikana gana'itana.” 9Kini Helodi kwamayoku yana ve'o'ola ginogalini-yo nuwana gikabubu tu ana wakawaka moya'aidi matadiya giwonadabadaba fa'ina, givehimeya be Yoni u'una hinavelena. 10-11Au yana kalivamomo gigahedi be hina deliya Yoni u'una hinikehegena, nau'a againe hi'aliyena ulaulatanina hivelena ada au hinana agaidiya ginauwena. 12Ma Yoni ana tomuliya hi'ela Yoni wowona hivaini-yo hinauwena be hitauna. Hitauna gihavaina, hina Yesu hivenuwa'atana.
Yesu kaliva faifi tausani give'adi.
Maki 6:30-44; Luke 9:10-17; Yoni 6:1-15
13Tu Yesu Yoni yana alika valeyana ginogalini-yo yo'o gihegedi tu gina wakeya giyage, tobuya gidamana be melalagaga sa'eyana againe ginahobu anakaibe ginamiyami. Atu yo'o Yesu ahe gina ma hinogalina againe, yadi melala tulina tulina hihegedi be agediya Yesu himuliyena. 14#Md 9:36, 15:32Bana Yesu wakeya ginauna tu gidamana'ela gihobu tu yo'o lakahidi gi'ita-yo gihinekalikaliyedi ada yadi to'aulolo gisiveyawadi.
15Tu mala gilavina againe ana tomuliya Yesu againe hi'ela higahe higayo, “Hida melalagaga againe kamimiyami ada mala gibogibogi. Au yo'o una'atuhegedi be melala agaidiya hinana adiga hinakimonena.”
16Bana Yesu gigayo, “Auwe hinamiya. Omi wanave'adi.”
17Badi higayo, “Gavaiya'amine ime anave'adi? Beledi kabi'odi faifigaga kadu igana luhei ime agaimeya.”
18Yesu gigayo, “Wa'aliyeni we'ai.” 19Ada au yo'o givehimeyedi be isisi'u againe hinavetoga. Hivetoga-yo a'a faifi kadu igana luhei givaidi digo lobameya gi'italele Tamana againe givesiule, au a'a gikihinehineni-yo ana tomuliya giveledi ada badi yo'o agaidiya hifolakena. 20Ada au moya'aidi hi'a be hi'ahiyauwa, ada tomuliya hina adi tufo kwadakwada hikwakwana feyawa tuwelo hivemagadi. 21#Md 15:38Badi kaliva a'ai-nadi hi'a-ma adi kilagalaga au 5,000 tu vevine we'owe'o buye'i a gavaiyehi.
Yesu ni'u getane ginudadana.
Maki 6:45-52; Yoni 6:16-21
22Tu tomuliya kwadakwada hikwakwana gihavaina, Yesu gigahedi be wakeya hinayage wai hinanagona be yuwa fafaline hinamididamana tu Bana Tauna gimiya be yo'o gina'atuhegedi. 23-24#Lu 6:12, 9:28Ada ahe gi'atuhegedi-yo anakaibe oyeya gilaka be Tamana againe ginave'o'ola. Ada au mala gibogi-mo'a tu anakaibe gimiyami tu badi tomuliya ma wakeya wese gawaneya hinauna, ada bolimana lakahina gimadu be giluluveyeveyewana fa'ina lefo waka giluluvilavilana.
25Ada mala kabisona ginalauna tu Yesu badi agaidiya gi'ela'ela ni'u getane ginunudadana. 26#Lu 24:36-37Badi tomuliya ni'u getane ginunudadana ma hi'ita-yo himatautave'ine hitatawayana higayo, “Iyoi! Mene balauma.” 27Atu auhe'ama Yesu gigahedi gigayo, “Wa'asevatu. Hima Iya ga'ela'ela, keke wanamatauta.”
28Au Fita gigahe gigayo, “Kauveya, ka'i velemo'ena O'eni, au ugahe be ni'u getane O againiya gana'ela.”
29Yesu gigayo, “U'ela.” Gigahe-yo Fita wakeya gihobu ni'u getane Yesu amine ginudadana. 30Atu matana gidavelowona ma bolimana gi'itana au yana matauta giyemu, ada givebutu gikamokamomola-yo gikova gigayo, “Kauveya unakibababaleku.”
31Ada auhe'ama Yesu nimana gitunena digo gisilakahina be gigahena gigayo, “O ya vetumagana kabi'ona ma gavana fa'ina ase'ase gi'amalakibo?”
32Ada waka againe hiyemu-yo hiyage tu bolimana gi'atagona. 33#Md 27:54Au tomuliya wakeya himiyami-ma Yesu hihawadavadavana higayo, “Wona velemo'ena O'eni Yaubada Natuna.”
Yesu to'aulolo Genesaleda againe gisiveyawadi.
Maki 6:53-56
34Tu tobuya hidamana-yo fafali ana egana Genesaleda againe hihobu. 35Ada miGenesaleda Yesu hi'itayakahina againe, venuwa'ata medema awa'awana melalina moya'aina agaidiya hi'iveninisena be kaliva yadi to'aulolo Bana againe hi'aliyedi. 36#Md 9:20-21Au hihawayafeyafena be to'aulolo adifaiweya ana aikeva bwatanaga hinakibwa'ena. Ada au gaveyao moya'aidi hikibwa'ena-ma hiyamumu.
Currently Selected:
Madiu 14: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
