Maki 12
12
Faha ana to'itave'avina koyodiyao adi gahetalahobuhobu.
Madiu 21:33-46; Luke 20:9-19
1Tu Yesu givebutu badi miYuda adi tonagona agaidiya gahetalahobuhobu amine gilukahihiyedi. Gigayo, “Kaliva sa'eyana ai guwana ana egana kelefi yana babi againe gifahana. Faha gi'alana, kahu giyalana be aimo guwana ana abavagafuwafuwa fa'ina, kadu kweda tunugina faha ana itave'avina fa'ina giyogona. Kelefi ana faha gikidewedewena gihavaina, kaliva tufoidi faha ana to'itave'avina gisedi tu yana melala gihegena gina mali fafaliya ginunudadana. 2Himiyami tu kelefi ana aikolu ana tova giyemu againe, tonifaha ana agetoga faha ana to'itave'avina agaidiya gi'iveninisena be yana faha againe ana guwa ginavaina. 3Badi to'itave'avina ana agetogai-nadi hikive'avina digo himunukoyokoyona be makagekagena hiwavina. 4Au kadu agetoga velugana gi'iveninisena tu to'itave'avina agetoga u'une hilaulauna ada hikivekoyo-mo'ena. 5Kadu agetoga sa'eyana gi'iveninisena tu to'itave'avina hiluve'alikana. Meda anafaiweya agetoga kadu moya'aidi hikivekoyodi. Tufoidi himunukoyokoyodi, tufoidi hiluve'alikadi.
6Tu kaliva sa'eya-mo'ena gimiyami, higa tonifaha natuna natu'ase'asena. Muliya-mo'ane bana'e badi to'itave'avina agaidiya gi'iveninisena ada gigahe gigayo, Natuku be hinave'amohimohinena.
7Giyemu-yo wama to'itave'avina taudiyao hive'agahegahe higayo, Hida hima bana ana hilafa. Wa'ela be kanaluve'alikana ada yana babi taudeyao kanavaina. 8#Hi 13:12Au hikive'avina digo hiluve'alikana be ala kwaune hihegevihilena.
9Tonifaha gavaimi ginaga? Au ginayewa'ela be badi to'itave'avina ginaluve'alikadi ada yana faha to'itave'avina velugadiyao nimadiya ginasena. 10#Sam 118:22-23; 1Fi 2:6-8Tu gahe sa'eyana Veyao Tuwaina ana bukiya ma'i wahawahawa o ka'i keke? Gigayo,
Ogola manuwa ana to'aiyogona hikilowena-ma
au holili'abi manuwa hinafane-mo'ane gimidimidi.
11Kaiwabu yana vehimeya againe au hidemi gilakayemu,
ada medema giluboda-mo'ena ide matadeya.”
Hidedemi Yesu Yaubada yana gahe Natuna ana kilowa fa'ina giyakahina.
12Au miYuda adi tonagona Yesu badi fa'idiya mena gahetalahobuhobu gilukahihiyena ma hi'ayaunena fa'ina, hivebutu eda hilelelena be higa hinakive'avina. Atu yo'o himatausedi fa'ina hinuyabuyabuna be hina.
Yesu takesi ana sewadi fa'ina hitoliluveluvena.
Madiu 22:15-22; Luke 20:20-26
13Muliya miYuda adi tonagona yadi kalivamomo higa Falisi tufoidi kadu Helodi yana yo'o kalivadi tufoidi hi'iveninisedi be yadi toliluvaluva againe hinavebauna be higa tamo gavadi koyona ginagaheyena. 14Hiyemu-yo higahena higayo, “Tovehawala, ime ahalamanena O ya gahe velemo'ena, keke udave'alololo. Ada kaliva ya vehawala fa'ina gavaimi hinagahe ma keke udamatauseni. Kadu kaliva yadi kikaiwabu keke udanuwenuweni, au ugahe-mo'edi be Yaubada yana eda fa'ina uvehavehawala velemo'ena. Au anatoliye, kwanaLoma yada tokaiwabu lakahina Sisa againe takesi kanasena, ka'i medema gilubodana o ka'i keke? Ka'i mena takesi kadasena o ka'i keke?”
15Hidedemi hitoliluvaluva tu Yesu yadi ve'alololo ase'asediya gi'ita-yo gigayo, “Gavadi-yo wanuwanuwa vaita wanavebauku? Mani kabala wa'aliye be gana'itana.”
16Au kabala hi'aliyena. Bana gitoliyedi gigayo, “Hida hakwadi magigina? Kadu hakwadi ana egana mene kabala againe hikilumini?” Badi higayo, “Bana Sisa.”
17 #
Lo 13:7
Au Yesu gigahedi gigayo, “Hadema Sisa yana lokoloko, medema Sisa againe wanasena. Kadu hadema Yaubada yana lokoloko, medema Yaubada againe wanasena.” Ada au yana bonalaufata giveyaulowogidi.
To'alika yadi mididi-havagi fa'ina Yesu hitoliyena.
Madiu 22:23-33; Luke 20:27-40
18 #
Af 23:8
Tu tonagona tafatafalolodiyao adi egana Sadusi tufoidi Yesu againe hi'ela be hinatoliluveluvena. Badi'iyao ma higahe vaita aimo tova mulina to'alika keke hinamididi-havagi. 19#2Veh 25:5Badi higayo, “Tovehawala, Mosese yana buki-vehimeya againe hidede amine gi'etoladi. Ka'i kaliva sa'eyana kwamayoku ginanagina ada natudi keke tu gina'alika, au kaliva tobohiyana yana vayasi anafaiweya gidanagina be tobohiyana ana hilafa fa'ina natuneyao gina'ivetubugidi. Au hidede amine Mosese givehimeya. 20Au kaliva tobohiyaneyao adi yo'o seveni himiyami tu tomo'ainagona kwamayoku ginagina ada natudi keke tu gi'alika. 21-22Ada taina yana vayasi ginagina ada natudi keke tu gi'alika. Meda anafaiweya kaliva anaveto ginagina ada natudi keke tu gi'alika, ada hinunauwena hinunauwena tu taina kaliva anaveseveni natuna keke tu gi'alika. Muliya-mo'ane kwamayoku gi'alika. 23Au aimo tova mulina kaliva hinamididi-havagi ana toveya bana kwamayoku-nadi ma gava kaliva vavinena? Fa'ina kaliva adiveseveni kwamayoku sa'eyana hinagina.”
24Tu Yesu gigayo, “Yaubada bonana ana vehawala kadu Yaubada yana faiwala ma'i wanuwenuwena o ka'i keke? Keke wadahalamaneni fa'ina, omi keke wadanuwanuwa tunutunugina. 25Tova mulina to'alika hinamididi-havagi ana toveya, lobama ana tovenuwa'ata himimiyami amine meda kaliva hinamiyami. Kaliva vevine keke hinanaginagi keke hinavenavenagi. 26#Yem 3:2-6Tu to'alika yadi mididi-havagi fa'ina ganagahe. Yaubada yana gahe sa'eyana Mosese yana buki againe ma'i wahawahawana o ka'i keke? Ai giyabelina tu keke gida'alahini-ma kahihina againe Yaubada Mosese gigahena gigayo, Iya Abelahamo yana Yaubada gamimiyami, kadu Aisake yana Yaubada gamimiyami, kadu Yakobu yana Yaubada gamimiyami. Hidedemi Yaubada gigahe. 27Badi kaliva wavewagadi ali'alikadiyao ma Yaubada yawayawadiyao gi'ita'itadi. Au Bana'e kaliva alu'aluwadi yawayawana yadi Yaubada, keke ali'alikadiyao yadi Yaubada. Gavadi-yo wagahe vaita kaliva alu'aluwadi wowodi buye gida'alika? Keke wadanuwanuwa tunutunugina, keke-mo'a.” Hidemi Yesu Sadusi gigahedi.
Hadema vehimeya lakahi-mo'ena?
Madiu 22:34-40; Luke 10:25-28
28Tu badi Sadusi Yesu buye hivekwavekwageya tu Mosese yana vehimeya ana tovehawala sa'eyana givanevanenega. Yesu Sadusi bonadi gifatana hagihagina ma ginogalini-yo kadu bana gitoliluveluvena gigayo, “Ada vehimeya moya'aina Yaubada gisena-ma hadema vehimeya lakahi-mo'ena?”
29 #
2Veh 6:5
Yesu gigayo, “Vehimeya lakahi-mo'ena hidede amine. MiIsileli kanogali. Yaubada yada Kaiwabu au Kaiwabu anakaibe'u-mo'a. 30Ase'ase matatabuna kadu alu'aluwa matatabuna kadu nuwa matatabuna kadu ya faiwala matatabuna Yaubada ya Kaiwabu againe unahawahege-'owona be Bana againe unanuwanuwa lakahina. 31#1Veh 19:18; Lo 13:9-10; Ga 5:14Kadu vehimeya anavelu ma hidede amine. Tauni unuwakabubuye amine, tobohiyamomo unanuwakabubuyedi. Au mena vehimeyai-dina luhei vehimeya lakahi-mo'edi. Kadu keke tamo vehimeya gidakaiwabuhegedi.”
32Bana Mosese yana vehimeya ana tovehawala Yesu againe gigahe gigayo, “Tovehawala, ugahe yamumuna. Wona velemona Yaubada anakaibe'u-mo'a kadu keke tamo Yaubada velugana O ugahe amine. 33#Hos 6:6Ka'i ase'aseda matatabuna, kadu nuwada matatabuna kadu yada faiwala matatabuna Yaubada againe kanase-'owona be Bana fa'ine kananuwanuwa lakahina, kadu taudeyao kananuwakabubuyeda amine tobohiyadeyao kananuwakabubuyedi, au medema giluboda-mo'ena. Ka'i kevakeva abaveyao fa'ina kanakabukabuna o yada yomuyomu yada faha Yaubada againe kanahawahegena, medema gilubodana. Atu ka'i mena vehimeyai-dina luhei kayakahina-ma kana'ita'itave'avina medema giluboda-mo'ena.”
34Ada Yesu mena tovehawala yana bonalaufata au nuwahuyahuyana ma ginogalina againe, gigahena gigayo, “Vaita tova kabi'ona Yaubada againe unahawahege be yana yo'ogaga agaidiya unaluku-yo Bana'e ase'aseniya ginavehivehimeya.” Hidedemi Yesu tovehawala bonana gifatana yamumuna yo kaliva velugadiyao himatauta be toliluvaluva kadu keke velugana Bana againe hidaseni.
Keliso inubana fa'ina.
Madiu 22:41-46; Luke 20:41-44
35Muliya Yesu manuwa-tafalolo lakahina againe givehavehawala tu gigahe gigayo, “Gavadi-yo Mosese yana vehimeya ana tovehawala higahe vaita Yaubada yana Tovegida ana egana Keliso Devida bwanenena? 36#Sam 110:1; Af 2:34-35Fa'ina tuwai-mo'ena Alu'aluwa Mahalina Devida gikivetuvetununi-yo bana tauna gigahe gigayo,
Bana Yaubada Kaiwabu iya yaku Kaiwabu gigahena gigayo,
Nima i'atagikuya unahiyoto, O unamiyami tu
nibaimomo ageyafayafaniya ganasedi.
37Au hidede amine Devida tauna Keliso givewagana yaku Kaiwabu, tu gavaiya'amine yana Kaiwabu kadu bana bwanenena muliya gitubuga amanadi?” Hidede amine Yesu givehawala ada kaliva hiyo'oyo'o-ma yadi wavemwamwala bonana hinogalina.
Yesu Mosese yana vehimeya ana tovehawala
gihawavekoyoyedi.
Madiu 23:1-12; Luke 11:43, 20:45-47
38Tu Yesu yana vehawala againe kadu gigahe gigayo, “Taumiyao wana'itave'avimi be Mosese yana vehimeya ana tovehawala yadi dewa keke nuwami gina'abini. Nuwanuwadi aikeva tunugina hina'oseni-yo abakimokimone againe hinanunudadana be kaliva hinalusiuleyedi kadu hinagayo, Velemodi. 39Nuwanuwadi manuwa-abavehawala ana egana sinagogi agaidiya kadu avemwamwala againe abavetoga kikaiwabuna againe hinavetoga. 40Ada sikwasikwadiyao yadi lokoloko hilemadi, ada hive'ove'o'ola-fa'ila be higa kaliva hinahawaveyamumuyedi. Yadi koyona ve'o'ola-fa'ila againe hikevana fa'ina adi vita gavatubuga hinanuhagana.” Hidedemi Yesu tovehawala tovehawalai-dina yadi dewa fa'ina givenuwa'ata.
Sikwa sa'eyadi yadi velekawowo fa'ina.
Luke 21:1-4
41Ada Yesu manuwa-tafalolo lakahina againe givetoga ada velekawowo ana abavedodoga gihagana. Yo'o yadi velekawowo hidododona-ma gilubodedi. Wakalivadiyao moya'aidi hi'ela mani lakahina hidodona. 42Tu sikwa koyokoyodi hi'ela kabala kukwauhina luhei hidodona, fatana vaita toea sa'eyana amine.
43 #
2Ko 8:12
Au Yesu ana tomuliya gikovavaga'auhidi be gigahedi gigayo, “Gagahe velemo'ena mena kaliva moya'aidi yadi velekawowo mani lakahina hidodona tu hida sikwa koyokoyodi yadi velekawowo kabi'ona againe hitubuhegedi. 44Fa'ina badi wakalivadiyao yadi mani tufonaga hidodona ada yadi tufo lakahina aimo gidadauda, tu badi sikwa koyokoyodi yadi mani matatabuna hidodo-'owona, au gavadi againe adiga o adi kaleko hidakimonena mani-nadi Yaubada againe hihege-'owona.”
Currently Selected:
Maki 12: viv
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
