Jenesis-Agafa 19
19
Sodom Gomora kumate vahe'mo'za kefoza hu'naza naneke
1Tare ankero netremoke kinagafi Sodomu kumate uhnatina'e. Loti ana ra kumamofo kasante mani'nege'ne ome ke'na'e. Hanki Loti'a neznageno otino vuno znagafi upri huno, arena areno amanage hu'ne, 2Muse (plis) hurnantoanki ranimota'a eri'za vahetni'amo'na nompi mrerita tnaga sese huteta nagrane maseta oki vugaha'e huno hige'ne, A'o, megi'a kumapi masegahu'e hu'na'e. 3Hianagi Loti'a hankvetigene agrane vu'na'e. Vakeno noma'afi ra ne'za kre znanteno zo'ore breti mago'a kre znantegene ne'na'e.
4Ne'za nete'za omase mani'nageno Sodomu kumate nehzavene ranra vahe'zgane mika Loti nona regagi'naze, 5Loti ke'za atimi'za, iga nantu vahe'ma znavrenkama nonka'afima ante'nana vahera mani'na'e? Znavre kmategeta znanteta msamneno. 6Loti'a atirmino nevuno amefiti kafana eri negino, 7Muse (plis) hurmantoanki nafuheta kefo avu'avazana huoznantegahaze. 8Kma antahiho, ofani'amoke vene omase mofatre manina'anki, zanagri znavre'na eme tmi'nena tamavesi hniaza huku'ma hanuta ana hugahaze. Hagi muse (plis) hurmantoanki nantu vahe'ma noni'afima ena'ana, nonia'mofo amumpamo refiteznante'negu znagria mago'zana huoznantegahaze. 9Huno nehige'za, kagra manigano! Ru kazigati vahe'moka tagrikura nehananki, hago kagra refko hurante'za nehampi, kagrira razampi kazeri haviza hugahune. Lotina atufe'za kafama'are eme rentrako hu'za kafana anafe hu'za hu'naze. 10Ana netremoke Lotina avazuhu nompinka nente'ne, kafa erigi'na'e. 11Maka vene'ne no kasante oti'naza vahe'mokizmia znagra ositeti vuno rante vu'nea nagara zamurga erisu higeza impane eneri'za, kafanku hakre'za vu'za e'za hu'naze.
Loti'a Sodom Kuma atreno hageno ru kaziga vu'nea naneke
12Anama nehzage'ne ana netremoke Loti antahige'na'e, ama kumapina vaheka'a mago'a mani'nazo? Ne'mofaka'ane, negnemone, ruga'a vaheka'ane zamavrenka amafintira ko viho. 13Ama kumara ahe fanane hugahune. Zamagenkemo Ra Anumzamofonte mrerigeno Ra Anumzamo ahe fanane huku hurantegeta e'noe. 14Loti'a mofa'amokizni arave hugaha'e huno huhampri znante'nea ne'tre amanage huno huznante'ne, Anumzamo ama kumara ahe fanane huku nehianki otita vinkero, huno hige'ne, Reravatga nehunka taginke nehane nehu'ne kiza re'na'e.
15Kotu afu'za rugeka nehigeno ankero netremoke amanage hu'ne asmi'na'e, Lotiga ame' hunka mofaka'a rarene, negnarone zamavrenka vuo. Amafi vahe knaza mani'neta erizanku freta viho. 16Loti'a tare agesa nentahige'ne, ana netremoke Lotine, nenarone, mofa'ararene zamazante zamazu huke, ana kumapinti vu'ne fegi'a ome zamatre'na'e. Anumzamo asuntginte'negu Lotina ana hunte'ne. 17Fegiama atirmitageno'a, mago ankeromo huno, tmufagu ko' freho! Magore huta rukrahera huta onkeho, ama agupomofo tvaontera omniho, agonarega mrerita omesi hiho, anama osnuta tamagrane fanane hugahaze. 18Hianagi Loti amanage hu'ne, a'o! Ranimota'a muse hurnantoe! 19Menia antahio, eri'za vahekamo'na nagu'vazinka, nahoke nehenka navrenka eme natrane. Hananagi agonarega vuga vahera omni'noe, nevanenkeno ana knazamo nagtereno nahe frigahie. 20Ko, ama onensa kumara tva'onte me'neaki anampinka tragina ufresue. Onensa kuma me'neanki natrege'na ana osi kumapi fre'na umani'nena ana knazana agatera'neno. 21Ankeromo, knareki mago'ene nantahiganke'na keka'a antahigmuanki traginka ufro, kema hana kumara zamahe fanane osugahue. 22Ame hunka, mago'zama osunesure kagiarenka ana kumate vuo. Ana hu'negu ana osi kuma'mofo agi'a Zoari hu'naze.
Ra Anumzamo Sodom Gomora kumate vahe zamahe fanane hu'nea naneke
23Zge hnatigeno Loti'a Zoari kumate uhnati'ne. 24Unehnatigeno Ra Anumzamo tevenerea salfa havenu monafinti ko'ma riaza huno reherafirmino Sodomu kumate'ene Gomora kumate vahe'ene, 25ana maka ranra kuma'ene, ranra kuma agu'afi mani'naza vahe'ene, hozane, trazane, mopafi nehagea maka'zana ahe fanane huvgare'ne. 26Hianagi Loti nenaro henka ne'eno rukrahe huno negegeno, ana zamo avufgare rukamregeno hagemo'ma hiaza huno krage feno anante oti'ne.
27Abrahamu'a msereti ame nantera otino Ra Anumzane otineno keaga hu'nere vu'ne. 28Vuno unemnino ke fenkamu teno Sodomu kuma'ene, Gomora kuma'enema me'nea agupofina mago'zana onke'ne. Teve kunke ke'ne. Kumo tusiza huno mrenerino vemgu vemgu nehuno refite vgare'ne. 29Ana nehuno Anumzamo ana agupofi me'nea kumara kre nerasgeno Loti mani'nea kumara refinete'no Abrahamunku agesa antahi'negu Lotina avreno rurega ante'ne.
Moab vahe'ene Amori vahe'mokizmi naneke
30Zoari kumapi mani'zanku Loti koro nehuno tare mofa'arere'ne hage'za agonarega havegampi umani'naze. 31Umani'ne'za nuna'amo ngana'amofo amanage huno asmi'ne, nfati'amo'a ozafa re'ne. Amafi ve erita mofavre ksentesnu'a vahe omnitfa hu'ne. 32Antahio, tafati'amofona negi ti ami mnenkeno neteno negi nenena nagatimofo zamagi fanane hu'zankura anukita mse'neta, tfati'amofo mofavre ksentesanu'e. 33Huno hige'ne ana kenage nfaznimofo hanve ti amikeno neteno, agesa ontahi negi neno msenegene, nuna'amo neznafa anukino mase'ne. Anazama ha'ana neznafa'a antahino keno osu'ne.
34Nuna'amo nefa anteno msegeno ko'atia kinaga ngana'amofo amanage huno asmi'ne, hago nagra kenage nerfa'ene mse'noanki meni kenage anahu kna huta hanve ti ami'mnekeno nete'no ete negi nena anukinka mse'tegeta, nfati'a mofo mofavre tmu'ene huta ksenta'mneno, nagati'amofo zamagi fanane huzankura huno hige'ne, 35ana hu'ne, nfa'zanimofona ti amikeno neteno agesa ontahi negi neno msenegeno ngana'amo anukino mse'ne. Anazama hiana neznafa'a antahino keno osu'ne.
36E'ina nehune Loti mofa tremoke nfa'zani mofonteti mofavre znamu'ene hu'na'e. 37Kota mofa'mo ne'mofavre ksenteteno, agi'a Moabu'e huno ante'ne, agra Moab vahe'mokizmi nezmageho'e. 38Hagi ngana'amo enena anazanke huno ne' mofavre ksenteno, agi'a Ben-Ammi'e huno ante'ne. Ana mofavrefinti fore hu'nea vahe'kura Amoni vahere hu'za nehaze.
Currently Selected:
Jenesis-Agafa 19: kbq
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
