Ann Bokwakwarin 24
24
Isaac Awan Jever Aurin
1Abraham ari on iorokwar isawar. Ato on bobo aifan engon tutufin ifofour on BADA imomoginai. 2Ra kaitamom, Abaraham an bobo orot atamanin on goa amonai sawar engon tutufin ikakaifaren on aurin iyau, “Om imam sasanawui eiwan ato unau matan. 3Yau agogoi Om safam a tafanam an BADA God Wabinai unifaro on, om men arimon nin Canaan sabu sanasi yau natu orot awan unrubinai mes. 4Om totor unmatabir unan tafanam menan yau au rat barenai nan ato yau au dam warar amosi emon, yau natu orot Isaac awan jeverei unboai.”
5Baise bobo orot itetemai iyau, “Ato jeverei intinan men anboai annanat mes on mamaba? Enonosin arimon fofonin natum orot anboai anmatabir men om am tafanamai?”
6Abraham iyafotai iyau, “Ambin! Om natu men unboai unmatabir au tafanamai mes. 7BADA, safam an God on tamau an goa a yau au rat baren tafanam emon iboeu agat ato ifaro on arimon atonio motob on wawau agiriu inites. On an anea arimon iniyafarai onai ininetewarim unan natu orot awan unboai ato unmatabir. 8Ato jeverei intinan men ingogoi rum wonnanat mes on, yau au baifaro emon irufanim. Baise bobo kaitamom wat on, yau natu on men unboai unmatabir unan men yau au tafanamai.” 9On mes bobo orot iman an bada Abraham sasananai iwanen ato ifaro mamaba Abraham iyawur on itafour mes.
10Namon bobo orot an bada Abraham an camel engon auyotoat iboen a siwar obis fani iboen ato inai Abraham tain Nahor an mafam gagamin aurin Mesopotamia tafanamai nan. 11On an werai on inai dogu sareu mafam gagamin kounai igat mom on camel iyames sindas sirouen. On min irabirabi, on an werai jever sigat sareu sitasu mes. 12Namon bobo orot ibayoi ifefeyan iyau, “O BADA, yau au bada Abraham an God, ari ra eibaisiu au bobo innat obin inmatar ato am moa obin uniyamai au bada Abraham aurin. 13Eit! Yau atonio dogu sareu bisinai atatawar, ato mafam gagamin an jeverig on se gat sareu sinasu. 14Yau arimon jeverei tani anawur, ‘Karun, am kibub eyirai esur ato sareu eiteu atoman.’ Ato on jeverei am bobo orot Isaac aurin unrurubinai mes on, arimon auriu inau, ‘Basit, au bada, etoman.’ Namon on inbotein inau, ‘Yau arimon am camel mat asi sareu anboai sintoman. On bobo nanaba inmamatar on yau arimon ansagob Om am moa obin on au bada Abraham aurin ufour.’ 15Bobo orot on nana ibabayoi ato jeverei boboun wabin Rebecca on abaranai sareu kibub iyabar mat inat igat. On min Abraham tain Nahor awan Milcah rus natus Bethuel, on natun jeverei. 16On jeverei on mamarag ato matafin, men orot tani rus siyen on. On isur inai dogu sareuai nan kibub sareu ibonuai ato imatabir men inat. 17Bobo orot iyayai inai inefotai ato iyawur iyau, “Karun, fofonin am kibub emon sareu utiteu attoman i.”
18Jeverei iyafotai iyau, “Au kavian, basit sareu untoman” on ra kaita kibub abaran emon iyeirai isur imanai ibotan ato itai itoman. 19Rebecca sareu itai itoman isawar gibunai ato iyau, “Yau anan sareu anboai annat am camel mat auris ato anites sintoman inan inifofonis.” 20On ra kaita an kibub sareu bobaitu asi didiwagai irir isawar ato iyayai inai dogu sareuai nan sareu turin ba isun ibo inat auris, on bobo nanaba ifour i nan i nat sareu ibikayam mom asir camel engon sareu sitoman ifofonis. 21Ato orot on dura ambin asi matanai wat ibimateteai itsagob mamaba BADA on an bobo iyamai inat obin emamatar ai ambin. 22On an werai jeverei camel sareu ites sitoman isawar weie, orot agim gold aburus an urakof an baiyan gagamin ibo ato aburunai iyein a agim gold kwasi tayabaris ruam on asunai iganen. 23Namon on itetemai iyau, “Om ekasoneu, om tamam on iyafan a an goai efan fofonin yau au orot mat ari fom wat nan waten?”
24On iyafotai iyau, “Yau tamau on Bethuel a wawau orot jever on Nahor a Milcah. 25Wei ai goai on wayo ison kwakwan sen fofonin camel bayu sinam a ai goa amonai on eb efan yen fofonin omi mat wonen.”
26Namon orot sindan irou ato BADA ikwafirai. 27On iyau, “Yau BADA anifain, yau au bada Abraham an God, on an kaber a faskikinai an aumatan au bada aurin ibokikin. Ato yau on BADA ibototoriu totor wat anat au bada Abraham an dam warar auris agat.” 28Jeverei iyayai inai ayon an goai ato bobo engon tutufin simamatar auris on idudur. 29-30Rebecca robun wabin on Laban. On an werai on robun aburunai urakof a asunai kwasi iten a dura mamaba orot jeverei iyawur on idudur i tatam on, on iyayai inai ato orot igaturai dogu sareuai nan camel sesebisi itatawar, 31ato iyawur iyau, “Om enat rut tanan au go. Om orot on BADA imomoginem. Aibo mes nin kounai etatawar? Yau au goai on efan abotitiwag yen om aurim a am camel mat auris.” 32On mes Abraham an bobo orot on Laban rus sinai au go. Ato Laban an bobo orot on camel tefasi emon sawar siyeiren ato asi bayu siboen sinat sites siyam. Namon sareu sibo sinat Abraham an bobo orot a on an orot mat ass sitsouen mes. 33Namon bayu nanai siyein, baise on iyau, “Yau men gariwat bayu anam mes, ab ainau on dura an kasonem unsagob yau aibo mes anat nin.” Laban iyau, “Basit, ekasonei.”
34On mes bobo orot on ibosuruf dura ikakafun iyau, “Yau on Abraham an bobo orot. 35BADA on yau au bada Abraham gagaminai bag imomoginai ato sawarotin imatar. On bobaitu engon; sheep, goat, cow, agim silver, agim gold a orot jever agirotis on engon itai. 36Yau au bada awan Sarah on ijenekwar an werai fifi orot ituai, ato yau au bada an buder engon natun itai. 37Yau au bada iyameu aifaro on an dura atifonaboai mes. On iyawureu iyau, ‘Om men Canaan tafanam emon jeverei unrubin yau natu awan mes. 38Baise om unan tamau an sabu, an dam warar amosi natu awan nan unrubin. 39Ato yau au bada aitetemai au, ‘Ato jeverei men ingogoi yau rui wannanat on arimon mamaba? 40On iyafoteu iyau, ‘BADA ato ra fufur abifonaboai On arimon an anea iniyafarai om rum wonan bainonot aifan on iniyamai weinem. Om arimon tou au sabu emon natu awan unboai, yau tamau an dam warar emon. 41Eta on kaitamom wat. Om unan yau au dam warar auris ato osi men sinibasitem jeverei unboai unnanat on arimon om baifaro emon on inrufanim.
42Yau ari rabirabi anat dogu sareuai nan ato abayoi, ‘Yau au bada Abraham an BADA God, karun, eibaisiu au bobo innat obin inmatar. 43Yau atonio dogu sareuai. On an werai jeverei boboun sareu boin mes ingagat on, yau arimon anifefeyanai an kibub emon sareu initeu antoman. 44Ato on jeverei inbibasit sareu initeu antotoman a toun ingogoi camel asi sareu inboai inites sintotoman on, yau asagob jeverei min on urubinai au bada natu awan mes.’ 45Yau nana ababayoi ato Rebecca abaranai kibub auman inat ato isur dogu sareuai sareu itsun mes. Yau awur au, ‘Karun, sareu eiteu antoman.’ 46On ra kaita an kibub abaran emon iyeirai isur ato iyau, ‘Etoman a mat am camel sareu anites sintoman.’ On mes yau sareu atoman ato on camel ba asi sareu ites sitoman. 47Yau aitetemai au, ‘Om iyafan natun jeverei?’ Ato on iyafoteu iyau, ‘Yau on Bethuel natun jeverei, Bethuel on Nahor a Milcah rus natus.’ Namon yau urakof aburunai ayein a asunai kwasi aiganen. 48Namon yau sindau arou ato BADA akwafirai. Yau BADA anifain, yau bada Abraham an God. On ibototoriu totor wat anat yau au bada an dam warar auris ato jeverei agaturai on natun awan mes. 49Basit omi ari wongogoi ami moa obin a dura bagai wat au bada Abraham aurin wonbiyamai on basit rerebai wonkasoneu. O omi men wongogoi mes on eb rerebai wonkasoneu ato yau an sagob au bainonot aniyamai.”
50Namon Laban a Bethuel rus siyafotai siyau, “Atonio bobo on BADA emon, on mes wei men eta tani yen aifan wanau on. 51Rebecca on atonio, om ebo ato enai am bada Abraham natun orot awan mes inmatar, mamaba BADA Toun iyau nanaba.” 52On an rai Abraham an bobo orot atonio dura itatam on, on sindan irou ikwafir isur magin motob iruyein ato BADA ikwafirai. 53Namon bobo orot on monag sawar agim silver a agim goldai sibiyamen on a beber iyateten ato iboen Rebecca itai. Mat on siwar baiyas gagamis bag on robun a ayon ites.
54Namon Abraham an bobo orot an orot mat sinat on bayu siyam sitom ato fom nan mat siyen. Osi fomenei simisir ato Abraham an bobo orot on iyau, “Yau agogoi anmatabir men anan au bada aurin.”
55Baise Rebecca robun orot a ayon rus siyafotai siyau, “Jeverei on eikirir tafaror kaitamom o ra auyotoat nanaba mat wanama weie on gibui inan.”
56Baise Abraham an bobo orot on iyawures iyau, “Men wonbotaniu mes. BADA on ibaisiu au bib iyamai inat obin imatar; on mes woniyafareu anan au bada Abraham aurin.”
57Osi siyafotai siyau, “Basit ot jeverei tayor enat ato taitetemai tait.” 58On mes osi Rebecca siyor inat ato sitetemai siyau, “Om egogoi atonio orot rum wonan i?” On iyafotes iyau, “Eee! yau rui anan.”
59On mes osi Rebecca a an fio kaifar jever on sikirires ato Abraham an bobo orot a on an orot fani mat sinai. 60Ato osi atonio dura ai on Rebecca simomoginai ato siyawur siyau:
“Wei robui. Om arimon sabu babaisonis ayos unmatar! Om wawam agirim arimon asi ragit sinbomerubes ato asi mafam gagamis sinboai!”
61Namon Rebecca a an bobo jeverei rus sibotitiwag ato asi camel tefasi sigai simair. Abraham an bobo orot Rebecca ibo ato tafanam sikirir sinai.
62Isaac on Dogu Sareu BADA Yayawasin Yau Eiteu On An Dogu Sareu emon inat Canaan tafanam turinai nan imama. 63Rabirabi tani Isaac igat inai masauai ibibib ato matan ireben inai on camel si nat on ites. 64On an werai Rebecca iyeit Isaac it on an camel emon isur 65ato Abraham an bobo orot itetemai iyau, “Orot ato masau ai ibib aurit enat on iyafan?”
Bobo orot iyafotai iyau, “On min yau au bada Isaac.” On mes Rebecca beber ibo ato magin ikukum.
66Namon bobo orot ato bobo engon tutufin ifofour on Isaac ikasonai. 67Isaac on Rebecca ibo sinai ayon Sarah an guwi ai sirui ato nan iawan sima. Isaac on Rebecca inuaboai ato on emon kubainunub ibo, on an rai ayon irabob gibunai.
Currently Selected:
Ann Bokwakwarin 24: ubr
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
