Madiu 19
19
Yesu vevine adi kilowa fa'ina givehawala.
Maki 10:1-12; Luke 16:18
1Tu Yesu koyona adi aiyawela fa'ina gilukahihi gihavaina, Galili ana fafali gihege tu gina Yudiya ana fafaliya Yolidani yuwa wafafaline gimiyami. 2Yo'o lakahidi hibwa'ulina ada medede againe yadi to'aulolo gisiveyawadi.
3Tu tonagona tafatafalolodiyao adi egana Falisi tufoidi Bana againe hi'ela ana vebau fa'ina. Hitoliluveluvena higayo, “Gavaimi unuwanuwa? Ka'i kaliva nuwanuwana gavadi gavadi fa'ina vavinena ginakilowena ma yada buki-vehimeya gihawahegena o ka'i keke?”
4 #
Aba 1:27
Yesu gigayo, “Ka'i Yaubada bonana nagi fa'ina ma'i wahawahawana o ka'i keke? Boi tuwai-lokalokana babi ana abave'inuba ana toveya Yaubada kaliva gibubuna tu kwamayoku kaliva lulune gibubuna. 5#Aba 2:24; Ef 5:31Kadu gigahe gigayo,
Kwamayoku kaliva lulune gabubuna fa'ina, bana kaliva ma hinana tamana ginahegedi tu ginavemanuwa-damana be vavinena againe ginamiyave'avina ada adi'iselu hinavewowotamo'ai.
6Hidedemi Yaubada gigahe fa'ina, boi tulina tulina himiyami tu adamoya hivesa'eya. Ada au ka'i Yaubada kaliva kwamayoku give'atutamo'aidi amine o keke tamo hakwadi ginavemiyavehailidi.”
7 #
2Veh 24:1-4
Badi Falisi higayo, “Yamumuna tu gavadi-yo Mosese vehimeya giseni higa vaita kaliva kilowa ana fefe vavinena ginaveledi-yo ginawavidi?”
8Yesu gigayo, “Omi tagami kuluna fa'ina Mosese yana vehimeya againe gihawahegemi be vavinemiyao wanakilowedi. Atu boi tuwai-mo'ena Yaubada kaliva vevine gimidibubudi ana toveya, keke kilowa fa'ina gidahawahegemi. 9#Md 5:32Ada Iya gagahemi, hai kaliva vavinena keke hidakelele tu ginakilowedi-yo kwamayoku velugadi ginanagidi, medema ana egana to'udo.”
10 #
1Ko 7:1-2,7-9 Tu Yesu ana tomuliya higahena higayo, “Ka'i Yaubada kwamayoku yadi kelelegaga fa'ina kaliva gihawahegena be anafaiweya ginakilowedi digo, au gilubodana kaliva keke ginanagi.”
11Bana gigayo, “Mena gahe higa vaita kaliva keke ginanagi ma keke moya'aidi adifaiweya hinamuliyeni, tu gaveyao agaidiya Yaubada mena vehimeya gisena medema adifaiweya hinamuliyena. 12Nuwanuwa tulina tulina fa'ina kaliva tufoidi keke hinanagi. Tufoidi hitubuga-ma tubudamadamadiyao be keke adifaiweya hinanagi. Kadu tufoidi mali kaliva hikivetabovihilidi be keke adifaiweya hinanagi-yo kwamana hina'ivetubugini. Kadu tufoidi Yaubada yana faisewa fa'ina taudiyao nagi hikilowena. Gaveyao mena yaku gahe adifaiweya hinamuliyena, medema hinamuliyena.” Hidedemi Yesu gigahe.
Yesu we'owe'o gi'itanuwakabubuyedi.
Maki 10:13-16; Luke 18:15-17
13Himiyami tu we'owe'o Yesu againe hi'aliyedi be nimana badi agaidiya ginase tu ginave'o'oledi. Atu ana tomuliya badi to'aliya hidakeyedi. 14#Md 18:2-3Bana Yesu gigayo, “We'owe'o keke wanahawatadi, au Iya agaikuya hina'ela fa'ina gaveyao vaita we'owe'o keke yadi wakikaiwabu amine, medema Yaubada yana itave'avina againe hinamiyami be ase'asediya ginavehivehimeya.” 15Gigahe-yo nimana we'owe'o agaidiya giseni tu gilowoga be gina.
Kwanatubulakahina yana walokoloko Yesu gikilowena.
Maki 10:17-27; Luke 18:18-27
16Tova sa'eyana kwanatubulakahina sa'eyana Yesu againe gi'ela gigayo, “Tovehawala, gavadi yamumuna ganagani-yo yawai-vagahiku gananuhagani?”
17Yesu gigayo, “Gavana fa'ina gavadi yamumuna ma Iya agaikuya utoliluvaluva? Kaliva sa'eyana gimimiyami, Bana anakaibe'u-mo'a yamumuna. Ka'i nuwanuwa yawai-vagahi againe unamiyami, au Yaubada yana vehimeya una'ita'itave'avina.”
18 #
Yem 20:12-16; Lo 13:9 Bana gigayo, “Hadema vehimeyai-dina?” Yesu gigayo, “Keke unaluve'alika keke unakelele keke unakai'afu, tobohiya yana dewa fa'ina keke unagahe-kawowo. 19Tama be hina unave'amohimohinedi, kadu tauni unuwakabubuye amine tobohiyamomo unanuwakabubuyedi.”
20Bana kwanatubulakahina gigayo, “Mena vehimeyai-dina matatabudi ga'ita'itave'avidi. Kadu gava dewa aimo keke gadamuliyeni-yo gadayegayega-mo'a?”
21 #
Md 6:20; Af 2:45 #
Md 13:22
Yesu gigayo, “Ka'i nuwanuwa unayegayega-mo'a, au unana ya lokoloko moya'aina unakimonevedamanena be fatana koyokoyo agaidiya unafolakena ada au aimo laufata hagihagina lobameya unanuhagana. Unafolakeni-yo una'ela be Iya agaikuya unavetomuliya.”
22Au kwanatubulakahina Yesu yana gahe ginogalini-yo yana wanuwavita gina fa'ina yana lokoloko moya'ai-mo'ena.
23Tu Yesu ana tomuliya gigahedi gigayo, “Gagahe velemo'ena badi wakalivadiyao yadi luku Yaubada yana yo'ogaga agaidiya au vita-mo'ena. 24Kadu ganagahe. Ka'i yomuyomu lakahina ana egana kameli gaima matane ginaluku, medema vitana. Tu ka'i wakalivana Yaubada yana yo'ogaga agaidiya ginaluku be yana itave'avina againe ginamiyami, medema vita-mo'ena.”
25Tomuliya mena gahe hinogalini-yo ase'asedi gi'alilihiwana higayo, “Ha! Keke tamo hakwadi anafaiweya kibababala ginanuhagani.”
26Yesu gi'itakwanekwanedi gigayo, “Kaliva keke taudiyao adifaiweya kibababala hinanuhagani, atu Yaubada ma kaliva adi kibababala o ka'i gavadi gavadi moya'aina au ana tagalowalowa.”
Yesu hawahega ana laufata fa'ina gilukahihi.
Maki 10:28-31; Luke 18:28-30
27 #
Md 4:18-20
Tu Fita Yesu againe gigahe gigayo, “U'ita, ime gaitoma moya'aina ahegena be O againiya avetomuliya. Yama hawahega ana laufata aimo gavaimi ananuhagani?”
28 #
Ha 3:21
Yesu gigahedi gigayo, “Gagahe velemo'ena, aimo tova mulina gaitoma moya'aina ivaguna kadu hagihagina ginalakayemu be Iya Tohobu'ela yaku didiga'u'uya yaku wakikaiwabu ganavetoga ana toveya, omi aku tomuliya kadu didiga'u'u tuwelo agaidiya wanavetoga be miIsileli ami yo'o tuwelo kalivai-dina wanavedewayaugidi. 29Kadu gaveyao moya'aidi yadi manuwa o ka'i noudiyao o tobohiyadiyao o tamadiyao o hinadiyao o natudiyao o yadi babi Iya fa'ikuya hinanuyabuyabudi, medema adi laufata lakahi-mo'ena gavadi gavadi yamumuna hinavaina, kadu yawai-vagahidi hinanuhagana.
30Tu badi adamoya vaita wai hidanagoni-ma aimo wai hinamulina, kadu badi vaita wai hidamulini-ma aimo wai hinanagona.” Hidedemi Yesu gigahe.
Currently Selected:
Madiu 19: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
