Luku 13
13
Agu'a rukrahe osnimo'a fanane hania naneke
1Jisasi'ma anante mani'negeno, Galili vahe'ma Paeroti zamahe frino korazmi erino Anumzamofonte kre sramna vu'zane eri havia huzamige'za, kre sramna vu'naza nanekea mago'a vahe'mo'za eme asmizageno, 2Jisasi'a anage huno eme zmasami'ne, tamagra tamagesa antahizana, ana Galili vahe'mo'za mago'a Galili vahe'mokizmi zmagetere'za tusi'a kumi hu'nazankino anazamo hige'za, ama knazana enerize hutma nehazo? 3Nagra neramasamue, a'o. Hianagi tamagrama tamagu'a rukrehe osanutma, mikamotma anahu hutma frigahaze. 4Hifi tamagra antahizana 18ni'a vahe'ma Siloamu kumate zaza nomo kriteno zmahe fri'nea vahe'mokizmi kumi'zmimo'a, maka Jerusale mani'naza vahetmimofo kefozana zmagetere'za hu'naza vahe fri'naze huta nehazo? 5Nagra i'o hu'na neramasamue. Hianagi tamagu'a rukrahe osnutma e'inahu kna hutma tamagranena mika frigahaze.
Raga'a ore'nea fiki zafamofo fronka naneke
6Anage nehuno, Jisasi'a ama fronka ke zmasami'ne, mago ne'mofona waini hoza'afina, fiki zafa kri'neankino, nena raga'ama rente'nenigu ome keana, raga'a reonte'ne. 7Hoza nefa'a, ana hoza'ama kegva kri'nea neku huno kamago, tagufa kafu zgefima etevute hu'na koana, ama zafamo'a raga'a reonteanki antagitro! Nahanigeno mopamofo tima'a eri vgaregahie? 8Higeno hozare kegva nehia ne'mo'a, hoza nefana anage huno asami'ne, atregeno ama kafufina me'nena, agafafina mopa kafina mago'a azeri masavema hu'zana antanena, 9rgama anaga'a kafufima renteniana, knare hugahie. Hanki raga'ama reontesigenka eme antagi atresane huno asami'ne.
Jisasi'a mni fruhu kna zupa mago ara azeri so'e hunte'nea naneke
10Mni fruhu (Sabati) knazupa Jisasi'a osi mono nompi umrerino rempi hunezmigeno, 11mago ara 18ni'a kafu zgefi havi avamumo amagena azeri fagagigeno, pripri huno vano nehuno, oti fatgo huno vano nosia a' 12Jisasi'a negeno ke higeno egeno, ama amoka, krimofo kinafintira katufegantoe. 13Nehuno ana a'mofo agofetu azana antegeno, ame huno ana kriamo'a vgaregeno oti fatgo nehuno, agafa huno Anumzamofo agi erisaga hu'ne. 14Hianagi osi mono nonte kva ne'mofona rimpa he'ne. Na'ankure Jisasi'ma manifru knazupa (sabat) ana a'mofo eri so'e hunte'negu, maka veara amanage huno zamasmi'ne. 6si'a eri'za eneruna kna me'negu, tamazeri so'e hanie hanutma, e'i ana knafi egahaze. Hanki mni fruhu (sabati) knazupa tmazeri so'e hanie hutma omeho. 15Hianagi Ramo'a ana kenona'a anage'a huno asami'ne, tamagra tavre vahe mani'naze. Makamotma mni fruhu (sabat) knazupa burimaka tamifi, donki tamimofona kegina zmifinti ti nesnagu katufeta zmavareta novazo? 16Hanki ama ara Abraha mofakino, Sata'a zaza kna 18ni'a kafuzgefi kina rentegeno mani'nege'na, mni fruhu (sabat) knazupa katufe netrogeta, mni fruhu knagi anahura osuo hutma nehazo? 17Anagema nehigeno'a, ke ha'ma rentaza vahe'mo'za zmagazegu nehazageno, maka veamo'za hirozantfama hu'neazankura muse hu'naze.
Zistigu'ene mastet zafa avima'agu hu'nea fronka naneke
(Mat 13:31-33, Mak 4:30-32)
18Anante Jisasi'a amanage hu'ne, Anumzamofo kumara inankna hu'ne? Nazante avame kea huntena hugahue? 19Masteti zafamofo raga'a, osi raga'a me'negeno, mago nemo erino hoza'afi krigeno hageno ra zafa segeno, hare'za vanoma nehaza nmamo'za azankunate no zmi eme kizankna hu'ne.
20Mago'ane Jisasi'a anage huno hu'ne, Nazante avame kea Anumzamofo kumakura huntena hugahue? 21Amanahu kna hu'ne, mago a'mo sikoni krenaku rama'a flauapi, osi'a zisti herafinteno eri havia huntegeno, ana mikaflauamo zonerea kna hu'ne.
Osi kahamofo naneke
(Mat 7:13-14,21-23)
22Anage huteno, Jisasi'a ranra kuma'tamimpine, osi kuma'tamimpi ufreno rempi huzamime Jerusale vunaku nevigeno, 23mago vahe'mo amanage huno antahige'ne, Ramoka Anumzamo'ma zmaguma vazi'nea vahera osi'a mani'nafi? Jisasi'a anage huno zmasami'ne. 24Osi kafantema ufrenakura hanavetita ufreho. Na'ankure rama'a vahe'mo'za osi kafanteti ufrenakura hanazanagi, uofregahaze. 25Nomofo nfa'amo otino kafa erigina, kafante eme otineta vagre vagre nehuta, Ramoka kafa anagiranto! Hanageno ana ne'mo'a huno, igati vahe mani'naze, tamagrira ontmage'noe huno hugahie. 26Hanigetma tamagra anage hugahaze. Kagrane magopi mani'neta ne'zane, tinena neneta kumatifi rempi huraminketa antahi'nomota neone hanageno, 27Nagra ontamagenoanki, igati vahe mani'naze, Kefozanke hu vahe'mota amafintira manigneho huno huramantegahie. 28Anampina zavira neteta tmavera anikreki nehuta, Abrahamune Aisakine Jekopune, maka kasnampa vahera Anumzamofo kumapina kegahaze. Hu'neanagi tamagrira tamasgafetrena megi'a manineta krafa hugahaze. 29E'ina hanigeno maka veamo'za zge hanati kazigati'ene, zge fre kazigati'ene, ruga raga soparegati'ene Anumzamofo kumapi eme eri atru hu'za zmaza tununte (recline) manigagine'za ne'za netrate ne'zana negahze. 30Hanki henka mni'nenaza vahe'mo'za ugota hanageno, ugota hu'nenaza vahe'moza uhenkategahaze.
Jisasi'a Jerusale vaheku asuntgi zamante'nea naneke
(Mat 23:37-39)
31Anagema nehigeno, Farisi vahe'mo'za e'za amanage hu'za Jisasi asmi'naze, atrenka amafintira ru kaziga vuo. Na'ankure Heroti'a kahenaku nehie. 32Jisasi'a huno, afi' kragna vahera amanage huta ome asmiho, antahiho havi avamu'tamina hunentena, kri vahera menine oki'nena zmazeri neganamrena, anante knazupa eri'zama erivgareku e'nore uhnatigahue. 33Tamage Nagra menine oki'nena vuna tagufa knazupa uhnatigahue. Na'ankure kasnampa nera, Jerusale kumamofo megi'a ahe ofrigahaze. 34Jerusale kumare, Jerusale kumare, Kva huo! Anumzamo huntegeno kagriku'ma e'nea kasnampa vahera zmahenefrita, havenkno zamahe'naze! Nama'a zupa Nagra mofavre raminka'a, a' kokoremo anenta'a agekona kampi azeri franekiaza hunaku huanagi, tamagrira tamave'nosie! 35Antahiho, nonkumatmimo'a vahe omni kokankna hugahie. Nagra anage hu'na neramasamue, tamagra Nagrira onage maninesageno mago knama esigetma, anage hugahaze. Ramofo agifi ne-emofona asomu huntesie hutma hugahaze.
Currently Selected:
Luku 13: kbq
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
