Juan 18
18
Pegdakep ki Jesus
Juan 18:1-11; Mat. 26:47-56; Mar. 14:43-50; Luc. 22:47-53
1Penga te pegtawal-tawal i Jesus, nesayo sikandin aw menge tinoledaan din, aw dimoton dan dipag te baog iningedanan Kidron. Dimeleg dan doton te kekeyowan. 2Si Judas, sìyan migtolok kandin, tapay netegahan din se dotonan dan, so melikit dimoton si Jesus tinekingan te menge tinoledaan din. 3Nayan, minangay si Judas te menge sondalo aw menge otaw egtonggò te simbahan insogò te menge pengolo te simbahan aw Parisiyo, aw timaking dan kandin doton te kekeyowan. Nengibing dan te menge solò, aw gansà, aw kekamang dan. 4Nayan, tapay netaga-taga si Jesus aw eden se domateng kandin. Yan pegdateng te menge otaw timaking ki Judas, simongon si Jesus kandan aw mig-insà, “Sinu lay se inahà niyo?”
5Timaba dan, “Si Jesus tege Nasarit.”
Minikagi si Jesus, “Siak se inahà niyo.”
Kidoen heman doma te menge sondalo se migtolok ki Jesus si Judas. 6Pegdineg dan te inikagi i Jesus te sikandin se inahà dan, migpeosos dan aw nekelias dan. 7Todà mig-insà si Jesus, “Sinu lay se inahà niyo?”
Timaba dan, “Si Jesus tege Nasarit.”
8Minikagi si Jesus, “Tapay a minikagi diyà kenyo te siak se inahà niyo. Na, aw benal siak se inahà niyo, pebeyai niyo se menge doma ko seini.”
9Pineokit te inikagi din sìyan, netoman se kagi tapay intawal-tawal din, te eked kebàti se otaw insalig te Timanem diyà kandin.
10Na, tinagnos i Pedro se podok din aw tinigbas din se sineligan te ontò pengolo te simbahan, aw nepalot se telinga din lenged te kowanan. Si Malco se ngadan din. 11Minikagi si Jesus diyà ki Pedro, “Olii se podok diyà te lomà, so keilangan detengan a te kelimahan imbegay te Amay ko diyà kanak.”
Inibing si Jesus doton ki Anas
12Penga niyan, se menge sondalo aw kapitan dan, aw menge otaw egtonggò te simbahan te Judiyo, dinakep dan si Jesus aw ginapos dan sikandin. 13Inibing dan onà doton ki Anas, so si Anas se ogangan i Caifas ininang ontò pengolo te simbahan dalem te omay sìyan. 14Si Caifas se tapay minikagi diyà te menge obanen te Judiyo te mèpiya aw olò sebad se otaw imetayan amon mekelowà se kedita te otaw.
Imbolon i Pedro si Jesus
Juan 18:15-18; Mat. 26:69-70; Mar. 14:66-68; Luc. 22:55-57
15Nayan, si Simon, se doma ngadan din si Pedro, aw doma din sebad tinoledaan i Jesus, timelokon dan ki Jesus. Pegdateng dan doton te balay te ontò pengolo te simbahan, timaking se sìyan sebad tinoledaan ki Jesus doton te dowangen te balay, so kinilala sikandin te ontò pengolo te simbahan. 16Meneng mig-ogpà si Pedro kidoen te lowà te alad medapag te lelebangan. Na, sìyan doma tinoledaan, kinilala sikandin te ontò pengolo te simbahan. Limowà sikandin, aw nemoyò diyà te bayi migtonggò te lelebangan te alad te ipeawop din heman si Pedro. 17Mig-insà se bayi migtonggò te lelebangan ki Pedro, kagi din, “Indà? Sikona se sebad tinoledaan te otaw sida dinakep.”
Meneng timaba si Pedro, “Kenà ko.”
18Nayan, mig-antay te apoy se menge sineligan aw otaw egtonggò te simbahan amon meg-ingadang dan, so megenaw se delem sìyan. Migdoma-doma si Pedro kandan aw mig-ingadang heman.
Ininsà te ontò pengolo te simbahan si Jesus
Juan 18:19-24; Mat. 26:59-66; Mar. 14:55-64; Luc. 22:66-71
19Nayan, mig-insà se ontò pengolo te simbahan diyà ki Jesus tepad te menge tinoledaan din aw intoladà din. 20Timaba si Jesus, “Netegahan te kedita te otaw se inikagi ko, so gayed a egtoladà kidoen te menge simbahan te Judiyo aw kidoen heman te dakel simbahan dini te Jerusalem egtiponan te kedita te Judiyo. Wedà ko elesi se intoladà ko. 21Meneng ikà eg-insà kanak. Labi pa mèpiya aw meg-insà ka diyà te menge otaw dimineg kanak, so netegahan dan aw eden se intoladà ko.”
22Peg-ikagi din kenyan, doen sebad otaw egtonggò nenampak ki Jesus. Minikagi heman sikandin, “Eked kepakay aw iling kenyan se pegtaba no diyà te ontò pengolo te simbahan.”
23Minikagi si Jesus, “Simpana medaet se inikagi ko, indani kay aw eden se kedaet niyan. Meneng aw wedad kedaet diyà te inikagi ko, medaet se pegpenampak no kanak.”
24Penga niyan, todà ginapos se belad i Jesus, aw impeibing sikandin i Anas doton te ontò pengolo te simbahan si Caifas.
Todà imbolon i Pedro si Jesus
Juan 18:25-27; Mat. 26:71-75; Mar. 14:69-72; Luc. 22:58-62
25Dalem niyan, mig-ingadang pa si Pedro. Mig-insà se doma otaw, “Indà? Sikona besi heman se sebad diyà te menge tinoledaan din.”
Meneng migbolon si Pedro aw minikagi, “Kenà ko.”
26Kidoen heman se sebad sineligan te ontò pengolo te simbahan. Sikandin se kedowa te sineligan pinelotan i Pedro te telinga din. Minikagi sikandin diyà ki Pedro, “Sikona besi se kinità ko migdoma kandin kidoen te kekeyowan.”
27Todà heman migbolon si Pedro, aw penga niyan migkolaak se manok.
Inibing si Jesus doton ki Pilato
Juan 18:28-38; Mat. 27:1-2,11-14; Mar. 15:1-5; Luc. 23:1-5
28Penga niyan, inibing dan si Jesus lekat te balay i Caifas pesalo doton te balay inogpaan te gobirnador insawol te gobirno te Roma. Ontò dan limapos se pegpesalo dan doton. Wedà awop se menge obanen te Judiyo diyà te balay te gobirnador amon eked dan pekelàpang te punù ingkeliwat i Moises kandan tepad te pegpelinis, so simpana mawop dan diyà te balay te otaw kenà Judiyo, eked kepakay aw makop dan komaen te Pista te Pegpelowà. 29Yan se doun te limowà diyà kandan se gobirnador si Pilato, aw minikagi, “Eden lay se dimanda niyo tepad te otaw seini?”
30Timaba dan, “Simpana wedad salà ininang din, eked day ibingi dini kamno amon ipelumun nikaw.”
31Minikagi si Pilato, “Mèpiya aw sikiyo se megpelumun kandin tepad te menge punù egtoloen niyo.”
Minikagi se menge obanen te Judiyo, “Meneng eked kepakay diyà te gobirno te Roma aw sikami se mengimatay te otaw ipelumun day.”
32Neinang iyan amon metoman se inikagi i Jesus tepad te keokit te pegkematay din.
33Minawop si Pilato te balay din. Impeangay din heman si Jesus aw mig-insà, “Sikona lay se Selotan te menge Judiyo?”
34Minikagi si Jesus, “Lekat lay te kamno aneng-aneng se ininsà no, aw lekat lay iyan te doma otaw mig-indan kamno tepad kanak?”
35Timaba si Pilato, “Kenà a Judiyo. Meneng menge doma no Judiyo aw menge pengolo te simbahan niyo se nengibing kamno dini kanak. Indani a aw eden se salà ininang nikaw.”
36Timaba si Jesus, “Kenà dini te keneyonan se peglowan ko. Simpana dini te keneyonan se peglowan ko, yan domapit se menge sakop ko kanak amon eked a dekepi te menge obanen te Judiyo. Meneng kenà dini te keneyonan se peglowan ko.”
37Minikagi si Pilato, “Ontò ka kedì selotan.”
Minikagi si Jesus, “Ee. Benal se inikagi no te selotan a, so yan se doun te migpekeotaw a. Insogò a dini te keneyonan amon meg-indan a te kebenalan. Egpenenelanen a te kedita te otaw migpesakop diyà te kebenalan.”
38Minikagi si Pilato, “Wedad palos otaw metaga-taga aw eden se ontò kebenalan.”
Pig-okom si Jesus te imetayan
Juan 18:38–19:16; Mat. 27:15-31; Mar. 15:6-20; Luc. 23:13-25
Nayan, penga te peg-ikagi i Pilato kenyan, todà limowà diyà te balay din, aw minikagi diyà te menge obanen te Judiyo netipon kidoen, “Wedad palos salà din kinità ko. 39Na, kelikit te Pista te Pegpelowà, doen ketanem niyo dini te doen ipelowà ko diyà kenyo sebad otaw kineleboso. Meibeg kaw lay aw ipelowà ko se Selotan te menge Judiyo?”
40Migbelobansag dan, “Kenà otaw seini se ipelowà no, meneng ibeg day si Barabas.”
(Na, si Barabas se megdedempasay.)
Currently Selected:
Juan 18: mbs
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.
