Jenesis-Agafa 26
26
Aisaki Gerari mopare mani'nea naneke
1Agatekna ko'ma Abrahamu knafi fore hu'neankna huno ana mopafina fore higeno, Aisaki'a Gerari kumate, Abimeleki, Filistia kini ne'tega vu'ne. 2Ra Anumzamo agrite fore humino amanage huno asmi'ne. Isipia ovuo, Nagrama kasmisua mopare manigahane. 3Ama mopafi mani'nege'na, Nagra, kagrane mani'ne'na asomu hunegantane'na, kagri ene kagehe'ine ama mopa mika neramina, Nagrama huvempa negfa Abrahamunku hunte'noa ke eri knare ha'neno. 4Nagra kagehe'ina zamazeri ra ha'nenke'za monafi hanafi kna hanage'na, Nagra ama mopa kagehei zamisugeno kagehe'impinti, miko mopafi vahe'mo'za asomu erigahaze. 5Na'ankure Abrahamu namage Nagri anteno, kema huankea amage huno, Nagri kasege amage anteno, ruga'a nanekea amage anteno, tra ke'nia avariri'ne. 6Ana higeno Aisaki'a Gerari mani'ne. 7Ana kumate vahe'mo'za nenaronku antahi kageno, agra amanage hu'ne, A' nimo'e huno huzankura koro huno agra nensaroe hu'ne. Agesama antahiana Rebeka'a vahe'mofo anunu hu'are manigeno, ana kumate vahe'mo'za ahezanku anage hu'ne. 8Zaza kna anampi umniteno, Aisaki'a nenaro Rebeka agzafene'geno, Abimeleki Filistia kinimo nomofo avo kampinti ke'ne. 9Anante Abimeleki'a, Aisaki kehuno amanage hu'ne, Antahio, tamage huno ami kagri a' mani'ne! Nahigenka kagra nensaroe hunka hu'nane? Aisaki amanage huno asmi'ne, Na'ankure nagra agriteku hu'na fri'zanku anage hu'noe. 10Abimeleki'a amanage hu'ne, Amazana naza hunerantane? Mago vahe'mo negnaro ene msere'sina, kagra mago knaza eri tamisine. 11Ana huteno Abimeleki'a hakare vahe mago kasege antezmanteno, aza'o ama nero, nenarono avako'ma hanimo'a frigahie hu'ne. 12Menina Aisaki ana mopafi avimza hozafima hankre'neana ana kfufina 100ti'a agatereno hamre'ne. Ana higeno Ra Anumzamo asomu hunte'ne, 13ana ne'mo feno ne' fore nehuno, mago'ene ra huno tusi'a feno anteno, mika fenona ante agatere'nea ne' mani'ne. 14Aisaki'a sipisipi zgane, memeki zgane, Bulimakane, eri'za vahe'ene, rama'a ante'negeza, Filistia vahemo'za zamasigu hunte'naze. 15Menina mika tinkeri agri nefa eri'za vahe'mo'za Abrahamu knafi kafinte'naza, Filisti'a vahe'mo'za mopa kate'za refite'naze. 16Abimeleki amanage huno Aisakina asmi'ne, Kagra tagri'pintira atrenka vuo, kagra tagrira tgaterenka hanve'nentake hane. 17Ananteti Aisaki'a atreno Gerari agupofi seri no anantega omegino mani'ne.
Tinkerigu hafra hu'naza naneke
18Aisaki eteno korapa Abrahamu kafinte'nea tinkeri kafi'ne. Nefa fritege'za Filistia vahe'mo'za refite'naza tinkeri tmina kafiteno, nefa ami'nea agi'a eriksefa huno antetere hu'ne. 19Aisaki eri'za vahemo'za ana agupofi tinkeri nesageno, anampinti ti fore huno mreri'ne, 20Gerari afu kva vahe'mo'za, Aisaki afu kva vahera frage huzmante'za amanage hu'naze. Ama tagri tine! E'inage hzageno agi'a Eseki'e #(agafa'a anahure; frage hu'naze) na'ankure zamagra frage hunante'naze. 21Aisaki eri'za vahe'mo'za mago'ane ru tinkeri nesageno, esaza hu'za Gerari vahe'mo'za fra vazizmente'naze. Fra vazizageno negeno, Aisaki'a ana tinkerimofona Sitne huno agia ante'ne. #(agafa'a anahure; hafra hu'naza tinkerie) 22Aisaki'a ana tinkeria atreno ru' tinkeri ome kafige'za, hafra huontageno ana tinkerimofo agi'a Rehoboti'e huno ante'ne, #(knare huno maniso'e hu kumare) na'ankure Ra Anumzamo'a tzahuno kankmuna tro hurante'neankita ama ana mopare eri hakare hurantesigeta manigahune. 23Aisaki'a ana kumara atreno mrerino Bersiba kumate uhaniti'ne. 24Ana'ma uhanitia kenegera Ra Anumzamo'a efore humino amanage huno asmi'ne, Nagra Abrahamu nafaka'amofo Anumzane, e'igu korora osuo. Nagra kagrane mani'nena asomura hugante'na henka'a kagripinti kegehe'za fore hnamoki'zminena zamazeri hakare hugahue. Na'ankure Abrahamu'a Nagri eri'za vahe mani'negu ana hugahue. 25Aisaki'a ana kumatera kre sramna vu ita trohuno, Ra Anumzamofo agi hanta vzino ana kumateke seri no azeri onetige'za, Aisaki eri'za vahemo'za mago tinkeri kafi'naze.
Aisakike Abimelekike huvempa ke huke hagerafina'a naneke
26Abimeleki'a Aisaki ome kenaku Gerari nevuno, magora knare antahintahi nemia ne' agi'a Ahusati'e, hanki magora ha' vahe'amofo kva ne' Fikoligizni neznavreno vu'ne. 27Aisaki'a zmantahigeno, Tamagra na'anku nagritega neaze, ko'ma mopa tmifintira tamesra hunanteta nahe nati'nazanki? 28Ana kemofo nona'a anage hu'naze, Ra Anumzamo'a kagrane mani'neno kaza nehigeta negeta, tagra anage nehune, Kagri ene tagri ene amu'notifina tamage hunka huvempa naneke hugeta kagrane, tagra hagerfi mneno. 29Kagra, tagrira tazeri havizana osugahane, tagra, kagrira kazeri haviza osuta, trimpa frune hugantonkenka e'nane. Menina Ra Anumzamo knare huneganteno asomura hunegante. 30Ana kezmi nentahino Aisaki'a ra kave kre zamentege'za tine ana ne'zana ne'naze. 31Nantera'me oti'za huvempage hugantugma hute'za, anante Aisaki'a huzmantege'za zamarimpa frune vu'naze. 32Ana'ma huzamtege'za vaza zupa Aisaki eri'za vahe'mo'za amanage hu'za eme asmi'naze. Hago mago tinkeri kafinompinti tina fore hie. 33Ana tinkerimofo agi'a Siba huno ante'ne. #(agafa'a anahure, hnavege huvempa huza hgerfi'naza tinkerie) Meninena ana kumamo'a rahige'za Bersiba kumare hu'za nehaze. 34Iso'a 40ti'a zgegfu maniteno Hiti ne'mofo mofa' eri'ne, agi'a Judi'e, nefa'a Beri'e. Hanki mago a'a mofo agi'a Basemati'e, Eloni mofare, agra enena Hiti ne'mofo mofare. 35Ana atremokizni mani'zamo Aisakine Rebeka gizni znarimpa znata znami'ne.
Currently Selected:
Jenesis-Agafa 26: kbq
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
