Luku 11

Nunamuma huzamofo naneke

(Mat 6:9-13, 7:7-11)

1Mago zupa, Jisasi'a magokaziga manineno nunamu huvgaretegeno, amagema nentea disaipol ne'mo anage huno ome antahigene. Ramoka nunamuma hu'zana, Joni'ma amagema nentaza disaipol naga'ama huzami'neaza hunka rempi huramio huno antahigene. 2Agra anage huno zmasami'ne, nunamuma hanutma anage hiho, Tfatimoka Kagri Kagimo'a ruotge huno mesie. Kagri kumamo'a e'nie. 3Magoke magoke zge knafima nesuna nezana (bretia) neraminka, 4kumitia apaserantegeta, tagranena anazanke huta miko kumima hurantesamokizmia atrezmantamneno. Hagi tatregeta reravataga zampina u'oframneno.

5Anante Jisasi'a anage huno zmasami'ne, hagi magomoka roneka'amofontega kenage vunka, tagufa breti namitegena, henka nonahuna kamineno, 6na'ankure rone nimo'a afeteti eno emaninegena, neza amisuazana omanenegena nehue hanankeno'a, 7nomofo agu'afinti ana ne'mo kenona anage hugahie. Ko kafa erigi'na mofavre'ni'ane, nagranena tafete mase'nonanki, mago'zana eri onkamigahuanki eme nazeri oraotio hugahie. 8Nagra negasamue, nomofo agu'afima mani'nea ne'mo'a, arone'amo mani'neanagi otino agrira ne'za omigahie. Hianagi na'ankure kazikazima hania zanku avesinesiama'a amigahie. 9Ana hu'negu negasamu'e, antahigegeno, anazana kamino, hakesunka, kenka eri fore hugahane. Kafante vagre vagre hugeno, kafamo'a anagi kantegahie. 10Na'ankure antahigaza vahe'mo'za e'nerize. Hakraza vahe'mo'za, keza eri fore nehaze, kafante vagre vagre hanamokizmia, kafana anagi zmantegahie. 11Ina ne'mo amuno tamifinti, mofavre'amo'ma aganetenkeno nozamegu'ma antahigesigeno'a, nozamea omi osifavea amigahio? 12Hifi kokore amuku'ma antahigesigeno'a, amane segintave (Scorpion) amigahio? 13Hanki tamagra havizama nehzamota, tamagra antahinaze. Knare museza mofavretmia nezamize. Mago'ane monafi mani'nea Neramafa'a, Ruotge Avamuku'ma antahigaza vahera zamigahie!

Jisasine havi Avamumofo Belsebul naneke

(Mat 12:22-30, Mak 3:20-27)

14Mago zupa ageruma eritagne havi avamu mago ne'pinti Jisasi'a humegi atrene. Ana havi avamumo atineramigeno, kema nosia nemo'a agafa huno kea nehige'za, tusi'a veamo'za antri hu'naze. 15Hianagi mago'amo'za hu'za, Belsebul, havi hankromofona, ugagota havi hankromofo hanavefi, Agra havi avamu hunente hu'naze. 16Mago'amo'za rehe'za kenaku, agafa hu'za monafinti mago avame'za huraveri huo hu'za hankavetiza antahige'naze. 17Hianagi Jisasi'a antahintahizmia negeno, anage huno zmasmi'ne, mago rankumo amu'nompinti refko huno ha' orente arente haniana, taregamoke haviza hugaha'e. Mago nompi nagamoma amu'nompinti refkoma hanuno'a traka huno haviza hugahie. 18Hagi Satama agra'a naga'ane amu'nompinti refko huno ha' orente arente haniana, nankna huno ana rankuma'amo'a oti hankavetigahie? Tamantahimanegoana, na'ankure tamagra hutma, Belsebul ugagota havi hankromofo hanavefi, havi hankrora hunente hazazanku nehue. 19Hagi Nagra'ma ugagota havi hankromofo Belsebul hanavefima, havi hankroma huntesugeno'a, iza hanavefi tamagri'ma tamagema nentaza naga'mo'za hunentaze? E'ina hu'neankiza zamagra refko hurmantegahaze. 20Hianagi Anumzamofo hanaveretima havi avamu hunentesuana, Anumzamofo kumamo'a ko tamagrira tamagaterene. 21Hanave ne'moma kuma'ama kegva huno manisigeno'a, maka zama'amo'a mane so'e hugahie. 22Hianagi mago hanavenentake ne'mo'ma ha' eme hunteno agateresuno'a, maka ati keve'ane, so'e zama'a erino ome refko hugahie. 23Iza'o Nagranema nomanimo'a ha' renenante. Iza'o Nagrane emeritru nosimo'a panini huno nefre.

Havi avamumo'za ete neaza naneke

(Mat 12:43-45)

24 Agru osu havi avamumo vahepinti atiramino vuteno, ti omane'nea kokampi nevuno, manigsahu kumaku hakeana onkeno anage hu'ne. Ete rukrahe hu'na ko'ma mani'no'a vahe'mofo agu'afi vanue nehuno, 25vuno ana nonte ome keana, nona harafi huno eri so'ehu fatgo hunte'ne. 26Anante ete vuno mago'a 7ni'a havi avu'ava agetereno nehia avamutmi ome zmavareno ege'za, ufre'za umani'naze. Hankino ana nemofona henka nomani'zamo'a, kote nomnizana agatereno havizantfa hu'ne.

Muse hanaza naneke

27Jisasi anage huno nehigeno, mago a'mo vea kevumofo amuno'zimifi mani'neno kezatino, amanage hu'ne, Negrera kaseganteno ami kami'nemo'a muse hugahie. 28Hianagi Jisasi'a kenona huno, ana hu'neanagi Anumzamofo nanekema nentahino amagema nentemo, agatereno musena hugahie.

Jona avame'zamofo naneke

(Mat 12:38-42)

29Tusi'a vea krefamo'za mago'ane etruhu rama nahazageno, Jisasi agafa huno anage hu'ne, ama knafi vahera havi vahe mani'ne'za avame'za kenaku nantahinegaze. Hianagi mago avame'za okegahazanki, Jona avame zanke kegahaze. 30Na'ankure Ninive kumate vahe'mokizmire, Jona'a avame'za mani'neankna huno, Vahe'mofo Mofavremo enena anahukna huno menima mani'naza vahe'motarera huramaverina kegahaze. 31Anumzamo'ma vahe'ma refko huno keagama huzmantesia knarera, Sauti kaziga Siba kumateti Quini a'mo'a otino, Anumzamo'ma keagama refkoma hanirera, ama knafi vahera keontahi vahe mni'naze huno keaga huzmantegahie. Na'ankure ana Quini amo'a afete'arega mni'neanagi, Solomoni knare antahintahi'a antahinaku e'ne. Hianagi antahiho, mago nera Solomonima agaterenea nera amuno tamifina mni'ne. 32Anumzamo'ma vahe'ma refkoma hania knarera, Ninive vahe'mo'za oti'za ama knafi vahera keontahi vahe mni'naze hu'za keaga huzmantegahaze. Na'ankure Jona'ma hia kerera zmagu'a rukrehe hu'naze. Hanki keho, Jonama agatereneazana amafi mni'ne. (Jona 3:4-10,1 Kin 10:1-13)

Tavufgamofo tavimofo naneke

(Mat 5:15, 6:22-23)

33 Vahe'mo'za tavira rekru hu'za oku'a antege, ekaeka kupina eririza refinotaze. Hianagi tavira tagiza tavima rekru hunte azotare antenesageno, remsa hu'nenige'za ufresaza vahe'mo'za kegahaze. 34Tamavurgamo'a tamavufgamofo tavire, tamavurgamoma keama nehanageno'a, maka tamavufgamo'a msa hugahie. Hianagi haviza hanigeno'a maka tamavufgamo'a hani hugahie. 35Hanki tamagripima me'nea tavi'moma hanima huzankura, kva hiho. 36E'ina hu'negu maka tamavufgafima msamoma avimatenenkeno'a, tamavufgafima hanina omnenena, maka tamavufgamo'a tavimoma hiaza huno remsa hu vgaregahie.

Jisasi'a farisi mono kva vahe kezmasu'nea naneke

37Jisasima ana kea huvgaretegeno, mago Farisi ne'mo huno, nagrane feru nezana eme no huno antahigegeno, vuno neza nenaza trate aza tununte (reclined) umanine. 38Ana Farisi ne'moma keama, zamagra Farisi vahe'mo'zama zmazama sesema hute'za nezama nenazaza osu, Jisasima nezama amne nenegeno'a, antri hu'ne.

39Hianagi Ramo'a anage huno ana nera asamine, tamagrama Farisi vahe'motma kapune, pletinena amega sese nehaze. Hianagi tamagu'afina kumazafa zamo'ene, havi avu'avazamo avitene. 40Tamagra negi vahe mni'naze, Agra amegama troma hunemo'a, agu'afinena trora osunefi? 41Tamagrama erinenaza zama, muse nehutma tamaguareti zmamunte omne vahema zmamisazana, tamagrira maka zantamimo'a agru hugahie.

42 Hianagi Farisi vahe'mota kva hiho! Na'ankure tamagra izane aruine, maka hozafi mananentake nezana 10ni'a kevufinti, mago kevua refko huta nemizanagi, Anumzamofo fatgo avu'avazane, avesizamofona netreta, vahera so'e hunozmantaze. 43Kva hiho Farisi vahe'motma! Na'ankure tamagra osi mono nontamimpi ugota trate mani'zanku tamavenesigetma, maketi kumatamimpi vahe'mo'za antahiramiza husgama huramantezankuke nehaze. 44Tamagra Kva hiho! Fri vahe'mokizmi keri refiteankna huta mni'nage'za, vahe'mo'za ana agofetu ontahiza vano nehaze.

45Kasegere ugagota hu'naza vahepinti magomo kenona anage hu'ne, rempi hurami ne'moka, Kagrama ama kema hanana, tagriku'ene huhaviza hurantane huno hu'ne. 46Hianagi Jisasi'a amanage hu'ne, kasegere ugagota hu'naza vahe'motmanena kva hiho. Na'ankure tamagra vahe'mokizmia tusi'a knaza zamizage'za kanagu hu'za eri'za nevazagetma, tamagra mago tamazankoa antetma knaza zmia e'norize. 47Tamagra kva hiho! Na'ankure korapama neramagehozama zmahe'naza kasnampa vahe'mokizmia keri tamagra negafize. 48E'i ana avu'avazamofona, tamagra vahera zmaveri hutma, neramagehoma hu'neazankura knare hu'ne hutma nehaze. Na'ankure neramageho'za kasnampa vahera zmahe fri'nazagetma, tamagra kerizmia kafinentaze. 49E'i ana agafare, tamagri havi tamavu tamavazamofonku, Anumzamofo knare antahintahimofo kemo'enena huno, nagra kasnampa vahe'ene, aposol nagara huntesugeno e'nagetma, mago'amokizmia zamahe nefritma, mago'amokizmia zmazeri haviza hugahaze hu'ne. 50E'ina hu'negu, mona mopama fore'ma hu'neregatima kasnampa vahe'ma zmahe'za korazmima eritagi atre'za e'naza zantera, nona hu'za menignafima mni'naza vahe'mo'za knazana erigahaze. 51Ebolima ahegeno korama'ama tagiraminereti eno, kre sramna vu itane ra mono nomofo amu'nompima Sekaraiama ahazageno, korama'ama tagitre'nea knarema ehanatinea vahe'mokizmi koramofo nona'a, tamage ama knafi vahe'motare refko huno nona huramantegahie. 52Kasegere ugagota hu'naza vahe'motma kva hiho! Na'ankure antahintahizama eri ki nofira erinetretma, tamagra'a anampina unofreta, anampima ufrenaku'ma nehaza vahe'mokizmi kana rehi'za hunezmantaze. 53Jisasima anama huteno, ananteti atreno nevige'za, kasegere ugagota hunaza vahe'mo'zane, Farisi vahe'mo'zanena agafa hu'za zmarimpa henente'za, rama'a zanku agenoka nehu'za, 54mago'a kema hanifinti azerinaza kanku hake'naze.

Currently Selected:

Luku 11: kbq

Highlight

Copy