YouVersion Logo
Search Icon

Luk 21

21
A etabor anun a ula
(Mk 12:41-44)
1O Iesu i kis una rumu na etabor, i tamtama usa, ra i tama a kum tene gongon det woro tar anundet a etabor una dino ra di ser woro mani uni. 2Ra i tama ara sibo na ula kai i woro tar aru toia kut. 3#2 Kor 8:12Ra o Iesu i watungi lena, “A inanos mot nama lingmulus, a sibo na ula ri, i woro a labino mani taun det rop ra det woro anundet a kum mani. 4Det woro tari kut a sibano tagun anundet a kum mani, ikut a sibo na ula ri, i sa woro rop ru asau ra in topas anun a kinkinis.”
A kum ukinalong ina ururop na bung
(Mt 24:1-14; Mk 13:1-13)
5 # Lk 19:44 A ramano kum nat na ususer det watungi una rumu na etabor lena, di sa mar tari nama kum wakak na watat ma a kum etabor ra di pitari torom o God. Ikut o Iesu i watungi lena, 6“A kum utna ri, ra mot tama det, a bung in nanpat numur ra din rege ginogino det rop, ma katu wat in inep netes un tu wat.”
7Det ting o Iesu lena, “Tene Ususer, nangisin mo a kum utna ri in nanpat? Ma asi na ukinalong ra in ese i lena i sa milau sur det in nanpat?” 8I balu det lena, “Mot in tumarong, sako din toro pas mot. Uni a susut det in nanpat nama risang, ma det in warango det lena, ‘Iau a Karisito,’ ma lena, ‘A du bung i sa milau.’ Gong mot mur det. 9Ra mot in longoro a kum inaim ma a kum inaim tomo nama gapman, gong mot ngara, uni a kum utna ri det in nanpat mugu, ikut a ururop ina rakrakon bual ken nanpat utmakai.”
10O Iesu i watungi tandet lena, “A kum kamkabo taro det in tur na inaim torom a kum se kabotaro, ma ara gapman in tur na inaim torom ara gapman. 11A kum lamlabino guri, ma a kum munurak ma a kum ngas na dekdek na misait una kum tamon, ma a kum ngas na utna tagisapat una bakut ra in ungara a taro, ma a kum lamlabino ukinalong tagisapat una bakut, det in nanpat.
12“Numugu ra a kum utna ri ka det wanpat utmakai, din dat pas mot, din ukadik mot, ma din dat mot una kum rumu na lotu sur a warkurai, ma din uruk mot una kum karabus. Ma din dat pas mot sur a warkurai sa numugu umatan a kum king, ma a kum lamlabino mugumugu, uni mot anungi. 13I ra, a wakak na du bung, sur mot in wasiso talapor un iau torom det. 14#Lk 12:11-12Gong mot nuknuk mugu sur asau ra mot in balu lako kum etakun nami. 15#Ap 6:10Uni iau ut, an unuk tar a wasiso ma a mananos kai una nuknuki mot, ra anumot a kum ebar rop, ka det in balu lar pasi, ma ka det in ipul ru i. 16#Mt 10:21-22A kum tamtama mot ma a kum nanamot, a kum tistisi mot, a kum kukumot, ma a kum paspasa mot, det in mulaot ru mot sur din um doko lako taro tagun mot. 17A taro rop det in nget mot uni mot anungi. 18Ikut ka tin iwu na lorimot in raro. 19Anumot a tuntunur dekdek in ulaun mot.
O Iesu i watungi lena din kamar ru o Jerusalem
(Mt 24:15-21; Mk 13:14-19)
20“Ra mot in tama a kum taro na inaim det tur talilis pas o Jerusalem, mot in tasmani lena i milau sur din kamar ru i. 21Ma det ra det kis una papor Judia, det in kalabor eno usapat una kum tangai, ma det ra det kis una tamon Jerusalem det in pirso, ma det ra det kis sa ubual gong melet mo det ruk. 22#Jer 5:29; 46:10; Os 9:7Uni a kum bung ra, det a kum bung na minabalu sur din pam sot pas a kum ututna rop ra di sa tumus tari una Buk Tabu. 23Una kum bung ra, in laulau doko torom a kum tianan, ma torom a kum ino kai ra a kum nutnutun det, det sus utmakai. A labino ngunungut in nanpat una tamon Israel, ma a kankan anun o God in monong a taro ri. 24#Sng 79:1; Tam 11:2Lako taro din um doko det nama totok na inaim, ma lako taro din ben pas det sur det in kis na karabus una kum tamon rop. Ma det ra awu sur a taro Juda det in pas tataun o Jerusalem, ma in tuk ut una bung ra o God i kubus tari sur a taro ra awu sur a taro Juda det in mana nama ban laulau a taro Juda.
A Nutun a Musano in nanpat
(Mt 24:29-31; Mk 13:24-27)
25 # Ais 13:10; Ese 32:7; Jol 2:31; Tam 6:12-13 “A kum ukinalong in nanpat sapat netes unin matanas, ma una kalang, ma una kum nangnang. Ma nin upiso a taro tagun a kum gapman rop det in laulau nama nginara una karangop ina top ma a wungu ino, ma a nuknukin det kai in talara uni. 26A taro det in matmat lalang nama nginara kibino una kum utna ra in nanpat una rakrakon bual, uni a kum utna sapat netes una bakut det in tugunu. 27#Dan 7:13; Mt 26:64; Tam 1:7Una bung ra, det in tama a Nutun a Musano in nanpat una du bakut, nama dekdek ma a labino minamar. 28Ra a kum utna ri in turpasi sur in nanpat, mot in tur, ma mot in tatado, uni a bung ra o God in ulaun pas mot uni i sa milau.”
A wasiso elelar unin nanai na fig
(Mt 24:32-35; Mk 13:28-31)
29O Iesu i watung a wasiso elelar ri tandet lena, “Mot in nuk pas in nanai na fig ma a kum duwai rop. 30Ra mot tama a kum gomono det in sibul pat, mot tasmani lena, a kum kalang na mararong i sa milau. 31Lenkutkai ra mot in tama a kum utna ra a wasiso taru uni in nanpat, mot in tasmani lena a matanitu anun o God i sa milau. 32A inanos mot nama lingmulus, a kum utna rop ri in nanpat ra a taro tagun uniri det laun utmakai. 33A langit ma a rakrakon bual der in rop, ikut anung a kum wasiso ken rop.
Mot in tumarong mot
34“Mot in tumarong mot, sako mot in balon nama pam lukaro ma a ininum, ma a nginara sur a kum utna una nilaun nin upiso, ma a bung ra in nanpat kisin torom mot elar namin nukun. 35Uni in nanpat torom a taro rop una rakrakon bual. 36Mot in tumarong mot una kum bung rop, mot in wararing sur mot in dekdek sur mot in walip gusun a kum utna rop ri ra milau det in nanpat. Ma mot in wararing kai sur mot in pet lar pasi sur mot in tur umatan a Nutun a Musano.”
37Una kum bung rop o Iesu i ususer a taro ubalan in noworo ina rumu na etabor, ma una kum mirum i pirso, ma i kis una tangai, a risano o Oliw. 38Ma una kum bung na kobot raut, a taro rop det wan toromi ubalan in noworo ina rumu na etabor sur det in longoro i.

Currently Selected:

Luk 21: kqw

Highlight

Share

Copy

None

Want to have your highlights saved across all your devices? Sign up or sign in