Ebikolwa by'Abatume 3
3
Omusaadha omulema awonezebwa
1Agho olwatuuka Petero ni Yoanne baaniinaniina okuja mu isinzizo ku saawa omwenda, esaawa ey'okusaba. 2Ghaabaagho omusaadha ye baali basitwire, nga mulema okuva lwe yava mu nda ya inhina, era buli lunaku yabanga agho ku mulyango ogw'eisinzizo, ogwetebwa Omulungi, ng'asabiriza empiiya ku bangira mu isinzizo. 3Ono bwe yabona Petero ni Yoanne nga bali kumpi okwingira mu isinzizo, yaabasaba bamufunireyo ku mpiiya. 4Petero yaamwekalirisa ni Yoanne. Agho Petero yaamukoba ati: “Tulingirire.” 5Yeena yaabalingirira, ng'asuubira okufunayo akantu. 6Petero yaamukoba ati: “Feeza ni zaabu nzira aye kye ndi nakyo kye nkugha. Mu liina lya Yesu Kurisito ow'e Nazarethi situka otambule.” 7Yaamugema ku mukono omusaadha, yaamusitula. Era mangu ago nga ebigere bye n'enhingo bikakata. 8Olwasituka yaayemerera, yaatambula yangira nabo mu isinzizo ng'ali kutambula bw'atuumatuuma era ng'asaaka Katonda. 9Abantu boonaboona baamubona ng'atambula ng'asaaka Katonda. 10Baamumanha nga n'oyo eyatyamanga ku Mulyango Omulungi ogw'eisinzizo ng'asabiriza empiiya. Beewuunhia inho era baayasaamirira olw'ekyali kimukoleibwaku.
Petero ayogera eri abantu
11Bwe yali ng'akeegemye ku Petero ni Yoanne, abantu boonaboona baalumuka baidha ghe baali ku lubalaza olwetebwa olwa Solomoni, nga bayasaamiriire. 12Petero bwe yabona abantu abo yaabakoba ati: “Abasaadha Abaisiraeli, lwaki kino mukyewuunhia? Lwaki mutulingirira mutyo ng'oti maani gaife na butuukirivu bwaife n'ebitambwiza ono? 13Katonda wa Aburahamu, Katonda wa Isaaka, Katonda wa Yakobo, Katonda wa badhaadha baife, n'agulumiiza Omwana we Yesu, oyo ye mwaghaayo era ni mumwegaana mu maiso ga Pilato, bwe yali asazeegho okumulekula.#Kuv 3:15 14Imwe mwegaana omutuukirivu era ow'amazima, mwasaba babalekulire omutemo.#Mat 27:15-23; Mar 15:6-14; Luk 23:13-23; Yoa 19:12-15 15Mwaita mwene bulamu, oyo Katonda ye yazuukiza mu bafu, era ife tuli badhulizi b'ekyo. 16Ate olw'okwikiriza, eriina lye kye liviire liwonia ono ye mubona era ye mwidhi. Okwikiriza oyo, n'okumughaire okuwonera irala nga mwenamwena bwe mubona.
17“Kale aboluganda, ndidhi nga imwe n'abafuzi baimwe ekyo mwakikola mu butamanha. 18Aye Katonda kye yalangirira ng'abita mu balanzi be boonaboona ati Kurisito we, yali waakudaagadaaga, yakituukiriza atyo. 19Kale mwenenie, mukyuke memale ebibi byaimwe bisoniyibwe. 20Mufune obwire obw'okwesiima mu maiso ga Musengwa, era olwo abasindikire Kurisito Yesu oyo ye yabategekera okuva eira. 21Waire nga kimugwaniire oyo buti okuba ng'akaali mu igulu okutuusa ekiseera eky'okwiza byonabyona obuyaaka nga Katonda bwe yayogerera mu balanzi be abatuukirivu okuviira irala mu mainhama. 22Kuba Musa bwenebwene yakoba ati, ‘Katonda Musengwa alibafunira omulanzi mu baganda baimwe, nga nze. Mumuwuliranga mu byonabyona by'abakoba.#Ma 18:15, 18 23Era kiisi muntu atawulira mulanzi oyo alitoolebwa mu bantu yazikirizibwa.’#Ma 18:19 24Era n'abalanzi boonaboona abaayogera, okuva ku Samueli, n'abaamwiririra, enaku dhino baadhiranga. 25Niimwe abaana ab'abalanzi era ab'endagaano Katonda ye yakola ni badhaadha baife ng'ekoba Aburahamu eti ‘Mu izaire lyo amaghanga goonagoona mwe galifunira enkabi.’#Mainh 22:18 26Agho ni, Katonda bwe yalonda Omwana we, yasooka kumutuma ye imwe abaghe enkabi nga buli mulala akyuka yaaleka ebibi bye.”
Currently Selected:
Ebikolwa by'Abatume 3: Sog
Highlight
Share
Copy
Want to have your highlights saved across all your devices? Sign up or sign in
Baibuli Ekibono kya Katonda © The Bible Society of Uganda, 2014
