Madiu 17
17
Yesu lobama ana nuya kikaiwabuna gi'osena.
Maki 9:2-13; Luke 9:28-36
1Aiyeta sikisi himiyami tu Yesu Fita kadu Yemesa watobohiyana Yoni adi'itoto ginauwedi be oya lakahina againe gilakavedi. 2#2Fi 1:16-18Ada medede againe wowona ana ita tulina gilakayemu, magigina kauwana amine give'akinamanamalena ada ana kaleko mahalina amine gikwaya-mo'ena. 3Ada auhe'ama Yaubada yana kaliva tuwai-mo'ena himiyami-ma adi egana Mosese kadu Elaiya badi matadiya hihobu'ela Yesu buye hilulukahihi.
4Au Fita Yesu gigahena gigayo, “Kauveya, ime hidedei amimiyami ma gilubodana. Ka'i O nuwanuwa amine o vada tohiye ganayogodi, sa'eyana O fa'iniya sa'eyana Mosese fa'ine kadu sa'eyana Elaiya fa'ine.”
5 #
Md 3:17
Aimo gilulukahihi tu buhibuhi mahamahalina tomuliya adi'itoto giwa'utagodi, ada ago'ago sa'eyana buhibuhi hinagene hinogalina gigayo, “Bana hidevama Natu'ase'aseku. Bana nuwaku gikiveyamumu-mo'ena. Au bonana wanavenogalena.”
6Atu tomuliya hinogalini-yo himatautave'ine babiya hivetala'ubo'ubo. 7Tu Yesu badi agaidiya gi'ela gikibwa'edi gigayo, “Wamidi. Au keke wanamatauta.” 8Au hi'italele tu Yesu anakaibe hi'itana, badi velugadiyao a hina.
9Ada oyeya hitauya hihobuhobu'ela tu Yesu givehimeyedi gigayo, “Tova adamoya yami ita fa'ina keke tamo hakwadi againe wanahawavemogatala. Aimo Yaubada Iya Tohobu'ela alikeya ginasivemididiku againe, au wanahawavemogatalena.”
10 #
Mal 4:5
Ma ana tomuliya hitoliluveluvena higayo, “Gahe anogalina higa vaita Elaiya ginamidilakayemu tu muliya Yaubada yana Tovegida ginayemu. Gavana fa'ina Mosese yana vehimeya ana tovehawala hidede amine higahegahe?”
11Yesu gigayo, “Makewa bana Elaiya ginamidiyemu be Kaiwabu yana eda ase'asemiya ginakidewedeweni-yo muliya Yaubada yana Tovegida ginalakayemu. Hidedemi tuwai-mo'ena to'awatalatalaina givenuwa'ata. 12#Md 11:14Atu Iya gagahemi, bana kaliva vaita Elaiya amine ahe gilakayemu ada kaliva hifaniyena be gavaimi hinuwanuwa amine hikivekoyona. Meda anafaiweya Iya Tohobu'ela vita tulina tulina badi nimadiya gananuhagana.” 13#Lu 1:17Ada au ana tomuliya hihalamanena bana Elaiya giyakahina-ma higa vaita Yoni Tobafitaiso fa'ine gidalukahihi.
Yesu kwamana wayafunena gisiveyawana.
Maki 9:14-29; Luke 9:37-45
14Tu Yesu ana tomuliya adi'itoto buye oyeya hihobu be yo'o agaidiya hihobu'ela-yo kaliva sa'eyana Bana againe gi'ela tugana give'etodonena gigayo, 15“Kauveya, natuku kaliva toletolena uda'itanuwakabubuyena, yana aulolo lakahi-mo'ena. Tova moya'aina aiya o ka'i gufeya gibe'ube'u. 16A tomuliya agaidiya ga'aliyena tu keke adifaiweya hidasiveyawani.”
17Yesu gigayo, “Omi kaliva tova adamoya watubuyemu-ma yami nuwanuwa keke tunutunugina, keke ma'ita wadavetumaganeku. Malamala gavaiyehi omi buye kanamiyami tu yami vetumagana ginayemu? Malamala gavaiyehi omi keke wanavetumaganeku tu gana'atuvefa'ilemi? Au kwamana wa'aliye we'ai.” 18Gi'aliyeni tu Yesu yafune gidakeyena be kwamana ginuyabuyabuna, ada auhe'ama giyamumu.
19Tu muliya ana tomuliya adikaibe'uyanina Bana buye himiyami tu hitoliluveluvena higayo, “Gavana fa'ina ime keke amafaiweya wada yafune-nadi adawavini?”
20 #
Mk 11:23
Yesu gigayo, “Yami vetumagana aimo kabikabi'ona fa'ina keke amifaiweya wadawavini. Tu gagahe velemo'ena, ka'i yami vetumagana ana tubuga vaita masitada nafona kabikabi'ona tu gikabukabu lakahina amine, au amifaiweya mena oya againe wanagahe wanagayo, Una yuwa unamidi, ada au ginana. E, yami vetumagana medede amine ginakabukabu-yo gaitoma moya'aina ami tagalowalowa. [ 21Atu mena yafune adi loi ma yadi faiwala lakahi-mo'ena fa'ina keke amifaiweya wanawavi-kawowodi. Au wanave'o'ola-fa'ila kadu au ana tova againe wanamiyami be Yaubada wanave'o'olena amine, amifaiweya wanawavidi.]”
Yesu yana alika yana mididi-havagi fa'ina gilukahihi-havagi.
Maki 9:30-32; Luke 9:44-45
22-23 #
Md 16:21
Tu muliya Galili ana fafaliya tomuliya Yesu againe hivaga'auta-yo gigahedi gigayo, “Iya Tohobu'ela makewa kaliva nimadiya hinahegenauweku be hinaluve'alikaku. Atu aiyeta anaveto againe Yaubada alikeya ginakivemididiku.” Hidedemi Yesu gigahe-yo ana tomuliya nuwadi gikabubu.
Manuwa-tafalolo lakahina ana takesi fa'ina.
24 #
Yem 30:13
Yesu ana tomuliya buye hinauna tu Kafeneumi againe hilakayemu, ada manuwa-tafalolo lakahina ana takesi ana toyaudi Fita againe hi'ela hitoliluvaluva higayo, “Ka'i Bana yami Tovehawala manuwa-tafalolo ana takesi giseusena o ka'i keke?”
25Fita gigayo, “Ika, giseusena.” Gigahe-yo gina giluku manuweya tu takesi fa'ina keke tamo gidagahe. Au Yesu gimidigahe gigayo, “Saimoni, gavaimi unuwanuwa? Babi ana tovehimeya ma gaveyao agaidiya takesi tulina tulina hivivaini? Ka'i natudiyao agaidiya o ka'i mali yo'o agaidiya hivaivaina?”
26Fita gigayo, “Mali yo'o agaidiya hivaivaina.” Yesu gigayo, “Ugahe velemo'ena. Fa'ina tovehimeya natudiyao takesi keke hidaseuseni. 27Meda anafaiweya gilubodaku be keke takesi Kamaku yana manuwa fa'ina ganaseni. Atu keke nuwanuwada mena toyaudi kana'ive'ago'ugadi fa'ina, unana tobuya unavemaina. Au igana ginamidi'alata-ma unataina ada awana unakila'ana be mani unanuhagana. Mani-nadi unanauwena be yada takesi unasena, medema au ada'iselu adafata.”
Currently Selected:
Madiu 17: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
