ငဝ်ႈ 20

ဢႃႇပြႃႇႁၢမ်ႇတင်းဢၽိမလႅၵ်ႉ

1 ဢႃႇပြႃႇႁၢမ်ႇ၊ၵေႃႈၶၢႆႉသေၵႃႈတီႈမမ်ႇရေႇ၊ၵႂႃႇၸူးပွတ်းၸၢၼ်းမိူင်းၶႃႇၼၼ်ႇ၊သေလႄႈယူႇသဝ်းၵႃႈတီႈဝဵင်းၵေႇရႃႇ၊ဝူင်ႈၵၢင်ဝဵင်းၵႃႇတေႇသႃႉ၊တင်းဝဵင်းသုရႃႉ၊ပုၼ်ႉဢေႃႈ။- 2မိူဝ်ႈမၼ်းယူႇတီႈဝဵင်းၵေႇရႃႇ၊ၼၼ်ႉမၼ်းဝႃႈမေးမၼ်းၸႃႇရႃႇ၊ၼၼ်ႉပဵၼ်ၼွင်ႉယိင်းမၼ်းဝႃႈၼင်ႇၼႆလႄႈဢၽိမလႅၵ်ႉ၊ၶုၼ်ႁေႃၶမ်းဝဵင်းၵေႇရႃႇ၊သိမ်းဢဝ်ၸႃႇရႃႇ၊ဢေႃႈ။- 3ၼႂ်းၶိင်ႇၵၢင်ၶိုၼ်းၽြႃးပဵၼ်ၸဝ်ႈပေႃႇမႃးၵႃႈတီႈဢၽိမလႅၵ်ႉ၊ၼႂ်းတၢင်းၼွၼ်းၽၼ်လႄႈလၢတ်ႈဝႃႈ၊ “မႂ်းတၵ်းလႆႈတၢႆၵွပ်ႈပိူဝ်ႈမႂ်းသိမ်းဢဝ်ၽူႈယိင်းၵေႃႉၼႆႉဢေႃႈ။ လွင်ႈမၼ်းၸမ်ႉ၊မၼ်းပဵၼ်မေးပိူၼ်ႈဢေႃႈ၊” ဝႃႈၼင်ႇၼႆဢေႃႈ။

4 ဢၽိမလႅၵ်ႉ၊ၵေႃႈပိူဝ်ႈဢၼ်ဢမ်ႇပႆႇလႆႈတိူဝ်ႉထုၵ်ႇၵၼ်တင်းၸႃႇရႃႇ၊လႄႈလဝ်ႈလၢတ်ႈဝႃႈ၊ “ၸဝ်ႈၽြႃးတီႈၶႃႈ။ ၶႃႈၸဝ်ႈသိုဝ်ႈတေႃႇယူႇတီႈၶႃႈဢေႃႈ။ ၸွင်ႇၸဝ်ႈႁဝ်းတၵ်းယႃႉၽဵဝ်ႈၶႃႈၸဝ်ႈႁူမ်ႈလူၺ်ႈၵၼ်တင်းၵူၼ်းၶႃႈၸဝ်ႈတီႈၶႃႈႁိုဝ်း။- 5တူဝ်ဢႃႇပြႃႇႁၢမ်ႇ၊လၢတ်ႈဝႃႈ၊မႄႈယိင်းၼႆႉပဵၼ်ၼွင်ႉယိင်းမၼ်းဝႃႈၼင်ႇၼႆလႄႈတူဝ်မႄႈယိင်းၼၼ်ႉၵေႃႈလၢတ်ႈဝႃႈ၊ဢႃႇပြႃႇႁၢမ်ႇ၊ပဵၼ်ပီႈဢၢႆႈမၼ်းဝႃႈၼႆတီႈၶႃႈဢေႃႈ။ ပိူဝ်ႈဢၼ်ၶႃႈၸဝ်ႈမီးၸႂ်သၽေႃးဢၼ်သိုဝ်ႈယူဝ်းဢိၵ်ႇတင်းမိုဝ်းဢၼ်မူတ်းၸၢင်ႇသေလႄႈႁဵတ်းလွင်ႈတၢင်းၼႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။

6ၽြႃးပဵၼ်ၸဝ်ႈၶိုၼ်းလၢတ်ႈၵႃႈၼႂ်းတၢင်းၼွၼ်းၽၼ်ၼၼ်ႉလႄႈဝႃႈ၊ “ၸႂ်ႈယဝ်ႉ။ ၵဝ်ႁုလွင်ႈဢၼ်မႂ်းမီးၸႂ်သၽေႃးဢၼ်သိုဝ်ႈယူဝ်းလႄႈႁဵတ်းၸိူဝ်ႉၼင်ႇၼၼ်ၼၼ်ႉယူႇ၊ၼင်ႇႁိုဝ်မႂ်းတၵ်းဢမ်ႇလႆႈၽိတ်းပိူင်ႈၵဝ်ၸိုင်၊ၵဝ်ၸင်ႇႁႄႉၶႅၼ်မႂ်းလႄႈဢမ်ႇပၼ်ႁႂ်ႈမႂ်းလႆႈတိူဝ်ႉထုၵ်ႇၵၼ်တင်းမၼ်းၼၼ်ႉယဝ်ႉ။- 7တေႃႈလဵဝ်ၼႆႉဢဝ်ၽူႈယိင်းၼၼ်ႉၶိုၼ်းဢၢပ်ႈပၼ်တီႈၽူဝ်မၼ်းတႃႉ။ ၽူဝ်မၼ်းၼၼ်ႉပဵၼ်ပရေႃးၽႅတ်ႈ#20:7 “ပရေႃးၽႅတ်ႈ” - ပဵၼ်ၽူႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈဢၼ်တၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈလႄႈမၼ်းတၵ်းတေသူးတွင်းပုၼ်ႈမႂ်းႁႂ်ႈမႂ်းလႆႈလွတ်ႈတၢင်းတၢႆဢေႃႈ။ ပေႃးမႂ်းယင်းဢမ်ႇၶိုၼ်းဢၢပ်ႈၸိုင်၊ၸႃႉၸဵမ်မႂ်းလႄႈၵူၼ်းမႂ်းတင်းလၢႆတၵ်းတေလႆႈတၢႆဢေႃႈ၊” ဝႃႈၼင်ႇၼႆဢေႃႈ။

8ထိုင်ဝၼ်းမိူဝ်ႈၽုၵ်ႈၵၢင်ၼႂ်ၸဝ်ႉၸဝ်ႉဢၽိမလႅၵ်ႉ၊ႁွင်ႉဢဝ်မူးမၢတ်ႈၽွင်းမိူင်းမၼ်းတင်းလၢႆမႃးလႄႈမွၵ်ႇလၢတ်ႈလွင်ႈတၢင်းဢၼ်ပဵၼ်မႃးၸိူဝ်းၼၼ်ႉတီႈၶဝ်လႄႈၶဝ်ၵူဝ်ႁႄၼႃႇလူင်လၢင်ဢေႃႈ။- 9ဢၽိမလႅၵ်ႉ၊ၸင်ႇႁွင်ႉဢဝ်ဢႃႇပြႃႇႁၢမ်ႇ၊သေလႄႈထၢမ်ဝႃႈ၊ “ႁဵတ်းသင်လႄႈမႂ်းႁဵတ်းၸိူဝ်ႉၼင်ႇၼႆတီႈႁဝ်း။ ၵဝ်လႆႈၽိတ်းပိူင်ႈၸိူဝ်ႉၼင်ႇႁိုဝ်တီႈမႂ်းယဝ်ႉလႄႈမႂ်းႁဵတ်းႁႂ်ႈဢပျတ်ႈဢၼ်ယႂ်ႇၼႃႇလူင်လၢင်ၼႆႉတူၵ်းႁွတ်ႈၵႃႈၼိူဝ်ၵဝ်ဢိၵ်ႇတင်းၵႃႈၼိူဝ်မိူင်းၵဝ်ၸိူဝ်ႉၼင်ႇၼႆ။- 10ၵွပ်ႈသင်လႄႈမႂ်းႁဵတ်းဢမုဢၼ်ၽူႈလႂ်ဢမ်ႇထုၵ်ႇလီႁဵတ်းတီႈၵဝ်ၼၼ်ႉၸိူဝ်ႉၼင်ႇႁိုဝ်၊” ဝႃႈၼင်ႇၼႆဢေႃႈ။

11 ဢႃႇပြႃႇႁၢမ်ႇ၊ၶိုၼ်းလၢတ်ႈလႄႈဝႃႈ၊ “ၵဝ်ၶႃႈထၢင်ႇၵူၼ်းၵႃႈတီႈၼႆႈဢမ်ႇၵူဝ်ႁႄၽြႃးပဵၼ်ၸဝ်ႈလႄႈတၵ်းတေဢဝ်ၵဝ်ၶႃႈတၢႆႁႂ်ႈလႆႈသိမ်းဢဝ်မေးၵဝ်ၶႃႈလႄႈၸင်ႇလႆႈႁဵတ်းၸိူဝ်ႉၼင်ႇၼႆမႅၼ်ႈတီႈၶႃႈယဝ်ႉဢေႃႈ။- 12မၼ်းပဵၼ်ၼွင်ႉယိင်းၵဝ်ၶႃႈၸႂ်ႈတႄႉၶႃႈဢေႃႈ။ ႁဝ်းႁူမ်ႈပေႃႈဢမ်ႇႁူမ်ႈမႄႈလႄႈ၊ၵဝ်ၶႃႈဢဝ်မၼ်းပဵၼ်မေးၶႃႈဢေႃႈ။- 13မိူဝ်ႈဢၼ်ၽြႃးပဵၼ်ၸဝ်ႈသူင်ႇၵဝ်ၶႃႈဢွၵ်ႇသေႁိူၼ်းၵဝ်ၶႃႈၵႂႃႇၵႃႈတီႈတၢင်ႇဝၢၼ်ႈတၢင်ႇမိူင်းၸိုင်၊ၵဝ်ၶႃႈလႆႈသင်ႇလၢတ်ႈတီႈမၼ်းဝႆႉလႄႈဝႃႈ၊ ‘ၼႂ်းတၢင်းဢၼ်မႂ်းမီးသဵတ်ႈၸႃႇၵႃႈၼိူဝ်ၵဝ်ထၼ်ႇႁိုဝ်ၼၼ်ႉ၊မိူဝ်ႈဢၼ်ႁွတ်ႈထိုင်ၵႂႃႇၵႃႈတီႈလႂ်သေဢမ်ႇဝႃႈ၊မႂ်းတေလႆႈမွၵ်ႇပိူၼ်ႈဝႃႈ၊ၵဝ်ပဵၼ်ပီႈဢၢႆႈမႂ်းဝႃႈၼႆတႃႉ၊’ ဝႃႈၼင်ႇၼႆဝႆႉတီႈၶႃႈဢေႃႈ၊” ဝႃႈၼင်ႇၼႆဢေႃႈ။

14ႁဵတ်းၼၼ်လႄႈဢၽိမလႅၵ်ႉ၊ဢဝ်ၸႃႇရႃႇ၊ၶိုၼ်းပၼ်တီႈဢႃႇပြႃႇႁၢမ်ႇ၊သေယဝ်ႉ၊ယင်းဢဝ်ၸႃႉၸဵမ်ၽုင်သူဝ်း၊ၽုင်ဝူဝ်းလႂ်၊ဢိၵ်ႇတင်းၶႃႈၵူၼ်းၸႂ်ႉလႂ်၊ပၼ်ၵႂႃႇၸွမ်းသေလႄႈ၊- 15လၢတ်ႈတီႈဢႃႇပြႃႇႁၢမ်ႇ၊လႄႈဝႃႈ၊ “ၵႃႈၼႂ်းမိူင်းၵဝ်တင်းသဵင်ႈတင်းလူင်ၼႆႉမႂ်းၶႂ်ႈယူႇသဝ်းၵႃႈတီႈလႂ်ၵေႃႈယူႇသဝ်းတႃႉ၊” ဝႃႈၼင်ႇၼႆဢေႃႈ။- 16တီႈၸႃႇရႃႇ၊ၵေႃႈမၼ်းလၢတ်ႈလႄႈဝႃႈ၊ “ၵဝ်ပၼ်ငိုၼ်းႁဵင်ၼိုင်ႈတီႈပီႈဢၢႆႈမႂ်းႁႂ်ႈလႆႈပဵၼ်တၢင်းမႄးသရေႇၼႃႈတႃမႂ်းယဝ်ႉ။ ႁႂ်ႈၵူၼ်းၵူႈၵေႃႉႁုလွင်ႈဢၼ်မႂ်းဢမ်ႇလႆႈၽိတ်းပိူင်ႈၵႃႈသင်ၼၼ်ႉသေၵမ်း၊” ဝႃႈၼင်ႇၼႆဢေႃႈ။

17-18ၵွပ်ႈပိူဝ်ႈလွင်ႈတၢင်းဢၼ်ပဵၼ်မႃးၵႃႈတီႈၸႃႇရႃႇ၊မေးဢႃႇပြႃႇႁၢမ်ႇ၊ၼၼ်ႉလႄႈထႃႇဝရႃႉၽြႃး၊လႆႈၵိၼ်ႇဝႃႈ၊တီႈၽူႈယိင်းဢၼ်မီးၵႃႈၼႂ်းႁေႃဢၽိမလႅၵ်ႉ၊ၸိူဝ်းၼၼ်ႉဝႃႈ၊ယႃႇႁႂ်ႈၶဝ်ၵိူတ်ႇလဵင်ႉလုၵ်ႈလႆႈၼၼ်ႉဢေႃႈ။ ပိူဝ်ႈၼႆဢႃႇပြႃႇႁၢမ်ႇ၊သူးတွင်းပုၼ်ႈဢၽိမလႅၵ်ႉ၊လႄႈၽြႃးပဵၼ်ၸဝ်ႈယုၵ်ႉယႃပၼ်တီႈမၼ်းတင်းၼၢင်းမၼ်းဢိၵ်ႇတင်းၶႃႈၽူႈယိင်းမၼ်းတင်းလၢႆလႄႈၶဝ်ၶိုၼ်းဢွၼ်ၵၼ်လႆႈၵိူတ်ႇလုၵ်ႈၵိူတ်ႇလၢင်းဢေႃႈ။

Currently Selected:

ငဝ်ႈ 20: SHNCL

Highlight

Copy

Want to have your highlights saved across all your devices? Sign up or sign in